ኢየሱስ ጌታ ነው

የተወደዳችሁ የእግዚአብሔር ቤተሰቦች፤ የጌታችን የኢየሱስ ክርስቶስ ጸጋና ሰላም ይብዛላችሁ።

በአዲስ ኪዳን ውስጥ በተደጋጋሚ ለኢየሱስ ክርስቶስ የተሰጠው የማዕረግ ስም «ጌታ» የሚለው ነው። ሐዋርያው ጳውሎስና ሌሎችም ጸሐፊዎች ኢየሱስን በዚህ ስም ሲጠሩት፣ ተራ የሆነ የክብር አጠራርን ብቻ ሳይሆን እጅግ የጠለቀ መለኮታዊ እውነትን መግለጻቸው ነበር። በዚህ አጭር ትምህርት፣ «ጌታ» የሚለው ቃል ጥንት በነበረው ዓለም ምን ትርጉም እንደነበረውና፣ በተለይም ኢየሱስን «ጌታ» ስንለው ምን ማለታችን እንደሆነ ከቃሉ በጥልቀት እንመረምራለን።

ኢየሱስ፡ የሁሉ ጌታ (ኩሪዮስ)

1. «ጌታ» የሚለው ቃል ትርጉም በመጽሐፍ ቅዱስና በጥንቱ ዓለም በግሪክ ቋንቋ «ጌታ» የሚለው ቃል ኩሪዮስ (Kurios) ይባላል። ይህ ቃል በአዲስ ኪዳን ዘመን ለባሪያ ባለቤት፣ ለቤት አባወራ ወይም በአክብሮት ለሚጠራ ሰው ያገለግል ነበር። ሆኖም አይሁዳውያን የብሉይ ኪዳን መጻሕፍትን ወደ ግሪክ ቋንቋ (ሴፕቱጀንት) ሲተረጉሙ፣ ያህዌ (የእግዚአብሔር የግል ስም) እና አዶናይ (የእግዚአብሔር መጠሪያ) የሚሉትን ቃላት ለመተካት ኩሪዮስ የሚለውን ቃል ተጠቅመዋል። በተጨማሪም የግሪክና የሮም ነገሥታት ፍጹም ሥልጣን እንዳላቸውና መለኮታውያን (አማልክት) እንደሆኑ ለማሳየት ራሳቸውን «ኩሪዮስ» ብለው ያስጠሩ ነበር።

2. ኢየሱስ ክርስቶስ እንደ «ጌታ» የአዲስ ኪዳን ጸሐፊዎች ኢየሱስን «ጌታ» ብለው ሲጠሩት ሦስት አበይት መለኮታዊ እውነቶችን ማወጃቸው ነው፡-

• የዓለም ገዥና ፈራጅ፡ ከትንሣኤው በኋላ ሐዋርያት ኢየሱስ ተራ መምህር ብቻ ሳይሆን፣ እግዚአብሔር ከፍ ከፍ ያደረገው፣ ከስምም ሁሉ በላይ የሆነ ስም የሰጠው፣ ጉልበት ሁሉ የሚንበረከክለትና ምላስም ሁሉ «ጌታ» ብሎ የሚመሰክርለት የሁሉ የበላይ ገዥ መሆኑን አውጀዋል (ፊል. 2፡9-11)።
• ከእግዚአብሔር አብ ጋር እኩል የሆነ መለኮት፡ ሐዋርያው ጳውሎስ ለጣዖታት ከተሠዉ ነገሮች ጋር በተያያዘ ሲያስተምር፣ ብዙ አማልክት ቢኖሩም ለኛ ግን ሁሉ በእርሱ የሆነ አንድ እግዚአብሔርና አንድ ጌታ ኢየሱስ ክርስቶስ ብቻ እንዳለ በማወጅ፣ ኢየሱስን ከእግዚአብሔር ጋር በእኩል ክብር አስቀምጦታል (1ቆሮ. 8፡5-6)። እርሱ ራሱ ያህዌ ነው።
• ብቸኛ አዳኝ (መድኅን)፡ ነቢዩ ኢዩኤል «የእግዚአብሔርን (ያህዌን) ስም የሚጠራ ሁሉ ይድናል» ብሎ የተነበየውን ቃል (ኢዩኤል 2፡32)፣ ሐዋርያው ጳውሎስ በቀጥታ ለኢየሱስ በመስጠት «ኢየሱስ ጌታ እንደሆነ በአፍህ ብትመሰክር… ትድናለህ፤ የጌታን ስም የሚጠራ ሁሉ ይድናልና» በማለት ፈራጅም አዳኝም እርሱ መሆኑን አስረግጧል (ሮሜ 10፡9-13)።

3. «ኢየሱስ ጌታ ነው» የማለት ትርጉም በመንፈስ ቅዱስ ካልሆነ በቀር ኢየሱስ ጌታ ነው ሊል የሚችል ማንም የለም (1ቆሮ. 12፡3)። ይህ ቃል በአፍ የሚነበነብ ተራ ሐረግ ሳይሆን፣ ኢየሱስ የፍጥረታት ሁሉ ፈራጅና የሕይወታችን ብቸኛ አዳኝ መሆኑን አምኖ መቀበል ማለት ነው። «ኢየሱስ ጌታ ነው» ስንል፣ መለኮታዊ አምላክነቱን፣ የዘላለም ፈራጅነቱንና አዳኝነቱን መመስከራችን ነው።

የሕይወት ተዛምዶ

«ኢየሱስ ጌታ ነው» የሚለው እምነታችን በሕይወታችን ውስጥ በተግባር ሊታይ ይገባዋል፡-

• ፍጹም ታዛዥነት፡ ኢየሱስ ጌታችን ከሆነ፣ በሕይወታችን ላይ ሙሉ ሥልጣን ያለው እርሱ ነው። ስለዚህ ሁኔታዎች ቢመቹም ባይመቹም፣ የሚያስከፍለን ዋጋ ምንም ቢሆን፣ ሁልጊዜ ለእርሱ ፈቃድና ቃል ሙሉ በሙሉ ልንታዘዝ ይገባል።
• ለሌሎች መመስከር፡ ኢየሱስ ጌታ ነው ስንል የዓለም ሁሉ ፈራጅ እርሱ ነው ማለታችን ስለሆነ፣ ጌትነቱን ላልተቀበሉ ሰዎች ስለሚመጣው ፍርድ በማስጠንቀቅ፣ ከፍርዱ ሊያመልጡ የሚችሉት «ኢየሱስ ጌታ ነው» ብለው አምነው ሲቀበሉ ብቻ እንደሆነ በድፍረት ወንጌልን ልንመሰክርላቸው ይገባል።
• ለዓለማዊ ሥርዓት አለመንበርከክ፡ ጥንት ክርስቲያኖች ለሮም ቄሣር «ጌታ» ብለው ከመስገድ ይልቅ ሞትን ይመርጡ ነበር። ዛሬም ለእኛ ከሁሉ በላይ የሆነውና ፍጹም ታማኝነታችን የሚገባው ጌታ ኢየሱስ ክርስቶስ ብቻ መሆኑን አውቀን ልንጸና ይገባል።