ጳውሎስ እውነተኛ ሐዋርያነቱን በመግለጽ ተከራከረ (2ኛ ቆሮ. 10፡1-13፡14)

ቲቶ በመቄዶንያ ከጳውሎስ ጋር በተገናኘ ጊዜ አብዛኛዎቹ የቆሮንቶስ ክርስቲያኖች እንደሚደግፉት ገለጸለት። ነገር ግን ጳውሎስን አጥብቀው የተቃወሙ ሌሎችም ሰዎች ነበሩ። ስለሆነም፥ በመልእክቱ መጨረሻ አካባቢ ጳውሎስ ሐዋርያነቱን ለተቃወሙት ሰዎች ጠንካራ የመከላከያ ሙግት ያቀርባል።

የውይይት ጥያቄ፡– 1ኛ ቆሮ. 10-13 አንብብ። ጳውሎስ እውነተኛ የክርስቶስ ሐዋርያ መሆኑን እንደሚያረጋግጡ የገለጻቸውን የተለያዩ ነገሮች ዘርዝር።

ሀ. ጳውሎስ የሚቃወሙትን ሰዎች እንደሚቀጣ ገልጾአል (2ኛ ቆሮ. 10፡1-6)። ምናልባትም ጳውሎስን የሚቃወሙ ሰዎች አብሯቸው በሚሆን ጊዜ እንደሚያፍርና መልእክቶችን በሚጽፍበት ጊዜ ግን እንደሚበረታ ተናግረው ነበር። በደብዳቤ እንጂ ከሰዎች ጋር ፊት ለፊት የመጋፈጥ ብቃት እንደሌለው ተናግረው ነበር። (ጳውሎስ ስለ ማፈርና መድፈር የተናገረው በምጸት ሰዎች በሰነዘሩበት ነቀፋ ላይ ምላሽ በመስጠት ነው።) ጳውሎስ ሐዋርያዊ ትምህርቱንና ሥልጣኑን የተቃወሙትን ሰዎች እንደሚጎብኝና ዓመፀኝነታቸውን እንደሚቀጣ አስረድቷል።

ነገር ግን ጳውሎስ ተቃዋሚዎቹን በዓለማዊ መንገድ ሊዋጋ አልፈለገም። ለመከራከር፥ ለመጣላት፥ የሰዎችን ባሕርይ ሊያጠቃ፥ ወዘተ… አልፈለገም። ካለመታዘዝ ተግባራቸው በስተጀርባ መንፈሳዊ ጦርነት እንዳለ ያውቅ ነበር። በመንፈሳዊ ውጊያው ሰይጣን የሚያነሣበትን ሙግት ለማጥፋት የሚያስችል የእግዚአብሔር ኃይል ነበረው። ጳውሎስ ታላላቆች ነን እያሉ የሰይጣን መጠቀሚያ በመሆን በእግዚአብሔር እውቀት ላይ የሚነሡትን ሰዎች ይዋጋ ነበር። ጳውሎስ ከመበቀልና ሰዎችን ከማጥቃት ይልቅ አሳቦቹን ሁሉ ለክርስቶስ ለመማረክ ወሰነ።

የሐሰት አስተማሪዎች ወይም በመንፈሳዊ የቤተ ክርስቲያን መሪዎች ላይ ተቃውሞ የሚሰነዝሩ ሰዎች የሰይጣን መጠቀሚያዎች ናቸው። ሰይጣን ዕቅዶቹን ለማስፋፋትና የእግዚአብሔርን ሥራ ለማፍረስ ሰዎችን ይጠቀማል። ጳውሎስ መራርነት፥ ቁጣና በሰዎች መካከል የሚከሰት ጠብ የሰይጣን ይዞታ (ሰይጣን የሚቆጣጠረው «ምሽግ») እንደሆነ ገልጾአል። ሰይጣን የውሸት አባት ስለሆነ፥ ክርክሮችንና የግብዝነትን ተግባራት በመፈጸም እውነትን ለማጥቃት ይሞከራል። ከሰይጣን ጋር በምናደርገው ትግል፥ «በኢየሱስ ስም ራቅ!» ማለቱ ብቻ በቂ አይደለም። አእምሯችንን (ስለ ሰዎች የምናስበውን፥ የቁጣና የመለያየት ስሜቶቻችንን) በመቆጣጠርና እውነትን በማወቅ ተግተን ልንሠራ ይገባል።

የውይይት ጥያቄ፡- ሀ) ሰይጣን በሕይወትህ ውስጥ ጠንካራ ይዞታ ስላገኘበት ሁኔታ ግለጽ። ለ) ያ ጠንካራ ይዞታ በተሳሳቱ አሳቦች፥ እምነት ወይም ውሸት ላይ የተመሠረተበትን ሁኔታ ግለጽ። ሐ) አሳባችንን መማረክና መቆጣጠር አስፈላጊ የሚሆነው ለምንድን ነው? መ) የሰይጣንን ውሸት በእውነት ማፍረስ አስፈላጊ የሚሆነው ለምንድን ነው?

ለ. ጳውሎስ ሰዎችን እያነጻጸሩ አንዳንዶችን እንደ ደካሞች ሌሎችን ደግሞ እንደ ብርቱዎች መፈረጁ ሞኝነት እንደሆነ አመልክቷል። ዋናው ቁም ነገር የእግዚአብሔር ለአንድ ሰው ያለው ምዘና ነው (2ኛ ቆሮ. 12፡7-18)። ጳውሎስን የተቃወሙት ሰዎች እንዲህ ሲሉ ደረጃውን ዝቅ አደረጉ። «የጳውሎስን መልእክት በምታነብበት ጊዜ ጠንካራ ቢመስልም፥ የመናገር ብቃት የሌለው ደካማ አገልጋይ ነው።» ራሳቸውን ወይም ሌሎች ዝነኛ ሰባኪያንን ከጳውሎስ ጋር በማነጻጸር የጳውሎስን ደካማነት ለማጉላት ሞከሩ። ጳውሎስ ለዚህ ዓይነቱ የኩራት አስተሳሰብ በሚከተለው መንገድ ምላሽ ሰጥቷል።

  1. ዋናው ነገር ወይም የሚሻለው የበለጠ ስጦታ ያለው ማን ነው? የሚለው አይደለም። ይህ የዓለም አስተሳሰብ ነው። ዋናው ነገር አንድ ሰው የክርስቶስ መሆኑና ታማኝ ክርስቲያን መሆኑ ነው።
  2. ጳውሎስ ራሱን ከሌሎች ጋር ከማነጻጸር ይልቅ ትምክህቱን ባከናወናቸው ተግባራት ወስኗል። እግዚአብሔር ወንጌሉን ወደ ቆሮንቶስ ለማምጣት በእርሱ በኩል ሠርቷል። በቆሮንቶስ ክርስቲያኖች ትብብር እግዚአብሔር ወንጌሉን ወዳልሰሙት ለማዳረስ እንደሚጠቀምበት ጳውሎስ ተስፋ ያደርግ ነበር። የሐሰት አስተማሪዎች ግን ክርስቲያኖች ወደሚገኙባቸው አካባቢዎች በመሄድ ሕዝቡን ግራ ለማጋባት ፈለጉ። እነዚህ የሐሰት አስተማሪዎች እንደ ጳውሎስና አጵሎስ ያሉ አገልጋዮች ባከናወኗቸው ሥራዎች ይመኩ ነበር። ደግሞም በቤተሰባቸው ስም፥ በዘር ሐረጋቸው ወይም በትምህርታቸው ይመኩ ነበር።
  3. በመጨረሻም፥ ዋናው ነገር እኛ ስለ ራሳችን ወይም ስለ አገልግሎታችን የምንናገረው ሳይሆን እግዚአብሔር የሚናገረው ነው። እግዚአብሔር ወንጌል ባልደረሰባቸው ስፍራዎች ወንጌልን ለማድረስ እየተጠቀመበት ከጳውሎስ ጋር አብሮ በመሥራት ላይ መሆኑን አሳይቷል። በመጨረሻም፥ ጌታ ኢየሱስ ጳውሎስና የሐሰት አስተማሪዎች ያከናወኑትን ተግባር በመመዘን ላከናወኑት ተግባር ያመሰግናቸዋል ወይም ይወቅላቸዋል።

የውይይት ጥያቄ፡- ሀ) ዛሬ ክርስቲያኖች (አብያተ ክርስቲያናት) ራሳቸውን ከሌሎች ጋር በማነጻጸር ወይም ከሌሎች የተሻለ አገልግሎት እንደሚሰጡ በማሰብ ለሰይጣን ወጥመድ የሚጋለጡት እንዴት ነው? ለ) ሰዎች በሚተቹን ጊዜ የመጨረሻው ፈራጅ እግዚአብሔር እንደሆነ ማስታወስ አስፈላጊ የሚሆነው ለምንድን ነው?

ሐ. ጳውሎስ ለቆሮንቶስ ክርስቲያኖች ግድ የተሰኘበትን ምክንያት ያብራራል (2ኛ ቆሮ. 11፡1-6)። ሐሰተኛ አስተማሪዎች በጳውሎስ ሐዋርያነት ላይ ጥርጣሬ በመዝራት አገልግሎቱን ለማዳከም ይጥሩ ነበር። ጳውሎስን ከዋነኞቹ ሐዋርያት፥ ማለትም ኢየሱስ ካሠለጠናቸው ከ12ቱ ሐዋርያት ጋር አነጻጸሩት (ለምሳሌ ዮሐንስ፥ ጴጥሮስ)። ጳውሎስ ተገቢውን ትምህርት አላገኘም፤ «የሠለጠነ ሰባኪ» አይደለም ይሉ ነበር።

ጳውሎስ ራሱን ከሁሉም ሐዋርያት እኩል አድርጎ እንደሚመለከት ገልጾአል። ነገር ግን ጳውሎስ ሐዋርያነቱን የሚያረጋግጡ አሳቦችን ከማቅረቡ በፊት፥ ለእርሱ የነበራቸው አመለካከት ለምን እንዳሳሰበው ያስረዳል። የእርሱ ራእይ ቆሮንቶስን ጨምሮ የመሠረታቸውን አብያተ ክርስቲያናት ሁሉ ለጌታ ለኢየሱስ ክርስቶስ እንደ ንጽሕት ሙሽራ ማቅረብ ነበር። በኃጢአት ወይም የሐሰት ትምህርቶችን በመከተላቸው ምክንያት የክርስቲያኖች ንጽሕና እንዲጓደል አልፈለገም ነበር። ቤተ ክርስቲያን ከኃጢአት ጸድታ፥ በፍቅር አድጋ፥ እውነትን በመከተልና በመታዘዝ ለክርስቶስ ንጹሕ ድንግል እንድትሆን ይፈልጋል። ስለሆነም፥ ጳውሎስ በክፍፍልና የሐሰት ትምህርቶች አማካኝነት የቤተ ክርስቲያንን ንጽሕና ያጓደሉትን የሐሰት አስተማሪዎች በጽናት ይታገላል። ጳውሎስ የሐሰት ሐዋርያት ስሙን ከማጉደፋቸውም በላይ ንጹሕ ያልሆነ ወንጌል እያስተማሩ መሆናቸውን ተረድቶ ነበር። የተዛባ ወንጌል ድነት (ደኅንነትን) የሚያስገኝ እየመሰለ ወደ ዘላለማዊ ኩነኔ የሚመራ በመሆኑ አደገኛ ነው።

መ. ጳውሎስ ለቆሮንቶስ ቤተ ክርስቲያን ላበረከተው አገልግሎት የገንዘብ ክፍያ ያልተቀበለበትን ምክንያት ያስረዳል (2ኛ ቆሮ. 11፡7-12)። በመጽሐፍ ቅዱስ ውስጥ የምናገኘው የተለመደ አሠራር ቤተ ክርስቲያንን የሚያገለግሉ ሰዎች ከቤተ ክርስቲያኒቱ ደመወዝ መቀበል እንዳለባቸው የሚያሳይ ነው (1ኛ ቆሮ. 9፡7-18ን እንብብ።) ጳውሎስ ግን በአብያተ ክርስቲያናት ውስጥ በሚያገለግልበት ጊዜ ይህንን አሠራር አልተከተለም። ከሚያገለግልባቸው አብያተ ክርስቲያናት ለአገልግሎቱ ገንዘብ ለመቀበል አልፈለገም ነበር። የቆሮንቶስ ክርስቲያኖች አስፈላጊ ሙያተኞች ሁሉ ደመወዝ መቀበል አለባቸው የሚል ባሕላዊ አመለካከት ነበራቸው፡፡ በዚህም ምክንያት የጳውሎስን ዓላማ በተሳሳተ መንገድ ተረዱት። ጳውሎስ ገነዘቡን ያልጠየቀው አገልግሎቱ ዋጋ እንደማያወጣ በማሰብ ነበር? ጳውሎስ ደመወዝ መቀበልን ያልፈለገው ማንም ሰው ወንጌሉን የሚሰብከው ሀብታም ለመሆን ሲል ነው ብሎ እንዳያስብ ነበር። ጳውሎስ ሕዝቡ የአገልግሎት መነሣሻ ምክንያቱን ከመመርመር ይልቅ በወንጌሉ እውነት ላይ እንዲያተኩሩ ነበር የፈለገው።

ሰዎች የወንጌል መልእክተኛው የተነሣሣበትን ምክንያት በሚጠራጠሩበት ጊዜ ወንጌሉን ለመቀበል ይቸገራሉ። እንግዲህ ጳውሎስ የሚተዳደርበትን ንዘብ ከየት ያገኛል? ጳውሎስ ሌሎች አብያተ ክርስቲያናትን እንደ «ዘረፈ» ይናገራል። ጳውሎስ ከእነዚያ አብያተ ክርስቲያናት ገንዘብ አልሰረቀም። ነገር ግን የቆሮንቶስ ክርስቲያኖች ገንዘባችንን ፈልጎ መጣ ብለው እንዳያስቡ ለማድረግ የወሰደውን እርምጃ ለማሳየት ጠንካራ አገላለጽ ይጠቀማል። ጳውሎስ በቆሮንቶስ አብያተ ክርስቲያናት ውስጥ በሚያገለግልበት ጊዜ ከእነርሱ ደመወዝ አልጠየቀም ነበር። ነገር ግን ወደ ሌሎች የአገልግሎት ስፍራዎች በሚሄድበት ጊዜ እንደ መቄዶንያ አማኞች ያሉ ሌሎች አብያተ ክርስቲያናት በገንዘብ እንዲደግፉትና የወንጌል አገልግሎቱ ተካፋይ እንዲሆኑ ጠይቋል።

የውይይት ጥያቄ፡- ሀ) ለቤተ ክርስቲያን አገልግሎት ገንዘብን መቀበል አንድን በአገልግሎቱ ላይ ያለን ሰው እንዴት ለጥርጣሬ እንደሚያጋልጥ ግለጽ። ለ) የቤተ ክርስቲያን የሙሉ ጊዜ አገልጋዮች ወንጌሉን የሚሰብኩት ገንዘብ ለማግኘት ነው የሚል ትችት እንዳይሰነዘርባቸው መጠንቀቅ ያለባቸው ለምንድን ነው? ሐ) ለቤተ ክርስቲያን አገልጋይ ብዙ ደመወዝ መቀበል እደገኛ የሚሆነው ለምንድን ነው?

ሠ. ጳውሎስ የቆሮንቶስ ክርስቲያኖች መልካም እየመሰሉ የሰይጣን መሣሪያዎች ሆነው ከሚሠሩት ሐሰተኛ ሐዋርያት እንዲጠነቀቁ አስጠነቀቃቸው (2ኛ ቆሮ. 11፡13-15)። ጳውሎስ ስሙን ለማጥፋትና የቆሮንቶስ ክርስቲያኖችን ከእርሱ ለማራቅ ስለሚሞክሩት ሰዎች በቀጥተኛ አገላለጽ ብዙም አልተናገረም። «ሐሰተኛ» ሐዋርያት ብሏቸዋል። በአዲስ ኪዳን ቤተ ክርስቲያን ሁለት የሐዋርያነት ደረጃዎች ነበሩ። 12ቱ ሐዋርያትና ጳውሎስ በቤተ ክርስቲያን ላይ ልዩ ሥልጣን ነበራቸው። ሌሎች በተወሰኑ ጉዳዮች ላይ ጠቃሚ አገልግሎት ያበረከቱ ሐዋርያትም ነበሩ (ሮሜ 16፡7)። ጳውሎስ ግን በቆሮንቶስ የነበሩትን የሐሰት አስተማሪዎች «ሐሰተኛ ሐዋርያት» ብሏቸዋል። እነዚህ ሰዎች በኢየሩሳሌም ከሚገኙ ታላላቅ ሐዋርያት እንደተላኩ ተናግረው ይሆናል። ግለሰቦቹ ማንነታቸውን የሚገልጽ የማስተዋወቂያ ደብዳቤ ይዘው ቢመጡም፥ መልእክታቸው ከእግዚአብሔር ባለመሆኑ ሐሰተኛ ሐዋርያት ነበሩ። ጥሩ ስጦታ ያላቸውና፥ በንግግር ችሎታ የተካኑ፥ መልካም መልእክት የያዙ የሚመስሉና በቤተ ክርስቲያን ውስጥ የተወደዱ ሊመስሉ ይችላሉ። ጳውሎስ እንዴት ሐሰተኛ ናቸው ሊል ቻለ? ጳውሎስ እነዚህ ሰዎች እንደ መንፈሳዊ አባታቸው ሰይጣን በመሆናቸው መልካም መስለው ተወዳጅነትን እንዳተረፉ በመግለጽ የቆሮንቶስን ክርስቲያኖች ያስጠነቅቃል። ሰይጣን ብዙውን ጊዜ የእግዚአብሔርን ልጆች ግራ ለማጋባት በሚፈልግበት ጊዜ እንደ ክፉ ሰው ሳይሆን እንደ ብርሃን መልአክ ሆኖ ነው የሚመጣው። ቃላቱና ትምህርቶቹ ለጆሮ የሚጥሙ ቢመስሉም የኋላ ኋላ ግን ግራ መጋባትንና ሞትን ያስከትላሉ። በተመሳሳይ ሁኔታ፥ የሐሰት አስተማሪዎች መንፈሳዊና ጥሩ መልእክት የሚናገሩ ይመስላሉ። ክፉ ባሕርያቸው ለሰዎች የሚታወቀው ከተወሰነ ጊዜ በኋላ ነው።

የውይይት ጥያቄ፡- ሀ) የሐሰት አስተማሪዎች የጽድቅ አገልጋዮች መስለው በመቅረብ የእግዚአብሔርን ሕዝብ ሲከፋፍሉና ሲጎዱ የተመለከትህበትን ሁኔታ ግለጽ። ለ) ይህ የቤተ ክርስቲያን መሪዎች እውነትን በሚገባ ስመረዳት፥ ጥሩ የሚመስሉ ቃላት እየተናገሩና ከመጠን ያለፈ «መንፈሳዊነትን» እያሳዩ ከሚመጡ ሰዎች ስለመጠንቀቃቸው አስፈላጊነት ምን ያስተምራል?

ረ ጳውሎስ ለወንጌሉ ከተቀበለው መከራ ስለ እውነተኛነቱና ሐዋርያነቱ መረዳት ይቻላል (2ኛ ቆሮ. 11፡16-33)። የሐሰት አስተማሪዎቹ ምናልባትም የአብርሃም ዘሮች መሆናቸውን በትምክህት የተናገሩ አይሁዶች ሳይሆኑ አይቀሩም። ምንም እንኳ ጳውሎስ ስለ ራሱ ለመናገር ባይፈልግም፥ የቆሮንቶስ ክርስቲያኖች ስለ ሐዋርያነቱ የተሳሳተ አመለካከት እንዳይኖራቸው ለመከላከል ሲል ስለ ሕይወቱ የሚከተለውን ብሏል።

  1. ጳውሎስ ከአብርሃም ዘር የተገኘ አጥባቂ አይሁዳዊ ነበር። እርሱ ጥርት ያለ አይሁዳዊ ነበር።
  2. ጳውሎስ ሙሉ በሙሉ ሕይወቱን ለጌታ ለኢየሱስ ክርስቶስ ሰጥቷል። ይህም ወንጌሉን ለመስበክ ሲል በተቀበላቸው ብዙ የስደትና የአደጋ ዓይነቶች ታይቷል። ብዙውን ጊዜ ለግል ክብርና ለገንዘብ ጥቅም የሚያገለግሉ ሰዎች ከመከራ ይሸሻሉ። ለወንጌሉ ራሳቸውን፥ ምኞቶቻቸውንና ሕይወታቸውን የሚሠዉት የተሰጡ ግለሰቦች ናቸው።
  3. ጳውሎስ ለቤተ ክርስቲያን የነበረው ጭንቀት ከፍተኛ ነበረ። ጳውሎስ ቤተ ክርስቲያንን መመሥረት ብቻ ሳይሆን የአማኞች መንፈሳዊ ዕድገትም በጥልቅ ያሳስበው ነበር። ስለሆነም፥ ክርስቲያኖች በሚጎዱበት ጊዜ እርሱም አብሯቸው ይጎዳል።

ሰ. የጳውሎስ መንፈሳዊ ልምምድ ከሌሎቹ የጠለቀ ነበር (2ኛ ቆሮ. 12፡1-10)። ብዙውን ጊዜ ሐሰተኛ አስተማሪዎች መንፈሳዊነታቸውን አለአግባብ ለማሳየት ይተጋሉ። በልሳን የመናገር፥ የመፈወስ፥ የመጸለይና የመሳሰለው ችሎታ እንዳላቸው ለማሳየት ይተጋሉ። ጳውሎስም ከእነርሱ የላቀ መንፈሳዊ ልምምድ እንዳለው ይነግራቸዋል። እግዚአብሔር በራእይ ወደ መንግሥተ ሰማይ፥ ገነት ወይም ሦስተኛ ሰማይ ወስዶ ለሌሎች መናገር ያልተፈቀደለትን ነገር አሳይቶታል።

ነገር ግን ጳውሎስ መንፈሳዊ ኩራት ለቤተ ክርስቲያን መሪዎች እጅግ አደገኛ ከሆኑት ነገሮች አንዱ መሆኑን ያውቃል። እግዚአብሔር ሰው በችሎታው ወይም በመንፈሳዊ ልምምዱ መኩራራቱን ይጠላል። እግዚአብሔር ኩራተኞች (ትዕቢተኞችን) ለማዋረድ ወስኗል (ያዕ. 4፡6)። ስለሆነም፥ ጳውሎስ ዋናው ነገር በክርስቶስ ላይ ሙሉ በሙሉ መደገፍ እንጂ መንፈሳዊ ልምምድ እንዳልሆነ ያስረዳል። እግዚአብሔር ጳውሎስ በትሕትና ይመላለስ ዘንድ የሥጋ መውጊያ ሰጠው። ጳውሎስ እግዚአብሔር ይህን መውጊያ እንደሰጠው እየተናገረ በተመሳሳይ ጊዜ መውጊያው «የሰይጣን መልእክተኛ» ነው ማለቱ አስገራሚ ነው። ይህም እግዚአብሔር ሰይጣን በልጆቹ ላይ የሚያመጣውን ጥቃት ጨምሮ ሁሉንም ነገር እንደሚቆጣጠር ያሳያል። ምንም እንኳ ጳውሎስን በመውጊያው በቀጥታ ያጠቃው ሰይጣን ቢሆንም፥ ጳውሎስ ሰይጣን እርሱን ትሑትና የእግዚአብሔር ጥገኛ ለማድረግ የተላከ የእግዚአብሔር መሣሪያ መሆኑን ተረድቷል። ይህ የሥጋ መውጊያ ምን እንደሆነ አናውቅም። አንዳንድ ምሁራን ይህ እንደ እይታ ችግር ያለ የአካል ጉድለት እንደነበር ይናገራሉ። ጳውሎስ ይህ ችግር እንዲወገድለት ሦስት ጊዜ ቢጸልይም የፈለገውን ምላሽ አላገኘም። እግዚአብሔር ጸሎታችንን እኛ በምንፈልገው መንገድ አይመልስም። አንዳንድ ጊዜ «አይሆንም» የሚልባቸው ጊዜያት አሉ። እግዚአብሔር ለጳውሎስ «አይሆንም» ያለው ለምን ነበር? ጳውሎስ ከዚህ ምን ተማረ? ጳውሎስ እግዚአብሔር አንዳንድ ጊዜ ለልጆቹ መውጊያ በመስጠት በጸጋው ላይ ተደግፈን እንድንገዛለት እንደሚያደርግ ገልጾአል። ሰዎች የእግዚአብሔርን ኃይል ሊያዩ የሚችሉት እግዚአብሔር ከድካማችን ባሻገር ሲጠቀምብን ነው።

የውይይት ጥያቄ፡- ሀ) ስለ ጸሎት፥ እግዚአብሔር ጸሎትን ስለሚመለከትበት ሁኔታና ስለ መከራ ከጳውሎስ ሕይወት ምን እንማራለን? ለ) እግዚአብሔር ለአንድ ሰው መውጊያ ሰጥቶ ሳለ በከፍተኛ ሁኔታ የተጠቀመበትን ሁኔታ ግለጽ።

ሸ. እግዚአብሔር ጳውሎስ እንደ «ታላላቆቹ ሐዋርያት» ተአምራትን እንዲሠራ አድርጓል (2ኛ ቆሮ. 12፡11-13)፡፡

ቀ. ጳውሎስና ወኪሎቹ ለቆሮንቶስ ቤተ ክርስቲያን የገንዘብ ሸክም ለመሆን አልፈለጉም (2ኛ ቆሮ. 12፡14-21)። ጳውሎስ እንደገና እንደሚጎበኛቸውና ነገር ግን የገንዘብ ሸክም እንደማይሆንባቸው ገልጾአል። ጳውሎስ እንደ መንፈሳዊ አባታቸው በእምነታቸው እንዲያድጉ ለማበረታታት ሁሉንም ነገር ሊሰጣቸው ፈቃደኛ ነበር። ነገር ግን መንፈሳዊ ልጆቹ እንደመሆናቸው መጠን ምንም ዓይነት የገንዘብ ችግር እንዲደርስባቸው አልፈለገም። ጳውሎስ ቤተ ክርስቲያኒቱን በሚጎበኝበት ጊዜ ክርስቲያኖቹ በክፍፍልና በወሲባዊ እርኩሰቶች ተሞልተው እንዳይቆዩና እርሱ እንደሚፈልገው በፍቅር ሳይሆን በቁጣና በቅጣት እንዳያገኛቸው ሰግቷል።

ስ. ጳውሎስ ለቆሮንቶስ ክርስቲያኖች የመጨረሻ ማስጠንቀቂያውን ሰጣቸው (2ኛ ቆሮ. 13፡1-10)። ጳውሎስ በቅርቡ ለሦስተኛ ጊዜ እንደሚጎበኛቸው ገልጾአል። በሚመጣበት ጊዜ የትዕግሥትና የመቻቻል ገደብ ስለሚያበቃ እርሱንና እግዚአብሔርን በተቃወሙት ሰዎች ላይ ፍርድን ይበይናል። ወንጌሉን ለመስበክ ብቻ ሳይሆን ንስሐ ለመግባት ባልፈለጉት ዓመፀኛ ክርስቲያኖች ላይ ቅጣት ለመስጠት ሐዋርያዊ ሥልጣን እንዳለው ያሳያቸዋል።

ጳውሎስ የቆሮንቶስ ክርስቲያኖች ራሳቸውን እንዲመረምሩ ያበረታታቸዋል። ጳውሎስ የሰበከላቸውን እምነት ይዘው እየተመላለሱ ናቸው ወይስ ሌላ ወንጌል ተቀብለዋል? በትሕትና፥ ንጽሕናና ታዛዥነት እየተመላለሱ ናቸው ወይስ የዓመፀኝነት መንፈስ አለባቸው። መንፈሳዊ ምዘና ለሁላችንም ጠቃሚ ነው። ከጊዜ ወደ ጊዜ ራሳችንን ካልመረመርን፥ በቀላሉ በኃጢአት ልንወድቅ፥ ለክርስቶስ ካለን የመጀመሪያ ፍቅር ልንወሰድና ለክርስቶስ የነበረንን ቅንዓት ልናጣ እንችላለን። ሕይወታችንን፥ ልባችንን፥ ተግባራችንንና አሳባችንን የመመርመርና የማረም ልማድ ካለን፥ ክርስቶስን ወደ መምሰል እናድጋለን።

ተ. ጳውሎስ ለአማኞች የስንብት ሰላምታ ያቀርባል (2ኛ ቆሮ. 13፡11-14)። ጳውሎስ የቆሮንቶስ ክርስቲያኖች ለፍጹምነት እንዲተጉና እግዚአብሔር በሚፈልጋቸው መንገድ እንዲኖሩ ያበረታታቸዋል። እርስ በርሳቸው በአንድነት እንዲኖሩ ይማፀናቸዋል። የኢየሱስ ጸጋ፥ የእግዚአብሔር አብ ፍቅርና የመንፈስ ቅዱስ ኅብረት ከእነርሱና ከእኛ ጋር እንዲሆን ይጸልያል። ይህም ተግባራዊ የሚሆነው እግዚአብሔርን ለማስደሰት በማሰብ በፍቅር፥ በታዛዥነትና በአንድነት ስንመላለስ ነው።

የውይይት ጥያቄ፡- 2ኛ ቆሮንቶስ የጳውሎስ እጅግ ግላዊ መልእክት ነው። ሀ) ከጳውሎስ፥ ከመነሣሻ ምክንያቶቹ፥ ከተግባሮቹና ከሙከራዎቹ ያስገረመህን ዘርዝር። ለ) ከዚህ መልእክት ስለ ቤተ ክርስቲያን አመራር ምን እንማራለን?

(ማብራሪያው የተወሰደው በ ኤስ.አይ.ኤም ከታተመውና የአዲስ ኪዳን የጥናት መምሪያና ማብራሪያ፣ ከተሰኘው መጽሐፍ ነው፡፡ እግዚአብሔር አገልግሎታቸውን ይባርክ፡፡)

ጳውሎስ ለአይሁድ ክርስቲያኖች ስለሚሰጠው የገንዘብ ዕርዳታ ማብራሪያ ሰጠ (2ኛ ቆሮ. 8፡1-9፡15)

አይናለም የመጽሐፍ ቅዱስ ትምህርት ቤት ተማሪ በነበረች ጊዜ በገንዘብ እጥረት ትቸገር ነበር። አሥራት መክፈል እንዳለባት ብታውቅም፥ «እኔ በጣም ድሀ ነኝ፤ ለመጻሕፍት መግዣና ለመተዳደሪያ ገንዘብ ያስፈልገኛል፤ ተመርቄ ሥራ ላይ ስሰማራ እከፍላለሁ» ትል ነበር። ከተመረቀች በኋላ በቤተ ክርስቲያኗ ውስጥ ሥራ ተሰጣት። የሚከፈላት ደመወዝ አነስተኛ በመሆኑ አንዳንድ ጊዜ የቤት ኪራይ፥ የምግብና የልብስ ወጪ ለመሸፈን ትቸገር ነበር። ስለሆነም፥ «እስካገባ ድረስ መጠበቅ አለብኝ። ያን ጊዜ ከባለቤቴ ጋር ተደጋግፈን አሥራት ልንከፍል እንችላለን» ስትል አሰበች። ባገባች ጊዜ ቶሎ በማርገዟ ሥራዋን አቆመች። የባለቤቷ ገቢ ብቻ ወጪያቸውን ለመሸፈን ካለመብቃቱም በላይ ልጅ በመውለዳቸው ለተጨማሪ ወጪ ተጋለጡ። አሁንም፥ «ልጄ ሲያድግ አሥራቴን እከፍላለሁ» አለች። ነገር ግን ልጇ አድጎ ወደ ሥራዋ ከተመለሰች በኋላ እንኳ ለእግዚአብሔር ሥራ ለመስጠት የሚበቃ ገንዘብ ያላቸው አልመሰላቸውም።

የውይይት ጥያቄ፡- ሀ) ሁልጊዜም ለእግዚአብሔር አሥራታችንን ላለመክፈል ማመኻኛ ማቅረብ የሚቀልለን ለምንድን ነው? ለ) የቤተ ክርስቲያንህ አባላት በሙሉ ለእግዚአብሔር ከገቢያቸው አንድ እሥረኛውን እጅ የሚከፍሉ ይመስልሃል? ሐ) ብዙ ክርስቲያኖች አሥራት የማይከፍሉት ለምንድን ነው? መ) ገንዘባችንን የምንጠቀምበት መንገድ ቅድሚያ ስለምንሰጣቸው ነገሮችና ለክርስቶስ ስለመታዘዛችን እንዴት ያሳያል?

ከገቢያችን ለእግዚአብሔር አንድ አሥረኛ እጅ መስጠቱ መቼም ቢሆን ቀላል አይሆንም። ብዙውን ጊዜ የምንፈልጋቸውን ነገሮች ለማድረግ የሚያስችል በቂ ገንዘብ አናገኝም። እግዚአብሔር ግን ከምናገኘው ገንዘብ ለእርሱ አንድ አሥረኛውን እንድንሰጥ በብሉይ ኪዳን ውስጥ ደንግጓል (ዘሌዋ. 27፡30-32)። ሁሉንም ነገር የሰጠንና ፍላጎታችንን የሚያሟላው እግዚአብሔር ነው። ለእነዚህ በረከቶች እግዚአብሔርን ማመስገናችንን ከምንገልጽባቸው መንገዶች አንዱ ለእርሱ የተወሰነውን ክፍል መልሶ በመስጠት ነው። አሥራትን አለመክፈላችን እግዚአብሔር ላደረገልን ነገር አመስጋኞች አለመሆናችንን ሊያሳይ ይችላል። እንዲሁም፥ ከራሳችን በቀር ስለ እግዚአብሔር መንግሥትና ስለ ሌሎች ሰዎች ፍላጎቶች የማናስብ ራስ ወዳዶች መሆናችንን ያሳያል (ማቴ. 6፡33)። ነገር ግን እግዚአብሔር የሚደሰተው አሥራትን በመክፈላችን ብቻ ሳይሆን ስለ አሥራቱ ባለን አመለካከት ጭምር ነው። አሥራትን ልንከፍል የሚገባን በፈቃደኝነት፥ በልግስናና በምስጋና ነው።

የውይይት ጥያቄ፡- 2ኛ ቆሮንቶስ 8–9 አንብብ። ሀ) ጳውሎስ ወደ ኢየሩሳሌም ለመላክ ያሰበው ስጦታ ዓላማ ምን ነበር? ለ) ስለ መስጠት፥ ማለትም እንዴትና በምን ዓይነት ልብ መስጠት እንዳለብን ጳውሎስ የጠቃቀሳቸው መርሆች ምን ምንድን ናቸው?

ቀደም ሲል ጳውሎስ ወደ ኢየሩሳሌም ተመልሶ ለመሄድና በኢየሩሳሌም ለሚገኙ ድሀ ክርስቲያኖች ምጽዋት ሰብስቦ ለመውሰድ መዘጋጀቱን በመግለጽ በእስያና ግሪክ ለሚገኙ የአሕዛብ አብያተ ክርስቲያናት መልእክት አስተላልፎ ነበር። እነዚህ የአይሁድ ክርስቲያኖች ለምን እንደደኸዩ አናውቅም። አንዳንድ ምሁራን ተደጋጋሚ ረሀብንና ጽኑ ስደትን በምክንያትነት ይጠቅሳሉ። ሌሎች ደግሞ ክርስቲያኖቹ ክርስቶስ በፍጥነት ይመለሳል ብለው በማሰብ ቤቶቻቸውን በመሸጥ፥ ሥራዎቻቸውን በማቆምና በኅብረት በመኖር ለድህነት እንደተጋለጡ ያስረዳሉ (የሐዋ. 2፡44-47)። እንዳሰቡት ክርስቶስ በፍጥነት ባለመመለሱ የገቢ ምንጭ አጥተው ደኸዩ። ጳውሎስ ከርኅራኄና በአይሁድና በአሕዛብ ክርስቲያኖች መካከል ያለውን አንድነት ለማሳየት ሲል ሀብታም የአሕዛብ አብያተ ክርስቲያናት ለድሆቹ የአይሁድ ክርስቲያኖች ዕርዳታ እንዲያደርጉ ጠይቋል። የሚያሳዝነው አንዳንድ ሰዎች ይህን አሳብ በተሳሳተ መንገድ ተረድተው ጳውሎስ ገንዘቡን ለራሱ ሊወስድ ነው ብለው አስቡ።

  1. ጳውሎስ የስጦታውን ዓለማና እንዴት መሰብሰብ እንዳለበት ገለጸ (2ኛ ቆሮ. 8፡1-9፡5)፡፡

ሀ. ስለ ስጦታው አሳብ ያቀረበው ጳውሎስ ብቻ አልነበረም (2ኛ ቆሮ. 8፡1-5)። ቲቶ የበፊቱን ደብዳቤ ይዞ ወደ ቆሮንቶስ በሄደ ጊዜ ለኢየሩሳሌም ክርስቲያኖች ገንዘብ ስለማሰባሰብ ነግሯቸው ነበር። የአሕዛብ አብያተ ክርስቲያናት መጀመሪያ አሳቡን ከተቀበሉ በኋላ በመስጠቱ ላይ ሰነፉ። ምናልባትም የቆሮንቶስ ክርስቲያኖች ስለ ስጦታው ዓላማ ግራ ሳይጋቡና ጳውሎስ ገንዘቡን ለተሳሳቱ ምክንያቶች ይጠቀምበታል ብለው ሳያስቡ አልቀሩም።

(ማስታውሻ ፥ የቤተ ክርስቲያን መሪዎች ምእመናን ነፃ ሆነው በደስታ እንዲሰጡ ለማድረግ ገንዘቡ ስለሚውልበት ዓላማ ግልጽ ግንዛቤ እንዲኖራቸው መርዳትና ገንዘቡን በሚቆጣጠሩ ሰዎች ሊተማመኑ ይገባል። ብዙውን ጊዜ እነዚህ ሁለት ነገሮች ካልተሟሉ የእግዚአብሔር ሰዎች የሚገባቸውን ያህል አይሰጡም።)

ጳውሎስ ማንንም እንዳላስገደደና እንደ መቄዶንያ ያሉ አብያተ ክርስቲያናት በራሳቸው ነፃ ፍላጎት ለመስጠት እንደመረጡ አመልክቷል። የመቄዶንያ ክርስቲያኖች ገንዘብ ለመስጠት የወሰኑት ጳውሎስ ስለ ኢየሩሳሌም ወንድሞችና እኅቶች ካብራራላቸው በኋላ ሳይሆን አይቀርም። ይህም ጳውሎስ የአሕዛብ አብያተ ክርስቲያናት ሁሉ ስጦታዎችን ወደ ኢየሩሳሌም እንዲልኩ ለመጠየቅ እንዲነሣሣ አበረታታው። የመቄዶንያ አብያተ ክርስቲያናት በገንዘብ ሀብታሞች አልነበሩም። ብዙ ሰዎች ክርስትናን በመቀበላቸው ምክንያት ተሰድደው ሥራቸውን አጥተው ነበር። ነገር ግን «በጸጋ» (በእግዚአብሔር መንፈሳዊ በረከቶች) የበለጸጉ በመሆናቸው እግዚአብሔር የሰጣቸውን ከሌሎች ጋር ለመካፈል ፈለጉ።

ጳውሎስን ደስ ያሰኘው መስጠታቸው ብቻ ሳይሆን፥ ለዚሁ ተግባር ያነሣሣቸው አመለካከታቸው ጭምር ነበር። የመቄዶንያ ክርስቲያኖች መጀመሪያ ራሳቸውን ለጌታ በመስጠታቸው አመስግኗቸዋል። በዚህም ጳውሎስ በመስጠት ውስጥ ስላለው ጠቃሚ አመለካከት አስተምሯል። ጳውሎስ በግዴታ ወይም በልማድ ብቻ ሳይሆን ሁለንተናችንን ለእግዚአብሔር አሳልፈን ከሰጠን በኋላ ገንዘባችንን መስጠት እንዳለብን አመልክቷል። ሕይወታችንን በሙሉ ለእግዚአብሔር ከሰጠን፥ እኛ ብቻ ሳንሆን የእኛ የሆነው ሁሉ የእግዚአብሔር ይሆናል። ከዚህ በኋላ አሥር እጅ ብቻ ሳይሆን እግዚአብሔርን ለማስደሰት ስንል ያለንን ሁሉ እንሰጠዋለን። ገንዘብን መስጠት እግዚአብሔርን ከምናከብርባቸው መንገዶች አንዱ ነው።

ለ. ጳውሎስ ክርስቲያኖች ራሳቸውን ሳይጎዱ በፈቃደኝነትና በልግስና እንዲሰጡ ያበረታታል (2ኛ ቆሮ. 8፡6-15)። ቲቶ የመጀመሪያውን (አሳዛኝ ደብዳቤ) ይዞ ወደ ቆሮንቶስ በሄደ ጊዜ፥ ገንዘብ መሰብሰብ እንዲጀምር መመሪያ ሳይሰጠው አልቀረም። ጳውሎስ ይህ ትእዛዝ እንዳልሆነና ለቅዱሳን ሁሉ ፍቅራቸውን የሚገልጹበት መልካም አጋጣሚ እንደሆነ አመልክቷል። የቆሮንቶስ አማኞች እንደ እውቀት ወይም እምነት ባሉት ሌሎች መንገዶች የታወቁ ነበሩ። አሁን በመስጠትም የሚታወቁበት ሁኔታ ገጥሟቸዋል። የራስ ወዳድነት መንፈስ እንዳያይልባቸው እግዚአብሔር ስለ መስጠት ምን ዓይነት አመለካከት እንዳለው ማወቅ ያስፈልጋቸው ነበር። ሀብታምና የሰማያዊ በረከቶች ሁሉ ባለቤት የነበረው ክርስቶስ ለእኛ ሲል ድህነትን መርጧል። ቤት፥ አልጋ፥ ምድራዊ ሀብት የሌለው ድሀ ሆነ። መስጠቱ ብልጽግናውን ነጠቀው። በሌላ በኩል በመዳናችን፥ የዘላለምን ሕይወት በማግኘታችን፥ የእግዚአብሔር ልጆች በመሆናችን በእርሱ ልግስና እኛ ሀብታሞች ሆነናል (ፊልጵ. 2፡5-8)።

ጳውሎስ የቆሮንቶስ ክርስቲያኖች የጀመሩትን ነገር እንዲፈጽሙ አበረታቷል። ለኢየሩሳሌም ክርስቲያኖች ገንዘብ መሰብሰብ ጀምረው ስለነበር ይህንኑ ተግባር መፈጸም ያስፈልጋቸው ነበር። ነገር ግን ጉዳዩን አበክረው በመያዝ ለራሳቸው እስኪደኸዩ ድረስ ለመርዳት መሞከር አያስፈልጋቸውም። እግዚአብሔር የቤተሰቡ አባላት ያላቸውን በማካፈል ተገቢ የሆነ የሀብት ምጣኔ እንዲለማመዱ ይፈልጋል። እግዚአብሔር ሌሎችን ለማበልጸግ ስንል ለራሳችን እንድንደኸይ አይፈልግም። ቤተ ክርስቲያን ችግረኞች የሚረዱባትና እነርሱም ዓቅሙ በሚኖራቸው ሰዓት ሌሎችን የሚረዱባት ልትሆን ይገባል።

አሥራት ሀብታሙም ሆነ ድሀው አግባብ በሆነ መንገድ ለእግዚአብሔር የሚሰጥበት መንገድ ነው። አሥር እጅ መስጠቱ ሀብታሙንም ሆነ ድሀውን እኩል ዋጋ ያስወጣዋል። በእግዚአብሔር ዓይኖች ፊት፥ ድሀው ሰው ካገኘው እሥር ብር አንድ ብር ቢሰጥና ሀብታሙ ሰው ከአምስት መቶ ብር ገቢው አምሳ ብር ቢሰጥ፥ ካላቸው እኩል ሰጥተዋል። እግዚአብሔር የሚመለክተው ብዙ መስጠታችንን ሳይሆን ካገኘነው አንጻር ትክክለኛውን መጠን መስጠታችንን ነው። ለመስጠት እጅግ ድሃ የሆነ ማንም ሰው የለም። ሰዎች እግዚአብሔር የሆነ ነገር ባይሰጣቸው ኖሮ ለመኖር እንኳን አይችሉም ነበር። ስለሆነም፥ የሌሎችን ያህል ብዙ ገንዘብ የለንም ብለው ሳያፍሩ የሚችሉትን ያህል ለእግዚአብሔር ሊሰጡ ይገባል።

የውይይት ጥያቄ፡- ሀ) በቤተ ክርስቲያንህ ሰዎች ችግረኞችን የሚረዱበት የልግስና አሰጣጥ መንፈስ አለ? ከሌለ ለምን? ለ) ቤተ ክርስቲያንህ ምእመኖቿን፥ የሌሎች አብያተ ክርስቲያናት አባሎችንና ዓለማውያንን ለመርዳት ምን ልታደርግ ትችላለች? ሐ) በቤተ ክርስቲያን ከሚሰበሰበው ገንዘብ ለድሆች የሚሰጠው ምን ያህል ነው? ቀሪውስ ገንዘብ ምን ላይ ነው የሚውለው? ድሆችን ለመርዳትና የቤተ ክርስቲያኒቱን አገልግሎት ለማካሄድ በሚውለው ገንዘብ መካከል ጥሩ ሚዛናዊነት ያለ ይመስልሃል? መ) የቤተ ክርስቲያንን ገንዘብ ለወንጌሉና ለድሆች ከማዋል ይልቅ በራስ ወዳድነት ለቤተ ክርስቲያኒቱ ብቻ መገልገል ቀላል የሚሆነው እንዴት ነው?

ሐ. ጳውሎስ ቤተ ክርስቲያኒቱን በጎበኘ ጊዜ እርሱና የቆሮንቶስ ክርስቲያኖች እንዳያፍሩ ቲቶ ገንዘቡን ለመሰብሰብ ተመልሶ እንደሚሄድ ገልጾአል (2ኛ ቆሮ. 8፡16-9፡5)። የገንዘብ አሰባሰቡ ጳውሎስን፥ የመቄዶንያን ወኪሎችና ራሳቸው የቆሮንቶስ ክርስቲያኖችን በማያስፍር መልኩ እንዲጠናቀቅ በማሰብ፥ ጳውሎስ ቲቶንና ሌሎች ሁለት ወኪሎችን አስቀድሞ ልኳል። ጳውሎስ ጉብኝቱ አማኞችን በማስተማርና በማበረታታት ላይ እንጂ በገንዘብ አሰባሰቡ ላይ እንዲያተኩር አልፈለገም ነበር።

ጳውሎስ የገንዘብ አሰባሰቡና የስጦታዎች አሰጣጡ ሂደት በመተማመን ይሞላ ዘንድ ከቲቶ ሌላ ሁለት ሰዎች ወደ ቆሮንቶስ እንደሚሄዱ ተናግሯል። ከሁለቱ ሰዎች አንደኛው «ስለ ወንጌል ስብከት በአብያተ ክርስቲያናት ሁሉ የተመሰገነ ወንድም» ነበር። ይህ ወንድም መጀመሪያ ወደ ቆሮንቶስ ከዚያም ወደ ኢየሩሳሌም ከጳውሎስ ጋር ስጦታውን ይዞ እንዲሄድ በእስያና መቄዶንያ አብያተ ክርስቲያናት የተመረጠ ነበር። ይህ ወንድም ማን እንደሆነ ባናውቅም፥ አንዳንዶች ሉቃስ እንደነበረ ይናገራሉ። ሌላም ስሙ ያልተጠቀሰ ክርስቲያን የገንዘብ አሰባሰቡን ለማገዝ ተልኳል።

ጳውሎስ የገንዘብ አያያዝ ለሁሉም የቤተ ክርስቲያን መሪዎች እጅግ አስፈላጊ እንደሆነ ገልጾአል። ገንዘብ ከፍተኛ ፈተና ሊሆን ይችላል። ብዙ የቤተ ክርስቲያን መሪዎች ለጌታ ሥራ የተቀበሉትን ገንዘብ ለራሳቸው ጥቅም በማዋል ኃጢአትን ፈጽመዋል። ደካማ የገንዘብ አያያዝም የአንድን መሪ ስም ሊያጎድፍ ይችላል። ጳውሎስ ራሱ ገንዘቡን ባይወስድም እንኳ በሰዎች አእምሮ ውስጥ ጥርጣሬ ሊፈጠር ችሎአል። ስለሆነም ቤተ ክርስቲያኒቱ የምታውቃቸውንና ገንዘቡን በአስተማማኝ ሁኔታ እንደሚያስረክቡ የምታምናቸውን ሰዎች እንድትመርጥ ጠየቀ። ጳውሎስ ራሱ ሰዎችን ያልመረጠው በገንዘቡ የፈለጋቸውን ያደርጉ ዘንድ የገዛ ወዳጆቹን መረጠ ተብሎ እንዳይታማ በማሰብ ነበር። ይህ ሁሉም የቤተ ክርስቲያን መሪዎች ሊከተሉት የሚገባው የአስተዋይነት መርሆ ነው። አንድ የቤተ ክርስቲያን መሪ ብቻውን ገንዘብ መያዝ የለበትም። ይህ ብዙውን ጊዜ ወደ ፈተናና ወደ አለመተማመን ይመራል። የጋራ ኃላፊነት የሚወስዱ ሌሎች የቤተ ክርስቲያን መሪዎችም አብረውት ሊሠሩ ይገባል። ዓላማቸውም፥ «በጌታ ፊት ብቻ ያይደለ ነገር ግን በሰው ፊት ደግሞ መልካም የሆነውን ማድረግ ነው።»

የውይይት ጥያቄ፡- ሀ) የቤተ ክርስቲያን መሪዎች የቤተ ክርስቲያንን ገንዘብ አላግባብ በመጠቀም ፈተና ውስጥ ሲገቡ የተመለከትህበትን ሁኔታ ግለጽ። ለ) ምእመናን መሪዎች የቤተ ክርስቲያንን ገንዘብ አላግባብ እየተጠቀሙበት ነው ብለው በማሰብ መጠራጠር ሲጀምሩ የተመለከትህበትን ሁኔታ ግለጽ። ሐ) መሪዎች ገንዘቡን ለመውሰድ እንዳይፈተኑ ወይም ምእመናኑ የምጽዋት ገንዘብ እየተበላ ነው ብለው እንዳይጠራጠሩ ምን ዓይነት ለውጥ ሊደረግ ይገባል?

  1. ጳውሎስ ለእግዚአብሔር በምንሰጥበት ጊዜ ምን ዓይነት አመለካከት ሊኖረን እንደሚገባ አስተማረ (2ኛ ቆሮ. 9፡6-15)

«የምንዘራውን ያንኑ መልሰን እናጭዳለን» የሚለው መንፈሳዊ መርህ ከብዙ የሕይወታችን ክፍሎች ጋር ይዛመዳል። የአዘራራችን ሁኔታ (የሰጠነው መጠንና የነበረን አመለካከት) የምናጭደውን ፍሬ ይወስናል። በገላትያ 6፡7-10 የኃጢአት ባሕርያችንን ደስ የሚያሰኙ ነገሮችን ከዘራን ከእግዚአብሔር ዘንድ ፍርድን እንደምናጭድ ተነግሮናል። ጳውሎስ በዚህ ስፍራ በምንዘራው ዘር መጠን ላይ ትኩረት ሰጥቷል። ትንሽ ከዘራን ትንሽ እንሰበስባለን። ብዙ ከዘራን ብዙ እንሰበስባለን። ጳውሎስ የቆሮንቶስ ክርስቲያኖች ለእግዚአብሔር ትንሽ ብቻ ከሰጡ አነስተኛ በረከት እንደሚያገኙ ገልጾአል። ነገር ግን በደስታና በልግስና ቢሰጡ፥ እግዚአብሔር ይባርካቸዋል።

በተጨማሪም፥ እግዚአብሔር በልግስና በሚሰጡት ሰዎች ላይ ጸጋውን እንደሚያዘንብና ፍላጎታቸውን ሁሉ (መንፈሳዊ፥ ቁሳዊና ሥነ ልቡናዊ) እንደሚያሟላላቸው ቃል ገብቷል። ለጋሽ የእግዚአብሔር ልጆች በሰናይ ምግባራት የበለጸጉ ይሆኑ ዘንድ ሁልጊዜም በቂ ሀብት ይኖራቸዋል።

ጳውሎስ እግዚአብሔር ልጆቹ በተሻለ ሕይወት ደስ ይሰኙ ዘንድ በረከትን ለመስጠት ቃል ይገባል አለማለቱን ልብ ማለቱ ጠቃሚ ነው። አንዳንድ ክርስቲያኖች፥ «ለእግዚአብሔር አንድ ነገር ብትሰጠው የበለጠ አድርጎ የመመለስ ግዴታ አለበት። 100 ብር ብትሰጠው 500 ብር ይመልስልሃል» ይላሉ። በዚህ ዓይነት ለእግዚአብሔር መስጠትን ወደ ራስ ወዳድነት ተግባር ይለውጡታል። ጳውሎስ የፈለገው ይህንን ለማለት አልነበረም። ጳውሎስ የጻፈው የእግዚአብሔር ሀብት መልካም አስተዳዳሪ ከመሆን አንጻር ነው። ለእግዚአብሔር በልግስና ብትሰጥ ለበለጠ የሀብት እንክብካቤ ይተማመንብሃል። እግዚአብሔር የበለጠ ትሰጥ ዘንድ ብዙ ሀብት ይሰጥሃል። ጳውሎስ የሚናገረው ቁሳዊ በረከቶችን ስለመቀበል ብቻ ሳይሆን፥ ስለ ጽድቅ መከር ጭምር ነበር። በቸርነት በምንሰጥበት ጊዜ ከእግዚአብሔር ጋር ባለን ጉዞ እናድጋለን። እግዚአብሔርንና መንግሥቱን አስቀድመን ለመሻት እንችላለን። የእግዚአብሔር መንግሥት ሥራ ተካፋዮች መሆናችንን በመገንዘብ ጥልቅ ደስታን እናገኛለን። እነዚህ ሁሉ ለእግዚአብሔር በምንሰጥበት ጊዜ በምላሹ ከምናገኛቸው በረከቶች ጥቂቶቹ ናቸው።

ጳውሎስ አማኞች በልግስናና በደስታ ለእግዚአብሔር በሚሰጡበት ጊዜ ምን እንደሚከሰት አብራርቷል።

ሀ. መስጠት ለእግዚአብሔር ምስጋናንና ውዳሴን ያመጣል። በችግር ላይ ያሉት ሰዎች ስጦታውን በሚቀበሉበት ጊዜ ካንተ ሳይሆን ከእግዚአብሔር እንደመጣ ይነዘባሉ። ለችግራቸው ስለ ደረሰላቸው እግዚአብሔርን ያመሰግኑታል።

ለ. እምነትህ ወሬ ብቻ ሳይሆን በተግባር የሚገለጥ እንደሆነ ታሳያለህ። ጳውሎስ የክርስቶስን ወንጌል ከተቀበላችሁ በኋላ ለምታሳዩት ታዛዥነት ሰዎች እግዚአብሔርን ያከብራሉ ብሏል። እምነታችንን ተግባራዊ ከማድረግ ይልቅ ለክርስቶስ ስለመኖር መናገሩ እንደሚቀል ሁላችንም እናውቃለን። በልግስናና በደስታ በምንሰጥበት ጊዜ በራስ ወዳድነት ወይም የዚህን ዓለም በረከት ለማግኘት እንደማንኖርና በሰማይ ለራሳችን መዝገብን እየሰበሰብን መሆናችንን እናረጋግጣለን (ማቴ. 6፡19-21)።

ሐ. ሌሎች ሊያስታውሱንና ሊጸልዩልን ይጀምራሉ። አንዱ ክርስቲያን ስለ ሌሎች ጉድለት በሚያስብበት ጊዜ የክርስቶስ አካል ይጠናከራል። አሕዛብ ክርስቲያኖች የአይሁድ ክርስቲያኖችን በሚረዱበት ጊዜ በመካከላቸው የነበረው ክፍፍል ይወገድ ነበር። የአይሁድ ክርስቲያኖችም በበኩላቸው ለአሕዛብ ክርስቲያኖች ይጸልዩላቸው ነበር። ክርስቲያኖች በጸሎት መደጋገፋቸው ደግሞ ፍቅርንና አንድነትን ያመጣል።

ጳውሎስ መስጠት ፍቅርን መካፈልና ለሌሎች ጸጋን ማሳየት እንደሆነ በተደጋጋሚ ገልጾአል። ነገር ግን የእግዚአብሔር ዋነኛ የጸጋ መገለጫ ስለሆነው ስለ ኢየሱስ ክርስቶስ «የማይነገር ስጦታ» ሊያስታውሰን ይፈልጋል። እግዚአብሔር ክርስቶስን የሰጠን በማመንታት አልነበረም። ትንሹን ነገር ሳይሆን ካለው ሁሉ የሚበልጠውን ክርስቶስን በደስታ ሰጥቶናል። እኛም በተመሳሳይ መንፈስ ካለን ሁሉ የሚበልጠውን በልግስናና በደስታ ልንሰጥ ይገባል።

የውይይት ጥያቄ፡- ሀ) ስላለፈው ዓመት አስብ። እግዚአብሔር በሕይወትህ የተለያዩ ክፍሎች የልግስና ስጦታን ያሳየው እንዴት ነው? ለ) ለእግዚአብሔር መልሰህ የሰጠኸውን ነገር ግለጽ። ስጦታዎችህ የልግስና፥ የደስታና ከሁሉም የተሻሉ ነበሩ? ለእግዚአብሔር ሥራ ቢያንስ 1/10ኛ ትከፍላለህ? በጸሎት መንፈስ ሆነህ ስጦታዎችህን አስብና እግዚአብሔር አሥራትን እንድትከፍል የሰጠህን ትእዛዝ በደስታ አክብር።

(ማብራሪያው የተወሰደው በ ኤስ.አይ.ኤም ከታተመውና የአዲስ ኪዳን የጥናት መምሪያና ማብራሪያ፣ ከተሰኘው መጽሐፍ ነው፡፡ እግዚአብሔር አገልግሎታቸውን ይባርክ፡፡)

2ኛ ቆሮ. 6፡3-7፡1

  1. መንፈሳዊ መሪ ሰዎች አምነው የሚድኑበትን ዕድል ለመስጠት ሲል በመከራ ይታገሣል (2ኛ ቆሮ. 6፡3-13)።

ጳውሎስ በሕይወቱና በአኗኗሩ ምክንያት ማንም ሰው ከወንጌሉ እንዲያፈገፍግ አልፈለገም ነበር። የሚያከናውነው ተግባር ሁሉ ሰዎች ከክርስቶስ ፊታቸውን መልሰው የኋላ ኋላ ለኩነኔ እንዲጋለጡ የሚያደርግ ሳይሆን፥ ለማመን ሁኔታዎችን የሚያመቻችላቸው እንዲሆን ቆርጦ ነበር። ከዚህም የተነሣ፥

ሀ) ጳውሎስ ሰዎች ወንጌልን ይሰሙ ዘንድ አስፈላጊ የሆነውን መከራ ሁሉ በትዕግሥት ለመቀበል ወሰነ። ይህም ቀጥተኛ ስደትን ወይም የሕይወትን ሸካራ ገጽታዎች (ድካም፥ እንቅልፍ ማጣት፥ ረሃብ፥ ማጣትና የመሳሰሉትን) ያካትት ነበር።

ለ) ማንም ንጹሕ ልብ የለውም ብሎ እንዳይከስሰው ሕይወቱ ሙሉ በሙሉ ንጹሕ እንዲሆን ወሰነ።

ሐ) ጳውሎስ እንደ ቆሮንቶስ ያሉ አንዳንድ ሰዎች በተሳሳተ መንገድ ቢረዱትም፥ የእግዚአብሔር ባሕርያት የሆኑትን ትዕግሥትን፥ ፍቅርን ጽድቅንና እውነትን ይዞ ዘልቋል።

መ) በሕይወቱ ያለፈውን የእግዚአብሔርን ኃይልና በእርሱ በኩል የተከናወኑትን ተአምራቶች በግልጽ እንዲታዩ አድርጓል።

ሠ) ጳውሎስ ሰዎች አገልግሎቱን በሚቀበሉበት ጊዜ (ክብርና፥ መልካም ዘገባ ሲቀርብበት)፥ ወይም በተቃውሞ ተነሣሥተው አገልግሎቱን በሚያጥላሉበት ጊዜ (ውርደት፥ መጥፎ ዘገባ ሲቀርብበት፥ እንደ ግብዝ ሲታይ፥ እንዳልታወቀ ሰው ሲቆጠር) በታማኝነት ማገልገሉን ቀጥሏል።

  1. መንፈሳዊ መሪ ከማያምኑ ሰዎች ጋር ባለመተባበር በንጽሕና ለመመላለስ ይወስናል (2ኛ ቆሮ. 6፡14-7፡1)፡፡

ብዙውን ጊዜ በቤተ ክርስቲያን ውስጥ ችግሮች የሚከሰቱት ጥቂት ሰዎች ብዙዎችን የመበረዛቸው ውጤት ነው። የቆሮንቶስም ቤተ ክርስቲያን ችግር ይኼ ነበር። ጥቂት የሐሰት አስተማሪዎችና ፍላጎታቸው ባለመሳካቱ የተበሳጩ ሰዎች አሉታዊ ተጽዕኖ አሳደሩባቸው። ጳውሎስ ለቆሮንቶስ ክርስቲያኖች ጠንካራ ማስጠንቀቂያ ሰጥቷቸዋል። ለእርሻ እንደ ተዘጋጁ በሬዎች እግዚአብሔርን ከማይከተሉ ሰዎች ጋር መጠመድ አያስፈልጋቸውም ነበር።

በመጽሐፍ ቅዱs ሁሉ የእግዚአብሔር ሕዝቦች ከማያምኑ ወይም መንፈሳዊ ካልሆኑ ክርስቲያኖች ጋር ከመጠን ያለፈ ግንኙነት እንዳያደርጉ ማስጠንቀቂያ ተሰጥቷቸዋል። የዚህ ክፍል ትምህርት የሚያመለክተው ክርስቲያኖች ከዓለማውያን ጋር መጋባት፥ የቅርብ የንግድ ሽርክና መፍጠር ወይም የዓመፅ ሕይወት ከሚመሩ ሌሎች ክርስቲያኖች ጋር የቅርብ ጓደኝነት መመሥረት እንደሌለባቸው ነው። ከእነዚህ ነገሮች አንዱ በሚከሰትበት ጊዜ ክርስቲያኖች ሌሎችን መንፈሳዊ ሕይወት እንዲመሩ ከማበረታታት ይልቅ እንደ ዓለማውያኑ መኖር ይጀምራሉ። ይህም የክርስቲያኑን ምስክርነትና የአገልግሎት ዕድል ያጠፋል።

ክርስቲያኖች ብዙውን ጊዜ እንደ ዓለማውያኑ እየኖሩ ለክርስቶስ ለመመስከር ሲሉ ጓደኝነት ይመሠርታሉ። የዚህ ዓይነቱ እርምጃ ግን ፍሬያማ አይደለም። ክርስቲያኖች እንደ ዓለማውያን በሚመላለሱበት ጊዜ የማብራት ኃይላቸውን ያጣሉ። ጳውሎስ ክርስቲያኖች እግዚአብሔር የሚኖርባቸው ቤተ መቅደሶች መሆናቸውን አመልክቷል። ከዓለማውያን ጋር ሽርክና መፍጠር የተቀደሰውን ነገር እግዚአብሔር ከሚጠላው ጋር እንደማደባለቅ ይሆናል። ክርስቶስን የማይከተሉ ሰዎች የቤልሆር (የሰይጣን ሌላ ስም) ናቸው።

ጳውሎስ የቆሮንቶስ ክርስቲያኖች ከዓለማውያን አካባቢ ፈጽመው እንዲርቁ እያሳሰበ አለመሆኑን መረዳቱ ጠቃሚ ነው። ይህ ለክርስቶስ የመመስከርን ዓላማ ያጠፋዋል። ነገር ግን እሴቶቻቸው፥ ተግባሮቻቸውና የቅርብ ጓደኝነቶቻቸው ከዓለማውያን እንዲለዩ ይፈልጋል። በዚህ ጊዜ ለክርስቶስ መልካም ምስክሮች ይሆናሉ። ጳውሎስ የቆሮንቶስ ክርስቲያኖች ሥጋቸውንም ሆነ ነፍሳቸውን ከሚያጎድፉ ነገሮችና ሰዎች እንዲያነጹ ጠይቋቸዋል።

የውይይት ጥያቄ፡- ሀ) ክርስቲያኖች ከማያምኑ ሰዎች ጋር “ሲጠመዱ” ያየህባቸውን መንገዶች ግለጽ። ለ) ይህ በክርስቲያኑ ሕይወት ላይ ምን አስከተለ? ሐ) ክርስቲያኖች በማያምኑ ሰዎች አመለካከቶችና አኗኗሮች ሳይበረዙ እንዴት መልካም ጓደኝነት ሊመሠርቱ እንደሚችሉ ግለጽ።

  1. ጳውሎስ በቆሮንቶስ ክርስቲያኖች መለወጥ መደሰቱን ገለጸ (2ኛ ቆሮ. 7፡2-16)፡፡

ጳውሎስ ከቆሮንቶስ ክርስቲያኖች ጋር የነበረውን ግንኙነት ለማስተካከል ይፈልግ ነበር። የቤተ ክርስቲያኒቱ መሥራች ሆኖ ሳለ ክርስቲያኖቹ አግልለውት ነበር። ጳውሎስ ሰዎች ሁሉ እንዲድኑና በእምነታቸው እንዲያድጉ ለማገዝ መሰጠቱን ከገለጸ በኋላ የቆሮንቶስ ክርስቲያኖች የአለመተማመንና የጥርጣሬ አመለካከታቸውን አስወግደው እንደገና እንዲወዱትና እንዲያከብሩት ጠይቋል።

በ2ኛ ቆሮንቶስ 7፡5 ጳውሎስ የ2ኛ ቆሮንቶስን መልእክት ከመጻፉ በፊት በቲቶ በኩል ደብዳቤ በጻፈላቸው ጊዜ ከተከሰተው ሁኔታ (2ኛ ቆሮ. 2፡13) ይቀጥላል። ጳውሎስ የቆሮንቶስ ሰዎችን በተመለከተ ቲቶን ለማነጋገር ወደ መቄዶንያ ሄዶ ነበር። ቲቶ በመጨረሻ ላይ ጳውሎስን በመቄዶንያ ባገኘው ጊዜ የቆሮንቶስ ሰዎች ንሥሐ የመግባታቸውን ዜና አበሰረው። ጳውሎስ ክርስቲያኖቹ ከእርሱ ጋር ለመታረቅ በወሰዱት የፍቅርና የንስሐ እርምጃ ከመጠን በላይ ተደሰተ። ይህም ጳውሎስና ቲቶ ቀደም ሲል በነበረው ሸካራ ግንኙነት ምክንያት ከደረሰባቸው ኀዘን እንዲጽናኑ አደረጋቸው። ጳውሎስ አዝኖ በጻፈው መንፈሳዊ ጠንካራ የማሳመኛ ደብዳቤ አማካኝነት እግዚአብሔር የቆሮንቶስ ክርስቲያኖች ንስሐ እንዲገቡ፥ ከጳውሎስ ጋር እንዲታረቁና፥ ይህም ደግሞ ደስታን እንዲፈጥር አድርጓል። በጳውሎስና በቆሮንቶስ ክርስቲያኖች መካከል እውነተኛ እርቅ ተካሄደ።

በክርስቲያኖች መካከል የአሳብ አለመግባባት መከሰቱ የማይቀር ነው። ነገር ግን አማኞች ለእውነተኝነት፥ ለፍቅርና ለአንድነት ሲተጉ፥ የእግዚአብሔርን ፍርድ በመፍራትና ለቃሉ በመታዘዝ በሚመላለሱበት ጊዜ፥ አለመተማመናቸውን አስወግደው በዕርቅና በሰላም ሊኖሩ ይችላሉ። ይህም እግዚአብሔር ሰዎችን የማስታረቅ ኃይል እንዳለው የሚያሳይ ጠንካራ ምስክርነት ይሆናል።

ይህ ዕርቅ እንዴት ተግባራዊ ሊሆን እንደቻለ መገንዘቡ ጠቃሚ ነው። ዕርቁ የተገኘው ጳውሎስ የሕዝቡን ኃጢአት ሸፍኖ «ሁሉም መልካም ነው» በማለቱ አልነበረም። እውነትን በመደበቅና ኃጢአትን በመሸፋፈንም አልነበረም። ነገር ግን ጳውሎስ የመንገዳቸውን ትክክል አለመሆን፥ የተሳሳቱ አመለካከቶቻቸውንና ተግባሮቻቸውን አሳያቸው። መንፈሳዊ ንስሐ ሁልጊዜም ሦስት ነገሮችን ያካትታል። ሀ) የተፈጸመው ነገር በእግዚአብሔር ፊት ስሕተት መሆኑን አምኖ መቀበል፥ 2) መሳሳታችንን በመናዘዝ የእግዚአብሔርንና የበደልነውን ሰው ይቅርታ መጠየቅና 3) በኃጢአታችን እንዳንቀጥል ተግባራችንን መቀየር። ብዙውን ጊዜ ክርስቲያኖች ኃጢአት መፈጸማቸውን በአግባቡ ሳይገነዘቡ ዕርቅን ለማካሄድ ይጥራሉ። መርዙ እስካልወጣ ድረስ እንደማይፈወሰው ቁስል፥ የዚህ ዓይነቱ ዕርቅ ወደ ፈውስ አያመራም። ችግሩ እንደገና ተከስቶ ብዙ ሰዎችን ሊጎዳ ይችላል።

የውይይት ጥያቄ፡- ሀ) በክርስቲያኖች መካከል ስለተፈጸመ የአሳብ አለመግባባት ግለጽ። ለ) አንድ ሰው ኃጢአትን በመሸፋፈን ይህን አለመግባባት ለማስወገድ ሊሞክር የሚችልበትን መንገድ ግለጽ። ሐ) እግዚአብሔር የመሠረተውን መንገድ በመከተል ዕርቅን መፈጸም ስለሚቻልበት መንገድ ግለጽ።

(ማብራሪያው የተወሰደው በ ኤስ.አይ.ኤም ከታተመውና የአዲስ ኪዳን የጥናት መምሪያና ማብራሪያ፣ ከተሰኘው መጽሐፍ ነው፡፡ እግዚአብሔር አገልግሎታቸውን ይባርክ፡፡)

መንፈሳዊ መሪ እግዚአብሔርንና ሰውን ለማስታረቅ የሚሻ የክርስቶስ አምባሳደር ነው (2ኛ ቆሮ. 5፡11-6፡2)።

ጳውሎስ ሰዎችን ለማስደሰት ብሎ ያገለግላል የሚል ወቀሳ ተሰንዝሮበት ነበር። ነገር ግን አንድ ቀን በእግዚአብሔር ፊት ለፍርድ እንደሚቀርብ ከተናገረ በኋላ፥ ጳውሎስ እግዚአብሔርን ብቻ እንደሚፈራ ገልጾአል። ሰውን መፍራት ወይም ሰውን ለማስደሰት መጣር ዘላለማዊ ፍርድ ያስከትልበት ነበር። ተጨማሪ መከራ ቢያስከትልበትም እንኳ ጳውሎስ ለክርስቶስ የሚያበረክተውን አገልግሎት በቅንዓት የቀጠለው ክርስቶስን ለማስደሰት በመፈለጉ ነበር። አንዳንድ የቆሮንቶስ ክርስቲያኖች ጳውሎስ የሚያከናውናቸውን ተግባራት በማየት አእምሮውን ስቷል ብለው ሳያስቡ አልቀሩም። ጳውሎስ ዓለም ዕብደት ነው ብላ በምታስብበት መንገድ እንዲሠራ ያነሣሱትን አንዳንድ ነገሮች ጠቃቅሷል።

ሀ. የክርስቶስ ፍቅር ግድ አለው። ጳውሎስ ራሱን ጨምሮ ክርስቶስ ሰዎችን ሁሉ በመውደዱ ምክንያት በመስቀል ላይ እንደሞተላቸው ያውቅ ነበር። በመንፈሳቸው ሙታን የሆኑት ሰዎች ሕያዋን ሊሆኑ የሚችሉት በክርስቶስ ሞት በማመን ብቻ ነበር። ስለሆነም፥ ምንም እንኳ ይህ መልእክት ሞኝነት ቢመስልም (1ኛ ቆሮ. 1፡18)፥ ለሰዎች ብቸኛው ተስፋቸው ነበር። ጳውሎስም በድፍረት መስበኩን የቀጠለው በዚህ ምክንያት ነበር።

ለ. ጳውሎስ ሰዎችን የተመለከተው ከቤተሰባቸው፥ ከጎሳቸው፥ ከሀብታቸው ወይም ከትምህርታቸው አንጻር በሥጋ ዓይኑ አልነበረም። ነገር ግን ጳውሎስ ሰዎችን የተረዳቸው የዳኑ ወይም ያልዳኑ፥ አዲስ ፍጥረት ወይም አሮጌ ፍጥረት ከመሆናቸው አንጻር ነበር። አንድ ሰው በክርስቶስ ሲያምን ከውስጡ የተለወጠ አዲስ ፍጥረት ይሆናል። መንፈሳዊ ሕይወት ከማግኘቱ በተጨማሪ አስተሳሰቡና አተገባበሩ ሁሉ ይለወጣል። በክርስቶስ ያላመነ ሰው ዘላለማዊ ሞት ያጠላበት ስለሆነ ወንጌሉን መስማት አለበት። ይህም ወንጌል እግዚአብሔር በክርስቶስ ሞት አማካኝነት ዓመፀኛ ኃጢአተኞች ከእርሱ ጋር ሰላምን እንዲያደርጉና የቤተሰቡ አባላት እንዲሆኑ የፈቀደበት ዕርቅ ነው።

ሐ. ጳውሎስ የክርስቶስ አምባሳደር መሆኑን ያውቅ ነበር። አምባሳደር የአንድ ከእርሱ የሚበልጥ ባለሥልጣን ወኪል ነው። የኢትዮጵያ መንግሥት አገሪቱን ለመወከልና ይፋዊ መልእክቶችን ለማስተላለፍ አምባሳደሮችን ወደ ሌሎች አገሮች ይልካል። በተመሳሳይ መንገድ፥ እያንዳንዳችን የክርስቶስ አምባሳደሮች ነን። የነገሥታት ንጉሥ ከሆነው ከክርስቶስ ተቀብለን ለሰው ልጆች የምናስተላልፈው መልእክት ደግሞ «ከእግዚአብሔር ጋር ታረቁ» የሚል ነው። የእግዚአብሔር ጠላቶች ክርስቶስ የኃጢአታቸውን ቅጣት እንደከፈለ በማመን ይታረቃሉ።

የውይይት ጥያቄ፡- ሀ) ብዙ ክርስቲያኖች ስለ ክርስቶስ ለመመስከር የሚያፍሩት ለምንድን ነው? ለ) ጳውሎስ አንዳንዶች ዕብድ ነው ብለው እስኪጠራጠሩት ድረስ ወንጌሉን ለማካፈል ስላደረገው ጥረት ከሰጠው ማብራሪያ ምን እንማራለን?

(ማብራሪያው የተወሰደው በ ኤስ.አይ.ኤም ከታተመውና የአዲስ ኪዳን የጥናት መምሪያና ማብራሪያ፣ ከተሰኘው መጽሐፍ ነው፡፡ እግዚአብሔር አገልግሎታቸውን ይባርክ፡፡)

መንፈሳዊ መሪ ወደፊት ዘላለማዊ ሽልማት እንደሚያገኝ ስለሚተማመን በአገልግሎቱ ይጸናል (2ኛ ቆሮ. 4፡13-5፡10)።

ጳውሎስ መከራ መቀበልን ይወድ ነበር? አይወድም። እንግዲያው ነገሮች አስቸጋሪ ሲሆኑበት፥ የቆሮንቶስ ክርስቲያኖችና ሌሎችም ሲቃወሙት፥ ስሙን ሲያጎድፉ፥ ዓለም ስታሳድደው ለምን አገልግሎቱን አላቋረጠም? የዚህ ምሥጢሩ ጳውሎስ ዓይኖቹን ከሞት በኋላ በሚሆነው ሁኔታ ላይ ማኖሩ ነው።

ሀ. ጳውሎስ ቢሞትም እንኳ እንደሚነሣ ስለሚያውቅ መከራን እየተጋፈጠ ወንጌሉን ሰብኳል (2ኛ ቆሮ. 4፡13-15)። ሞትን ስለማይፈራ ከመሰከርህ ትሞታለህ ቢባል እንኳ አገልግሎቱን አያቋርጥም ነበር። ከዚህም የተነሣ ወንጌሉ እንደ ቆሮንቶሳውያን ላሉ ሰዎች በመዝለቅ ወደ ዘላለማዊ ሕይወት መርቷቸዋሉ።

ለ. ጳውሎስ ከሞት በኋላ አንድ ታላቅ ነገር እንደሚጠብቀው በማወቁ መከራን እየተጋፈጠ ወንጌሉን ሰብኳል (2ኛ ቆሮ. 4፡16-18)። ጳውሎስ ሥጋው እየደከመ መሄዱንና ስደቱም ዘመኑን በፍጥነት እያሳጠረው መሆኑን ተረድቶ ነበር። ይህ ግን አላሳሰበውም። ምክንያቱም ጳውሎስ ለክርስቶስ ታማኝ በመሆኑ በየዕለቱ በመንፈሱ እየታደሰ ስለነበረ ነው። ሲሞትም ከክርስቶስ ታላቅ ዘላለማዊ ሽልማት እንደሚጠብቀው ያውቅ ነበር። እንዲያውም ምድራዊ መከራዎች ያንን ሰማያዊ ክብር ይጨምራሉ።

ሐ. ጳውሎስ ሞት ወደሚወደው ጌታ እንደሚወስደው በማወቁ በወንጌል አገልግሎቱ ቀጥሏል (2ኛ ቆሮ. 5፡1-9)። ጳውሎስ ምድራዊ ሥጋውን ለለቅሶ ከሚተከል ድንኳን ጋር አነጻጽሯል። የለቅሶ ድንኳን ለጥቂት ቀናት ከቆየ በኋላ ይነሣል። ዘላለማዊ ሕይወቱን በሰማይ ከሚገኝ ዘላለማዊ ቤት ጋር አነጻጽሯል። ጳውሎስ ከድንኳን ጋር ባነጻጸረው ሥጋው ውስጥ ቢኖርም፥ ዘላለማዊ ማደሪያውን ይናፍቃል። በምድራዊ ድንኳን፥ መከራ፥ በሽታ፥ ሥቃይና የመሳሰሉት ይፈራረቃሉ። በሰማያዊ ቤት ግን ይህ ሁሉ አይኖርም። ጳውሎስ ደስ ከተሰኘባቸው የመንፈስ ቅዱስ አገልግሎቶች አንዱ መንፈስ ቅዱስ ወደፊት ለሚመጣው በረከት መያዣ መሆኑ ነበር። መንፈስ ቅዱስ በልቡ ውስጥ ሆኖ ጳውሎስ አንድ ቀን ከዘላለማዊ ቤቱ እንደሚደርስ ያረጋግጥለታል። ከበሽታም ሆነ ከስደት የተነሣ የሚደርስበት ሞት ከድንኳኑ አውጥቶ ወደ ቤቱ እንደሚወስደው መገንዘቡ፥ ጳውሎስ በብዙ መከራ መካከል ለእግዚአብሔር በታማኝነት እንዲያገለግል ረድቶታል።

መ. ጳውሎስ እግዚአብሔር በሰውነቱ ውስጥ ላስቀመጠው የወንጌል መዝገብ ባለአደራነት አንድ ቀን ኢየሱስ ክርስቶስ በኃላፊነት እንደሚጠይቀው ስለሚያውቅ ወንጌሉን በታማኝነት ማካፈሉን ቀጥሏል (2ኛ ቆሮ. 5፡10)። በቆሮንቶስ ወንጀለኞች ለፍርድ የሚቀርቡበት ትልቅ የድንጋይ ችሎት ነበር። ይህ ስፍራ አትሌቶች ውድድራቸውን በአሸናፊነት በሚጨርሱበት ጊዜ የክብር ሽልማት የሚቀበሉበትም ነበር። ጳውሎስ ሁላችንም በታላቁ ዳኛ በኢየሱስ ክርስቶስ ፊት እንደምንቀርብ ተናግሯል። ክርስቲያኖች ላይ ፍርድ የሚሰጠው ክርስቲያን ስለመሆናቸውና ስላለመሆናቸው ሳይሆን በሥጋ ሳሉ ለፈጸሟቸው ተግባራት ነው። ምንም እንኳ ሥጋ የሚጠፋ ድንኳን ቢሆንም፥ እግዚአብሔር የከበረ ዕቃውን ያኖረበት ነው። ስለሆነም፥ የክብር ዕቃውን የምናስተናግድበትና ሕይወታችንን የምንመራበት ሁኔታ ዘላለማዊ አስከትሎት ይኖረዋል። (እግዚአብሔርን የሚያሳስበው የመንፈሳችን ጉዳይ ስለሆነ በሥጋችን እንዳሻን ልንሆን እንችላለን የሚሉ አንዳንድ ክርስቲያኖች አሉ። ከዚህም የተነሣ ብዙዎች ዝሙትንና ሌሎች ኃጢአቶችን ይለማመዳሉ። ጳውሎስ በዚህ ስፍራ በሥጋችን የምንፈጽመው ተግባር ዘላለማዊ ጠቀሜታ እንዳለው ገልጾአል።) 21ኛ ጥያቄ ሀ) ሁልጊዜም ዋናው ነገር ዘላለማዊ ቤታችን እንጂ ጊዜያዊ ድንኳናችን እንዳልሆነ ብታስታውስ ሕይወትህና አገልግሎትህ እንዴት እንደሚለወጥ ግለጽ። ለ) በሥጋህ ለፈጸምሃቸው ነገሮች ሁሉ ተጠያቂ መሆንህን ብታውቅ አገልግሎትህና ሕይወትህ እንዴት ይለወጣል? ሐ) በክርስቶስ ፊት በምትቆምበት ጊዜ የምታፍርባቸውን ነገሮች ያሳይህ ዘንድ መንፈስ ቅዱስን ጠይቅ። ስለ እነዚህ ነገሮች ንስሐ ግባና በዚያን ጊዜ ከማፈር ይልቅ በምትከብርበት መንገድ ለመኖር ቁርጥ ውሳኔ አድርግ።

(ማብራሪያው የተወሰደው በ ኤስ.አይ.ኤም ከታተመውና የአዲስ ኪዳን የጥናት መምሪያና ማብራሪያ፣ ከተሰኘው መጽሐፍ ነው፡፡ እግዚአብሔር አገልግሎታቸውን ይባርክ፡፡)

በሸክላ ውስጥ የተቀመጠ ክቡር ዕቃ (2ኛ ቆሮ. 4፡1-12)

ንጋቱ ከአንድ ከታወቀ የመጽሐፍ ቅዱስ ኮሌጅ ተመርቆ የአንዲት ታላቅ ቤተ ክርስቲያን መጋቢ ሆነ። ንጋቱ በትምህርቱ ስለሚኩራራ ኮሌጅ ውስጥ የተማረውን የግሪክና የዕብራይስጥ ቋንቋ ለጉባኤው በማቅረብ ልታይ ባይነትን ያበዛ ነበር። ንጋቱ ይበልጥ እውቅና እያገኘ ሲሄድ የቤተ ክርስቲያኒቱ ሽማግሌዎች የሚያቀርቡትን አሳብ መቀበሉን አቆመ። ብዙ ገንዘብና ሥልጣን ለማግኘት ሲል የተለያዩ ተግባራትን አከናወነ። አብዛኞቹ የቤተ ክርስቲያኒቱ አባላት ስሜታዊና ሞቅ ያሉ ስብከቶችን እንደሚወዱ በመገንዘቡ፥ በእግዚአብሔር ቃል እውቀታቸው እንዲያድጉ ከመጣር ይልቅ የሚያስደስታቸውን ትምህርት ብቻ ያቀርብላቸው ጀመር።

የውይይት ጥያቄ፡- ንጋቱ በተግባራቱ የገለጻቸው አንዳንድ የአገልግሎት መነሣሻ ምክንያቶች ምን ምንድን ናቸው?

ንጋቱ ሰይጣን ብዙውን ጊዜ የቤተ ክርስቲያን መሪዎችን ለማጥመድ ከሚጠቀምባቸው ፈተናዎች በአንዱ ተጠመደ። እግዚአብሔር የሰጠውን አገልግሎት ሰዎችን ለማስደነቅ፥ ምሁርነቱን ለማሳየት፥ ሀብትና ሥልጣን ለማግኘትና ሰዎችን ለማስደሰት ተጠቀመበት። ወደ ቆሮንቶስ የመጡት የሐሰት አስተማሪዎች በጳውሎስ ላይ ያቀረቡት ክስ እንዲህ ዓይነት ነበር። ስለሆነም ጳውሎስ የእውነተኛ አገልጋይ አመለካከትና ተግባራት ምን ዓይነት መሆን እንዳለባቸው ይዘረዝራል።

በቆሮንቶስ ቤተ ክርስቲያን ውስጥ የሚገኙ የሐሰት አስተማሪዎች ጳውሎስ ሐዋርያነቱን ለግል ጥቅም ማካባቻ እየተገለገለበት መሆኑን በመግለጽ የከሰሱት ይመስላል። ጳውሎስ የሚያገለግለው ሥልጣን፥ ክብርንና ገንዘብን ለማግኘት ነው እያሉ ሲያወሩ አልቀሩም። ጳውሎስ ለዚህ ምላሽ በመስጠት ስለ አገልግሎት የተማራቸውን አንዳንድ እውነቶችና በመሪነቱ ተጨማሪ ችግሮች እየደረሱበት እንኳን ለምን ወደኋላ እንዳላፈገፈገ ያብራራል።

ሀ. አገልግሎት የሚመነጨው ከሰው ምርጫ ሳይሆን ከእግዚአብሔር ጥሪ ነው (2ኛ ቆሮ. 4፡1)። ጥሪው የሚመጣው በእግዚአብሔር ምሕረት እንጂ ግለሰቡ የተማረ፥ በመሪዎች የተመረጠ፥ የወንጌላዊ ልጅ ወይም ለሥራው የተቀጠረ በመሆኑ አይደለም። አንድ የቤተ ክርስቲያን መሪ በእግዚአብሔር መጠራቱንና መሪነቱ የተሰጠውም በብቃቱ ሳይሆን በእግዚአብሔር ምሕረት መሆኑን ማወቅ አለበት። መሪው እግዚአብሔር ለአገልግሎቱ በኃላፊነት እንደሚጠይቀው ካላወቀ አገልግሎቱን ለራሱና ለቤተሰቡ ጥቅም ሊያውለው ይችላል። አንድ አገልጋይ አገልግሎቱን ከእግዚአብሔር እንደተቀበለና የሚያግዘውም እርሱ እንደሆነ በሚያስታውስበት ጊዜ ከፍተኛ መከራ ቢደርስበት እንኳን ተስፋ አይቆርጥም።

ለ. አንድ አገልግሎት እግዚአብሔርን ሊያስከብር እንዲችል በትክክለኛ ልብና አስተሳሰብ መካሄድ ይኖርበታል (2ኛ ቆሮ. 4፡2-6)።

  1. የእግዚአብሔር መሪዎች በፍጹም ታማኝነትና እውነተኛነት መሥራት ይኖርባቸዋል። መሪው ሌሎች ሰዎች ቢያውቁት የሚያፍርበት ምሥጢር ወይም ድርጊት ሊኖረው አይገባም። መሪው ሰዎችን በማታለልና በማስገደድ የራሱን ፈቃድ እንዲፈጽሙ ለማድረግ አገልግሎቱን መጠቀሚያ ማድረግ የለበትም። ጳውሎስ ሕይወቱ ማንንም በማያሳፍር መንገድ ግልጽ እንዲሆን ይፈልጋል። ሌሎች ክርስቲያኖችም ሆኑ ከሁሉም በላይ ክርስቶስ እንዲያፍርበት አልፈለገም።
  2. አገልግሎት የእግዚአብሔርን ቃል በግልጽ በማቅረብ ሊካሄድ ይገባል። ጳውሎስ የእግዚአብሔርን ቃል በተሳሳተ መንገድ ለመተርጎም አልፈለገም። የእግዚአብሔርን ቃል በአግባቡ ለማስተላለፍ አንድ የቤተ ክርስቲያን መሪ ሊያውቃቸው የሚገቡ አያሌ ነገሮች አሉ።

በመጀመሪያ፥ የሚናገረው ትክክል ይሆን ዘንድ የእግዚአብሔርን ቃል ማወቅ አለበት። ብዙ የቤተ ክርስቲያን መሪዎች በሚገባ ባለመዘጋጀታቸውና ባለመረዳታቸው ምክንያት የእግዚአብሔርን ቃል ለመስበክ በሚሞክሩበት ጊዜ ያበላሹታል።

ሁለተኛ፥ የቤተ ክርስቲያን መሪው ቃሉ የራሱ ሳይሆን የእግዚአብሔር እንደሆነ ማስታወስ አለበት። የቤተ ክርስቲያን መሪው ሰዎችን በእውቀቱ ለማስደነቅ ከመሞከር ይልቅ የእግዚአብሔርን ቃል ሁሉም ሰው በሚረዳው መንገድ ለማቅረብ መጣር አለበት። የተማሩት ሰዎች ብቻ ሳይሆኑ ምእመናኑም ቃሉን መረዳት ይኖርባቸዋል።

ሦስተኛ፥ የቤተ ክርስቲያን መሪው ሰዎችን ለማስደሰት ሳይሆን ሕይወታቸውን ለመለወጥ ብሎ መስበክ አለበት። የሰዎችን ሕይወት የሚለውጠው ግልጽ የሆነ የእግዚአብሔር ቃል ትምህርት ነው። አንድ ሰው የዚህ ዘመን አለቃ በሆነው ሰይጣን ተቆጣጣሪነት ምክንያት ለማመን ባለመፈለጉ እንጂ በትምህርቱ አስቸጋሪነት ምክንያት ወንጌሉን ሳይረዳ መቅረት የለበትም።

አራተኛ፥ ሰባኪው ስለ ራሱ ወይም ስላከናወናቸው ተግባራት ታላቅነት ሳይሆን ስለ ክርስቶስ ማሰብ አለበት። ብዙውን ጊዜ ሰባኪያን በራሳቸው ላይ በማተኮር ስላከናወኑት ተግባራትና ስለ ሌሎች ነገሮች ይናገራሉ። ጳውሎስ ግን በክርስቶስ ላይ ብቻ በማተኮር ለሌሎች ስለ ጌትነቱ ለማስተማር ቆረጠ። ጨለማ በዋጠው ዓለም ውስጥ ብርሃንን የሚፈነጥቀው ስለ ክርስቶስ የሚሰጥ ትምህርት ብቻ ነው።

አምስተኛ፥ ጳውሎስ ራሱን የሚመለከተው ሰዎች የእግዚአብሔርን ቃል ሰምተው በእምነታቸው ያድጉ ዘንድ ለቤተ ክርስቲያን እንደተሰጠ የክርስቶስ ባሪያ ነበር። ራሱን ሥልጣንና ክብር እንዳለው ታላቅ መሪ አድርጎ አይመለከትም ነበር።

የውይይት ጥያቄ፡- እግዚአብሔር ሁላችንም በቤተ ክርስቲያን ውስጥ በተለያዩ መንገዶች እንድናገለግል ጠርቶናል። ሀ) ስለ አገልግሎት እነዚህን እውነቶች ማስታወስ ያለብን ለምን እንደሆነ አስረዳ? ላ) የቤተ ክርስቲያን መሪዎች እነዚህን እውነቶች በመዘንጋት ችግሮችን የሚፈጥሩባቸውን ሁኔታዎች በምሳሌዎች አስረዳ።

ሐ. በእግዚአብሔር መንገድ የተካሄደ አገልግሎት ሥቃይ ቢኖርበትም እንኳ ድልን ያስገኛል (2ኛ ቆሮ. 4፡7-12)። ብዙውን ጊዜ ጳውሎስ ፈተና ያልገጠመው ታላቅ መንፈሳዊ ጀግና እንደሆነ እናስባለን። ጳውሎስ የእርሱም ሆነ የሌሎች አገልግሎት መገፋትን፥ መጨነቅን፥ መሰደድን፥ መውደቅንና መገለልን እንደሚያካትት ገልጾአል። ጳውሎስ የከፍተኛ ስደት ቁስሎች ደርሰውበታል። እነዚህም የሞት ምልክቶች ነበሩ። ጳውሎስ ብዙ ጊዜ በአገልግሎቱ ወደ ሞት እየቀረበ ሕይወቱን ለአደጋ አጋልጧል። ይህንንም ያደረገው ለግል ጥቅሙ ሳይሆን ሌሎች ወንጌሉን ሰምተው እንዲድኑ ነበር።

ጳውሎስ እግዚአብሔር ከእነዚህ ችግሮች ሁሉ ሊያድነው እየቻለ በመከራ ውስጥ እንዲያልፍ እንደፈቀደ ያውቅ ነበር። ስለ አገልግሎት አስደናቂው እውነት ብዙውን ጊዜ እግዚአብሔር መከራን እንድንቀበል መፍቀዱ ነው። ጳውሎስ ሕይወቱን ከውኃ መቅጃ እንስራ ጋር ያነጻጽራል። ትንሽ ነገር ቢነካው እንስራው ይሰበርና ውኃው ይፈሳል። እግዚአብሔር የወንጌሉን «መዝገብ» በደካማ የሰው ሰውነት ውስጥ አስቀምጧል። ለምን? ለምን በማይሰበር የብረት ዕቃ ውስጥ አላስቀመጠም? እግዚአብሔር አንድ ውጤታማ ተግባር የሚከናወነው በእርሱ ኃይል እንጂ በእኛ ልዩ ብቃት እንዳልሆነ እንድናስተውል ይፈልጋል። ስለሆነም፥ ብዙ መከራ ብንቀበል እንኳ ይህ በሕይወታችን ውስጥ የሚከሰተው አስደናቂ ኃይልና ሁሉንም የሚያልፈው ብርታት ከእግዚአብሔር እንጂ ከእኛ እንዳልመጣ ለሰዎች ሁሉ ይታወቃል። ይህ ኃይል በሚኖርበት ጊዜ እንደማንወድቅ፥ እንደማንጨነቅ፥ እንደማንተውና እንደማንጠፋ እናውቃለን።

የውይይት ጥያቄ፡- ሀ) እግዚአብሔርን በማገልገል ምክንያት መከራ የተቀበልህባቸውን መንገዶች ግለጽ። ለ) ለክርስቲያን አገልጋይ ሁላችንም እግዚአብሔር የወንጌሉን መዝገብ ያስቀመጠብን የሸክላ ዕቃ መሆናችንን ማስታወስ የሚያስፈልገው ለምንድን ነው?

(ማብራሪያው የተወሰደው በ ኤስ.አይ.ኤም ከታተመውና የአዲስ ኪዳን የጥናት መምሪያና ማብራሪያ፣ ከተሰኘው መጽሐፍ ነው፡፡ እግዚአብሔር አገልግሎታቸውን ይባርክ፡፡)

መንፈሳዊ መሪ ለአዲሱ ኪዳንና ለእግዚአብሔር የማስቻል ኃይል አጽንኦት ይሰጣል (2ኛ ቆሮ. 2፡14-3፡18)።

ጳውሎስ ወደ በኋላ ቲቶን አግኝቶ ስለ ቆሮንቶስ ክርስቲያኖች ንስሐና የአመለካከት ለውጥ ስለመስማቱ ይናገራል። ይህ የልብ ለውጥ የጳውሎስን ልብ በደስታ ሞላው (2ኛ ቆሮ. 7፡5-16)። ከቆሮንቶስ ክርስቲያኖች ጋር ስለነበረው ግንኙነት ማሰብ ሲጀምር አእምሮው እግዚአብሔርን ስለማገልገሉ አስደናቂ ምሥጢር ያስብ ጀመር። ስለሆነም፥ ከ2ኛ ቆሮ. 2፡14 እስከ 2ኛ ቆሮ. 7፡1 ድረስ ጳውሎስ ስለ አገልግሎቱና እግዚአብሔር በመሪዎች ሕይወት ውስጥ ስለሚያከናውናቸው ተግባራት የተለያዩ ነገሮችን ያብራራል።

ሀ. በቤተ ክርስቲያን ውስጥ የትኛውም ዓይነት ድልና ዕድገት ሊገኝ የሚችለው ከእግዚአብሔር ሥራ የተነሣ ነው (2ኛ ቆሮ. 2፡14-16)። ጳውሎስ ይህንኑ አሳብ ለማብራራት ስለ ሮም ጀኔራል የሚያስረዳ ምሳሌ ተጠቅሟል። ጀኔራሉ በጦርነት በሚያሸንፍበት ጊዜ በወታደሮቹና በምርኮኞቹ ታጅቦ ከጦር ሜዳ በፈረስ ይመለሳል። የቤተ ክርስቲያን አገልጋዮች ጀኔራል የሆነው ክርስቶስ ሁልጊዜም ባሪያዎቹንና ቤተ ክርስቲያንን በድል ይመራል። ብዙውን ጊዜ ጄኔራሉ ወደ ከተማ በሚገባበት ጊዜ ዕጣን ያጥኑለት ነበር። በተመሳሳይ ሁኔታ የክርስቶስ ወታደሮች (ክርስቲያኖች) ለክርስቶስ በሚሠሩበት ጊዜ እንደ ዕጣን የሚያውድ መዓዛ ይረጫሉ። ወንጌሉን ሰምተው ለሚድኑ ሰዎች የዘላለምን ሕይወት መዓዛ እናውዳለን። ወንጌሉን ሰምተው ለማመን ለማይፈልጉ ሰዎች ግን የሞትን መዓዛ እናውዳለን። የሞት ምርኮኞች ብዙውን ጊዜ እንደሚገደሉ ሁሉ የማያምኑ ሰዎችም የዘላለምን ሞት ይጋፈጣሉና።

የውይይት ጥያቄ፡- ሀ) በማኅበረሰብህ ውስጥ የሕይወትና የሞት መዓዛ የምትሆንባቸውን መንገዶች ግለጽ። ለ) ያ መዓዛ ሊበላሽ የሚችልባቸውን መንገዶች ግለጽ።

ለ. ማንም ሰው የራሱን ጥበብና ችሎታ በመጠቀም ድል ሊነሣና ሌሎችን ወደ እግዚአብሔር መንግሥት ሊመራ አይችልም። ይህንን ሊያደርግ የሚችለው እግዚአብሔር ብቻ ነው (2ኛ ቆሮ. 2፡16)፡፡

ሐ. በመንፈሳዊ ጦርነት ለክርስቶስ የሚዋጉ ሰዎች ንጹሕ ልብ ይዘው መዝለቃቸው በጣም አስፈላጊ ነው። የምንዋጋው ለራሳችን ሳይሆን ራሱ እግዚአብሔርን በመወከል ስለሆነ፥ ወንጌሉን በእውነትና በታማኝነት መስበክ እለብን (2ኛ ቆሮ.2፡17)። ምናልባትም ጳውሎስ ይህንን የተናገረው በቆሮንቶስ የተለየ የአገልግሎት እመለካከት የያዙ መሪዎች ወይም የሐሰት አስተማሪዎች እንደነበሩ ለማመልከት ይሆናል። እነዚህ ሰዎች ከወንጌል አገልግሎት የተነሣ በሚያገኙት ገንዘብና ክብር ላይ ያተኩሩ ነበር። ወንጌሉን እንዳሻቸው በመጠምዘዝ ከእግዚአብሔር መልእክት ይልቅ ለሰዎች ጆሮ እንደሚጥም አድርገው ያቀርቡ ነበር።

የውይይት ጥያቄ፡- ሀ) የቤተ ክርስቲያን መሪዎችና ወንጌላውያን በሰይጣን ወጥመድ ተይዘው የተሳሳቱ ምክንያቶችን ሊያገለግሉ የሚችሉባቸውን መንገዶች ግለጽ። ለ) የቤተ ክርስቲያን መሪ ከሆንህ በጸሎት መንፈስ ሆነህ የአገልግሎት መነሻ ምክንያትህን መርምር። ሰይጣን አነሣሽ ምክንያቶችህን አበላሽቶ እንደሆነ ለማወቅ ልብህን መርምር። እንደዚያ ከሆነ፥ በጸሎት የእግዚአብሔርን ይቅርታ ጠይቅ። ካልሆነ፥ እግዚአብሔርን ስለጠበቀህ አመስግነውና በሙሉ ልብህ እርሱን የምትከተልበትን ጥበብ እንዲሰጥህ ጠይቅ።

መ. የጳውሎስ የሁለተኛው የወንጌል መልእክተኝነት ጉዞ ምስክርነት ውጤት፥ አስፈላጊዎቹ የደብዳቤ ማስተዋወቂያዎች ራሳቸው የቆሮንቶስ ክርስቲያኖች ነበሩ (2ኛ ቆሮ. 3፡1-3)። አንዳንድ የሐሰት አስተማሪዎች ከታዋቂ መሪዎች ወይም ከኢየሩሳሌም ቤተ ክርስቲያን የድጋፍ ደብዳቤ ይዘው በመምጣት እውነተኞቹ የቤተ ክርስቲያን ተወካዮች መሆናቸውን ሳይናገሩ አልቀሩም። (የኢየሩሳሌሟ ቤተ ክርስቲያን ቀደም ሲል ለጳውሎስ እንዲህ ዓይነት ደብዳቤ ሰጥታ ነበር- የሐዋ. 5፡23-29 አንብብ።) ነገር ግን ጳውሎስ በብጣሽ ወረቀት ወይም በሰዎች ድጋፍ ላይ አልተደገፈም ነበር። ነገር ግን እግዚአብሔር በመንፈስ ቅዱስ አማካኝነት በሕይወቱ ውስጥ በመሥራቱ ሰዎች በክርስቶስ አምነው ዳኑ። ጳውሎስ የፈለገው የእግዚአብሔር ተቀባይነትና ማረጋገጫ ይኸው ብቻ ነበር። የቆሮንቶስ ክርስቲያኖች በክርስቶስ ማመን እግዚአብሔር ብዕር አንሥቶ በልባቸው ውስጥ ጳውሎስ አገልጋይ እንደሆነ የጻፈላቸው ያህል ነበር። ጳውሎስ ማንኛውንም ዘላቂ ተግባር ሊፈጽም የሚችለው እግዚአብሔር እንደሆነ ስለሚያውቅ፥ በራሱ ችሎታና ስሜት ላይ አልተደገፈም ነበር። እንደ ጳውሎስ ያሉትን ሰዎች በስጦታ ሞልቶ የተጠቀመባቸው ራሱ እግዚአብሔር ነበር።

ሠ. ጳውሎስ ከብሉይ ኪዳን ሕግጋት ይልቅ እጅግ በሚልቀው በአዲስ ኪዳን ላይ ትኩረት ሰጥቷል (2ኛ ቆሮ. 3፡4-18)። አይሁዳውያን የነበሩት የሐሰት አስተማሪዎች በብሉይ ኪዳን ሕግጋት ላይ በማተኮር የቆሮንቶስን ክርስቲያኖች ግራ ሳያጋቡ አልቀሩም። ሙሴንና ብሉይ ኪዳንን በመጥቀስ ሰዎች በዚያ ዓይነት ሕይወት ሊመላለሱ እንደሚገባ አስተማሩ። ይህም ጳውሎስ አሮጌውንና አዲሱን ኪዳን እንዲያነጻጽር አነሣሣው።

  1. ሞትን ያስከተለው ብሉይ ኪዳን በድንጋይ ላይ ነበር የተጻፈው። ከእግዚአብሔር ዘንድ በሙሴ በኩል ስለተላለፈ በክብር ነበር የመጣው። ይህ ኪዳን በክብር ቢመጣም (ሙሴ ከእግዚአብሔር ጋር በተገናኘ ጊዜ ፊቱ እንዳንጸባረቀው)፥ ከጊዜ ወደ ጊዜ እየደበዘዘ መጥቷል። የተመለከቱት ክብር የሌሎቹን አይሁዶች ልብ ሊለውጥ አልቻለም ነበር። ይህን ክብር በመፍራታቸው ምክንያት ሙሴ ፊቱን እንዲሸፍን ጠየቁት። እግዚአብሔር በሙሴ በኩል የሰጣቸውን ሕግጋት ከመጠበቅ ይልቅ በልባቸው ውስጥ ያለማመንን መጋረጃ አኖሩ። ጳውሎስ አሁንም አብዛኞቹ አይሁዶች በዚህ መጋረጃ ተሸፍነው በክርስቶስ ከማመን እንደራቁ ገልጾአል።
  2. አዲስ ኪዳን የዘላለምን ሕይወት ያመጣል። ይህ ኪዳን በድንጋይ ላይ ሳይሆን በእያንዳንዱ ክርስቲያን ልብ ውስጥ ተጽፎአል። ክብሩም የሚደበዝዝ ሳይሆን እያደገ የሚሄድ ነው፡፡ ለደኅንነታቸው ወደ ክርስቶስ ለሚመለከቱ ሰዎች ያለማመን መጋረጃ ተወስዶላቸዋል። ራሳቸው የሚፈልጉትን ሳይሆን እግዚአብሔር የሚፈልግባቸውን እንዲሆኑ የሚረዳ መንፈስ ቅዱስ ተሰጥቷቸዋል። ከክርስቶስ ጋር ስንዛመድና ስለ እርሱ ባለን እውቀት ስናድግ፥ እኛም የክርስቶስን ክብር እናንጸባርቃለን። የእግዚአብሔር ክብር በእኛ ሕይወት ውስጥ አይደበዝዝም፤ ነገር ግን ክርስቶስን እንመስል ዘንድ ሕይወታችንን ይለውጠዋል። ምንም እንኳን ሁልጊዜ ኃጢአት መሥራታችን ባይቀርም ስንሞትና ከርስቶስን ስንመለከት፥ እርሱን እንደምንመስል ተነግሮናል (1ኛ ዮሐ 3፡2)።

የውይይት ጥያቄ፡- ጳውሎስ ከውጫዊ ነገሮች ይልቅ በልባችን ውስጥ ስላለው ስለ ክርስቶስ ስውር ክብር ይናገራል። ሀ) ብዙውን ጊዜ እንደ ጳውሎስ እግዚአብሔር የሰዎችን ውስጣዊ ሕይወት በመለወጥ ከርስቶስን እንዲመስሉ ከሚያደርግበት ሁኔታ ይልቅ እንደ ሐሰት አስተማሪዎቹ በውጫዊ ነገሮች ላይ የምናተኩረው እንዴት ነው? ለ) ለእግዚአብሔር አስፈላጊ የሆኑና ክርስቶስን በመምሰል ማደጋችንን የሚያሳዩ አንዳንድ ውስጣዊና ድብቅ ነገሮች ምን ምንድን ናቸው?

(ማብራሪያው የተወሰደው በ ኤስ.አይ.ኤም ከታተመውና የአዲስ ኪዳን የጥናት መምሪያና ማብራሪያ፣ ከተሰኘው መጽሐፍ ነው፡፡ እግዚአብሔር አገልግሎታቸውን ይባርክ፡፡)