ምዕራፍ 22፡15-46 — ፈታኝ ጥያቄዎች

ምልከታ እና ትርጓሜ

ጌታ ኢየሱስ ክርስቶስ በመጨረሻው ሳምንት በኢየሩሳሌም ቤተ መቅደስ እያስተማረ ሳለ፣ ተቃዋሚዎቹ በተለያዩ ጥያቄዎች ሊያጠምዱትና በንግግሩ ሊይዙት ተባበሩ። ይህ ክፍል ጌታ ከሦስት የተለያዩ ወገኖች ማለትም ከፈሪሳውያን፣ ከሰዱቃውያንና ከሕግ መምህራን የቀረቡለትን ፈታኝ ጥያቄዎች እንዴት በመለኮታዊ ጥበብ እንደመለሰና በመጨረሻም እርሱ ማንነቱን የሚገልጥ ጥያቄ በማቅረብ አፋቸውን እንዴት እንዳስዘጋቸው ያሳያል።

ለቄሣር የሚገባውና ለእግዚአብሔር የሚገባው

መጀመሪያ ፈሪሳውያንና የሄሮድስ ወገኖች ተባብረው መጡ። እነዚህ ሁለት ወገኖች በፖለቲካ የማይስማሙ ቢሆኑም ኢየሱስን ለመቃወም ግን አንድ ሆኑ። “ለቄሣር ግብር መስጠት ተፈቅዷልን?” የሚል ጥያቄ አቀረቡ። “አዎ” ቢል ሕዝቡ እንደ ባንዳ ይቆጥረዋል፣ “አይደለም” ቢል ደግሞ በሮም መንግሥት ላይ እንደማመጽ ይቆጠርበታል። ጌታ ግን ግብዝነታቸውን አውቆ በዲናሩ ላይ ያለው መልክ የማን እንደሆነ ጠየቀ። “የቄሣር ነው” ባሉት ጊዜ፣ “የቄሣርን ለቄሣር የእግዚአብሔርንም ለእግዚአብሔር አስረክቡ” አላቸው።

ይህንን በምሳሌ ለመረዳት ያህል፦ ዲናሩ የቄሣር መልክ ስላለበት ለቄሣር መሰጠት እንዳለበት ሁሉ፣ የሰው ልጅ ደግሞ በእግዚአብሔር መልክ ስለተፈጠረ ሙሉ ሕይወቱን ለእግዚአብሔር ማስረከብ አለበት። ጌታ በዚህ መልሱ በምድራዊ መንግሥት ሥር ያለብንን ግዴታና ለእግዚአብሔር ያለብንን ፍጹም ታማኝነት ለይቶ አስተማረን።

የሙታን ትንሣኤና የሕያዋን አምላክ

 ቀጥሎም ትንሣኤ የለም የሚሉ ሰዱቃውያን መጡ። ሰባት ወንድሞችን አግብታ ስለሞተች ሴትና በትንሣኤ ቀን የማን ሚስት እንደምትሆን የሚገልጥ ውስብስብ ታሪክ አቀረቡ። ጌታ ግን ስህተታቸውን ሲያርም “መጻሕፍትንና የእግዚአብሔርን ኃይል አታውቁም” አላቸው። በትንሣኤ ሰዎች እንደ መላእክት እንደሚሆኑ እንጂ እንደ ምድር እንደማይጋቡ ገለጸላቸው። ከሁሉ በላይ ደግሞ እግዚአብሔር “የአብርሃም አምላክ፣ የይስሐቅ አምላክ፣ የያዕቆብ አምላክ” መባሉን በመጥቀስ፣ እርሱ የሕያዋን አምላክ እንጂ የሙታን አምላክ አለመሆኑን በማስረዳት ትንሣኤ እንዳለ በቅዱሳት መጻሕፍት አረጋገጠላቸው።

ከሁሉ የምትበልጥ ትእዛዝና የፍቅር ሕግ

አንድ የሕግ መምህር ደግሞ “ከሕግ ማናቸው ትእዛዝ ታላቅ ናት?” ብሎ ጠየቀው። ጌታም ሁሉንም ሕግጋት በሁለት ዋና ዋና ነጥቦች ጠቅለል አድርጎ ሰጠው። አንደኛው እግዚአብሔርን በፍጹም ልብ፣ ነፍስና አሳብ መውደድ ሲሆን፣ ሁለተኛው ደግሞ ባልንጀራን እንደ ራስ መውደድ ነው። ሕግና ነቢያት ሁሉ በእነዚህ በሁለቱ ትእዛዛት ላይ ተንጠልጥለዋል። ይህ የሚያስተምረን ሃይማኖት ማለት በብዙ ሕግጋት መወጠር ሳይሆን ለእግዚአብሔርና ለሰው ያለን ፍቅር ተግባራዊ መገለጥ መሆኑን ነው።

የክርስቶስ ማንነትና የዳዊት ልጅነት በመጨረሻም ጌታ ተራውን ፈሪሳውያንን ጠየቃቸው። “ስለ ክርስቶስ ምን ይመስላችኋል? የማን ልጅ ነው?” አላቸው። እነርሱም “የዳዊት ልጅ ነው” አሉት። ጌታም ዳዊት በመንፈስ ቅዱስ ተመርቶ “ጌታ ጌታዬን፦ ጠላቶችህን የእግርህ መርገጫ እስካደርግልህ ድረስ በቀኜ ተቀመጥ አለው” (መዝሙር 110) ማለቱን ጠቀሰላቸው። ዳዊት “ጌታዬ” ካለው እንዴት ልጁ ይሆናል? ብሎ ጠየቃቸው።

ይህ ጥያቄ ክርስቶስ ፍጹም ሰው (የዳዊት ዘር) ብቻ ሳይሆን ፍጹም አምላክ (የዳዊት ጌታ) መሆኑን የሚያሳይ ምስጢር ነው። ፈሪሳውያንም ለዚህ መልስ መስጠት አቃታቸው፤ ከዚያ ቀን ጀምሮም ማንም ሊጠይቀው አልደፈረም። ጌታ በዚህ ታሪክ ማንነቱን በድል አድራጊነት አረጋገጠ።

ተግባራዊ የውይይት ጥያቄዎች

👉”የቄሳርን ለቄሳር የእግዚአብሔርንም ለእግዚአብሔር ስጡ” የሚለው ምላሽ ምን ትርጉም ይሰጣል?

👉ሰዱቃውያን ትንሣኤ ሙታን የለም ብለው ያቀረቡት ጥያቄ ስህተቱ የት ላይ ነበር?

👉”እግዚአብሔር የሕያዋን አምላክ ነው” የሚለው ቃል ትንሣኤን እንዴት ያረጋግጣል?

👉ከሁሉ የምትበልጠው ትእዛዝ (ፍቅር) ሁሉንም ሕግ እንዴት ይጠቃልላል?

👉ኢየሱስ መዝሙር 110ን ጠቅሶ የጠየቀው ጥያቄ ፈሪሳውያንን ለምን ዝም አሰኛቸው?

👉መሲሕ “የዳዊት ጌታ” መሆኑ ስለ መለኮታዊ ማንነቱ ምን ይናገራል?

👉”በአንተ ዘንድ የእግዚአብሔር መንገድ በእውነት አለ” ብለው የመጡት ለምን ነበር?

👉በትንሣኤ ዘመን ሰዎች “እንደ መላእክት” ይሆናሉ መባሉ ምን ማለት ነው?

👉ሁለተኛይቱ ትእዛዝ (ባልንጀራን መውደድ) ከመጀመሪያዋ ጋር እንዴት ትገናኛለች?

👉እነዚህ ጥያቄዎች ኢየሱስ በጠላቶቹ ፊት ያለውን ጥበብ እንዴት ያሳያሉ?