ጳውሎስ አማኞች መሪዎቻቸውን እንዲያከብሩ ይመክራቸዋል (1ኛ ተሰ.5፡12-28)

ጳውሎስ በዚህ የማጠቃለያ ክፍል እያንዳንዱን የቤተ ክርስቲያን አባል የሚመለከቱትን ትእዛዛት ይዘረዝራል፡

ሀ) የቤተ ክርስቲያን አባላት መሪዎቻቸውን ማክበር ይኖርባቸዋል። እነዚህ መሪዎች ምእመናንን ለመምራት ጊዜያቸውን የሚሰዉና የክርስቲያኖችን መንፈሳዊ ፍላጎቶች የሚያሟሉ ናቸው።

ለ) የቤተ ክርስቲያን መሪዎች እርስ በርሳቸው በሰላም መኖር አለባቸው። በእግዚአብሔር ቤተ ክርስቲያን ላይ ባላቸው የአመራር ኃላፊነት ክርስቲያኖች ተግተው እንዲሠሩ ሊያበረታቱና ራሳቸው ስደትን ለመጋፈጥና ለክርስቶስ ለመመስከር ቆራጦች ሊሆኑ ይገባል። በመጎዳት ላይ ያሉትን አማኞች ሊንከባከቡና ክርስቲያኖች ለእግዚአብሔር ክብር ለመኖር በሚጥሩበት ወቅት ሊረዷቸው ይገባል። ክርስቲያኖች በሚያሳድዳቸው ዓለማውያንና በሌሎችም ሰዎች ላይ ቂም ሊይዙ ይችሉ ነበር። መሪዎች አማኞች እንዲህ ዓይነቱን የመራርነትና የበቀል ስሜት እንዲያስወግዱ በማስተማር ይረዷቸዋል። ክርስቲያን መሪዎች ሰዎች የሚዋደዱበትንና እርስ በርስ የሚተጋገዙበትን ድባብ የመፍጠር ኃላፊነት ተጥሎባቸው ነበር።

ሐ) ከእግዚአብሔር ጋር የሚመላለሱ አማኞች ሁሉ የሚከተሉት ባሕርያት ይኖራቸዋል፡-

  1. በተለያዩ ሁኔታዎች ውስጥ ደስ መሰኘት። እግዚአብሔር ምንጊዜም ባስቸጋሪ ሁኔታዎች ውስጥ እንደማንገባ ቃል አልገባልንም። ነገር ግን ስደትና አስቸጋሪ ሁኔታዎች በሚገጥሙን ጊዜ ከእኛ ጋር አብሮ እንደሚሆን ቃል ገብቶልናል። የትኛውም ችግር ከምንቋቋመው በላይ እንዳልሆነ እያሳየን በችግሩ ውስጥ ያሳልፈናል (1ኛ ቆሮ. 10፡13 አንብብ)። እግዚአብሔር ወደ ሕይወታችን የሚመጣው ነገር ሁሉ በእርሱ ፈቃድ እንደሚፈጸምና ይህም በመንፈሳዊ ሕይወታችን ስዕሎች እንድንሆን የሚያግዘን መሆኑን ያስረዳል።
  2. አማኞች ለማንኛውም ሁኔታ ጸሎትን ቀዳሚ ምላሻችን ልናደርገው ይገባል።
  3. አማኞች የትንቢትን ስጦታ ቸል ማለት የለባቸውም። የሐሰት ትንቢትን በሚናገሩ ሰዎች ላይ ቤተ ክርስቲያናቸውን ከእውነት በሚያርቁ ሰዎች ሳቢያ የተሰሎንቄ ቤተ ክርስቲያን ትንቢት እንዳይነገር የከለከለች ይመስላል። ወይም ደግሞ ነቢያትን የማክበርና ትምህርታቸውን የመስማት ፍላጎት አልነበራቸውም። ጳውሎስ ግን ይህን የእግዚአብሔር ስጦታ የምናስተናግደው በዚህ መንገድ እንዳልሆነ ያስረዳል። እግዚአብሔር የሰጠንን አንድ ነገር ለመቀበል ፈቃደኞች በማንሆንበት ጊዜ የመንፈስን እሳት ማጥፋታችን ነው። ስለሆነም የተሰሎንቄ አማኞች የትንቢትን ስጦታ መፍቀድ ያስፈልጋቸው ነበር። ጳውሎስ የተሰሎንቄ አማኞች ሁሉንም እንዲመረምሩና መልካሙን እንዲይዙ ያበረታታቸዋል። ለመሆኑ አንድ ትንቢት ከእግዚአብሔር መሆን አለመሆኑን የምንፈትነው እንዴት ነው። በዚህ ረገድ ልንጠቀም የምንችላቸው አምስት መሣሪያዎች አሉ።

በመጀመሪያ፥ ይህ ትንቢት በመጽሐፍ ቅዱስ ውስጥ ከተጠቀሰው አሳብ ጋር ይስማማል ወይ? ብለን መጠየቅ ይኖርብናል። የተስሎንቄ አማኞች አንዳንድ የሐሰት ነቢያት ክርስቶስ በዚህ ቀን ይመጣል ባሏቸው ጊዜ ይህንን ጥያቄ ለማንሣት ባለመቻላቸው ሥራቸውን አቁመዋል። ክርስቶስ እኔ የምመጣበትን ቀን ማንም አያውቅም ሲል የተናገረውን ዘንግተው ነበር (ማቴ. 24፡36)።

ሁለተኛ፥ ይህ ለቤተ ክርስቲያን ዕድገትና እውቀት ጠቃሚ ነው ወይ? የሚል ጥያቄ ማንሣት። መንፈሳዊ ጠቀሜታ የሌላቸው ትንቢቶች አሉ። አንድ የቤተ ክርስቲያን መሪ የትንቢት ቃል አለ ወይ ብሎ በጠየቀ ጊዜ አንድ ሰው ብድግ ብሎ ሃሌሉያ እያለ ደጋግሞ ይጮህ ጀመር። በዚህ ጊዜ በቤተ ክርስቲያን ውስጥ የነበሩት ሰዎች በሙሉ እልል አሉ። በመሠረቱ ይህ የትንቢት ቃል አይደለም። ይህ ለትምህርትም ሆነ ሕዝቡን ለማነጽ የማይጠቅም የቃላት ድግግሞሽ ነው። የዚህ ዓይነቱ ትንቢት ማንንም ወደ እግዚአብሔር አያስጠጋም።

ሦስተኛ፥ ትንቢቱን የሚናገረው ግለሰብ ባሕርይ ነው። እግዚአብሔር ብዙውን ጊዜ ቃሉን ለማስተላለፍ በመንፈሳዊ ሕይወቱ የበሰለና ለቃሉ የሚታዘዝ ሰው ይጠቀማል። ነገር ግን ትንቢቱን የሚናገረው ግለሰብ በኃጢአት የሚመላለስ ከሆነ ወይም ደግሞ ትንቢቱ የተነገረው ትንቢቱን ለሚናገረው ነቢይ አንድን ጥቅም ወይም ክብር ለማስገኘት ታስቦ ከሆነ፥ እንዲህ ዓይነቱን መልእክት ስንቀበል ልንጠነቀቅ ይገባል።

አራተኛ፥ ትንቢቱን የሚናገረውን ግለሰብ ምን ያህል እናውቀዋለን? የሚለው ጥያቄ ነው። የቤተ ክርስቲያን መሪዎችም ሆኑ ምእመናን የማያውቁት ሰው ብድግ ብሎ ትንቢትን በሚናገርበት ጊዜ ይህንኑ ትንቢት በአጥጋቢ ሁኔታ መመርመሩ አስቸጋሪ ነው። አንድ አዲስ ሰው ወደ ቤተ ክርስቲያን መጥቶ ትንቢት ለመናገር በሚፈልግበት ጊዜ መሪዎቿ መጀመሪያ ሊሰሙትና መልእክቱን ሊገመግሙት ይገባል። እግዚአብሔር መሪዎች ቤተ ክርስቲያናቸውን ከስሕተት እንዲጠብቁ ኃላፊነት ሰጥቷቸዋል። ብዙውን ጊዜ የሐሰት ትምህርቶች ወደ ቤተ ክርስቲያን የሚመጡት ትንቢትን ወይም ትምህርትን በሚሰጡ ያልታወቁ ሰዎች አማካኝነት ነው። ግለሰቡ ትንቢቱን ወይም ትምህርቱን ለሕዝቡ ሁሉ ማስተላለፍ ያለበት መሪዎቹ መልእክቱን ከገመገሙት በኋላ መሆን አለበት። ልብ አድርግ የሐሰት ትምህርት አንድ ጊዜ ወደ ሕዝቡ ዘልቆ ከገባ በኋላ በስፋት እንዳይሰራጭ መከላከሉ ከባድ መሆኑን አትዘንጋ። ነገር ግን እግዚአብሔር ብዙውን ጊዜ ከቃሉ ጋር የሚስማማ መልእክት ለማስተላለፍ የሚጠቀምበትን አገልጋይ ካወቀ፥ አኗኗራቸው የእግዚአብሔርን ቃል እንደሚከተል እንገነዘባለን። እንዲህ ዓይነቱ ሰው ለምእመናን የእግዚአብሔርን ቃል በይፋ እንዲናገር ልንፈቅድለት እንችላለን።

አምስተኛ፥ የተነገረው ትንቢት መፈጸሙን በመከታተል፡፡፡ ትንቢቱ በተነገረበት መንገድ በትክክል ካልተፈጸመ፥ ይህ ትንቢት ከእግዚአብሔር እንዳልመጣ ልናረጋግጥ እንችላለን። ከዚህ በኋላ ይህን ትንቢት የተናገረውን ግለሰብ ልንጠራጠር እንችላለን።

የውይይት ጥያቄ፡- ሀ) ቤተ ክርስቲያን፥ በተለይም ወጣቶች መሪዎቻቸውን ለማክበር የሚፈልጉት በምን መንገድ ነው። ይህንን በበለጠ እንዲያከናውኑት ምን ትመከራቸዋለህ? ለ) ጳውሎስ በዚህ ስፍራ እንደገለጸው የቤተ ክርስቲያን መሪዎች ኃላፊነታቸውን በአጥጋቢ ሁኔታ ለመወጣት ምን ሊያደርጉ ይገባል? ሐ) አንድ ትንቢት በትክክል ካለመፈተኑ የተነሣ በቤተ ክርስቲያን ላይ የተለያዩ ችግሮችን ስላስከተለበት ሁኔታ ምሳሌዎችን ስጥ። መ) ትንቢት ለቤተ ክርስቲያን መንፈሳዊ እድገትን ስላመጣበት ሁኔታ ግለጽ። ሠ) መልካም የሆነው አሳብ ለሕዝብ እንዲቀርብና ሐሰተኛ የሆነው መልእክት እንዳይሰራጭ ለመከላከል ቤተ ክርስቲያን ልትጠቀም የምትችላቸው ዘዴዎች ምን ምንድን ናቸው?

  1. ጳውሎስ የተሰሎንቄ አማኞች በሁለንተናቸው፥ ማለትም በሥጋቸው፥ በነፍሳቸውና በመንፈሳቸው በቅድስና እንዲያድጉ ይጸልያል። ይህም ክርስቶስ በሚመለስበት ጊዜ እንከን የሌላቸው እንዲሆኑ ያስችላቸዋል። ጳውሎስ እግዚአብሔር በእነዚህ አዳዲስ አማኞች ሕይወት ውስጥ በመሥራት እንደሚያሳድጋቸው እርግጠኛ ነበር።

ጳውሎስ እነዚህ አዳዲስ ክርስቲያኖች በጸሎት እንዲተጉ በመጠየቅ መልእክቱን ይደመድማል። እርስ በርሳቸውም ያላቸውን ፍቅር በተቀደሰ አሳሳም እንዲገልጹ ያሳስባቸዋል። በመሳሳም ሰላምታ መለዋወጡ በመደበኛነት የሚገለጽ ሥርዓታዊ ተግባር ሳይሆን፥ አማኞች እርስ በርሳቸዉ ያላቸውን ፍቅርና መሰጠት የሚገልጹበት ሊሆን ይገባል። ጳውሎስ ይህ መልእክት ለክርስቲያኖች ሁሉ እንዲነበብ ካሳሰበ በኋላ ቡራኬ በመስጠት መልእክቱን ይደመድማል።

የውይይት ጥያቄ፡- ከ1ኛ ተሰሎንቄ ውስጥ ሕይወትህን የባረኩ አንዳንድ ነጥቦች ምንድን ናቸው?

(ማብራሪያው የተወሰደው በ ኤስ.አይ.ኤም ከታተመውና የአዲስ ኪዳን የጥናት መምሪያና ማብራሪያ፣ ከተሰኘው መጽሐፍ ነው፡፡ እግዚአብሔር አገልግሎታቸውን ይባርክ፡፡)

ጳውሎስ ክርስቶስ በድንገት በሚመለስበት ጊዜ የሞቱት አማኞች ምን እንደሚሆኑ ያብራራል (1ኛ ተሰ. 4፡13-5፡12)

ጢሞቴዎስ የተሰሎንቄ አማኞች ክርስቶስ በሚመለስበት ጊዜ የሞቱ አማኞች ምን እንደሚሆኑ ያነሷቸውን ጥያቄዎች ለጳውሎስ አቀረበ። ምንም እንኳ ጳውሎስ ተሰሎንቄን ከለቀቀ ከሦስት ወራት ባይበልጥም ቢያንስ አንድ ክርስቲያን በሞት የተለያቸው ይመስላል። ይህ ደግሞ የተሰሎንቄ አማኞች የሞቱ ክርስቲያኖች በተለይም ክርስቶስ በሚመለስበት ጊዜ ምን እንደሚሆኑ እንዲያስቡ አደረጋቸው። ለሁሉም ክርስቲያኖች ስለዚሁ ጉዳይ ጥርት ያለ አሳብ መያዙ በጣም አስፈላጊ ነው። ጳውሎስ ካስተማራቸው ነጥቦች መካከል ዋና ዋናዎቹ ከዚህ በታች ተዘርዝረዋል።

ሀ) ሞት ለክርስቲያን እንደ እንቅልፍ ነው። አንድ ሰው ማታ ወደ አልጋው እንደሚሄድና ከብዙ ሰዓታት በኋላ እንደሚነቃ ሁሉ፥ አንድ እማኝ በሚሞትበት ጊዜ ነገር ዓለሙ ጨለመ ማለት አይደለም። ምክንያቱም አንድ ቀን ሥጋዊ አካላችን ከሞት ይነሣልና። (መንፈሳችን አይሞትም፥ ነገር ግን ከክርስቶስ ጋር በሰማይ ይቆይና በትንሣኤ ከሰውነታችን ጋር እንደገና ይዋሃዳል።) ሞቶ የተነሣውን የክርስቶስ ኢየሱስን ምሳሌነት በመከተል እኛም ከሞት እንነሣለን። በመሆኑም ሞትን እንደ መጨረሻ ነጥብ አድርገን በመመልከት ልንፈራ አይገባም።

ለ) አማኞች ሁሉ ለዘላለም ሕይወት እንደሚነሡ ከሚያስረዳው የተስፋ ቃል የተነሣ ክርስቲያኖች ለሞት የተለየ አመለካከት ሊኖራቸው ይገባል። ሞት እዚህ በምድር ላይ ከሚያመጣው መለየት የተነሣ ኀዘንና ሥቃይ ቢኖርም፥ የዓለማውያን ዓይነት ተስፋ ቢስነት ሊሰማን አይገባም። በመሆኑም አንድን አማኝ በምንቀርብበት ጊዜ ተስፋ ቢስነት ሊሰማን አይገባም። ይህ ማለት ግን ለሞተ ሰው ማልቀስ ትክክል አይደለም ማለት አይደለም። ምክንያቱም ክርስቶስ እንኳን አልዓዛር በሞተ ጊዜ አልቅሷልና (ዮሐ. 11፡35)። እዚህ ጋር ጳውሎስ የሚነቅፈው ተስፋ በመቁረጥ ሰዎች ከመጠን በላይ ማልቀሳቸውን ነው።

ሐ) የሞቱ አማኞች በክርስቶስ የወደፊት ግዛት ውስጥ የሚገለጡትን በረከቶች አያጡም። እንዲያውም ክርስቶስ ከሰማይ በሚመለስበት ጊዜ መጀመሪያ የሚያገኙት እነርሱ ናቸው። በትንሣኤ አካላቸው ከሞት ተነሥተው በእግዚአብሔር ዘላለማዊ መንግሥት ውስጥ ይኖራሉ። ከዚያ በኋላ በሕይወት ያሉት አማኞች ይለወጣሉ። ይህም የሚሆነው ሰውነታቸው በእግዚአብሔር መንግሥት ውስጥ ለመኖር በሚያስችል መልኩ እንዲቀየር ነው። ከሞት የተነሡት አማኞችና የተለወጡት አማኞች ክርስቶስን በአየር ተቀብለው ከእርሱ ጋር ለዘላለም ይኖራሉ።

የውይይት ጥያቄ፡– ክርስቲያኖች በሙታን ትንሣኤ ማመናቸውን ተግባራዊ ቢያደርጉ ለሞት፥ ለስደትና ለተቀደሰ አኗኗር የሚኖራቸው አመለካከት እንዴት ይቀየራል?

አማኞች ለረጅም ጊዜያት ስለዚሁ ንጥቀትና ከመጨረሻው ዘመን አንጻር መቼ እንደሚፈጸም ሲከራከሩ ቆይተዋል። በራእይ ምዕራፍ 20 ከተገለጸው የክርስቶስ የሺህ ዓመት መንግሥት ጋር እንዴት ይዛመዳል። ስለ መጨረሻው ዘመን ክስተቶች ቅደም ተከተል በመጽሐፍ ቅዱስ ውስጥ ከዚህ በግልጽ ተዘርዝሮ አንመለከተም። ከዚህም የተነሣ ክርስቲያኖች የተለያዩ አመለካከቶች አሏቸው። የአማኞችን መነጠቅ በተመለከተ ሁለት ዓበይት አተረጓጎሞች አሉ። ከእነዚህም አንዱ የተለያዩ አመለካከቶችን ያስተናግዳል።

1) ንጥቀትን ተከትሎ በራእይ 21-22 የተገለጸው የዘላለም መንግሥት ይቀጥላል። አንዳንድ ክርስቲያኖች በመጨረሻው ዘመን ክርስቶስ ልጆቹን ለመውሰድ ከሰማይ ይገለጣል። እርሱ የሞቱትን ያስነሣል። በሕይወት ያሉትን ደግሞ ይለውጣል። በዚህም ጊዜ በአዲስ ሰማይና ምድር ወዳለው ዘላለማዊ መንግሥቱ ይወስዳቸዋል። በዚህ ጊዜ የማያምኑ ሰዎች ከሞት ተነሥተው የክርስቶስን ፍርድ ይቀበላሉ። ከዚያም ወደ ዘላለማዊ ሲኦል ይወርዳሉ ብለው ያምናሉ።

2) የአማኞች መነጠቅ የክርስቶስን የሺህ ዓመታት መንገሥ አስቀድሞ የሚከሠት ይሆናል። አንዳንድ አማኞች በራእይ 20 ውስጥ የተገለጸው የክርስቶስ የሺህ ዓመት መንግሥት በራእይ 21–22 ከተገለጸው ዘላለማዊ መንግሥቱ እንደሚለይ ያስባሉ። እነዚህ አማኞች ክርስቶስ ምድራዊ አገዛዙን ሊጀምር ሲል ወደ ተከታዮቹ እንደሚመጣ ያስተምራሉ። በዚህን ጊዜ የሞቱ ክርስቲያኖች ይነሣሉ። በሕይወት ያሉትም ይለወጣሉ። ይህም በምድራዊ መንግሥት ላይ ከክርስቶስ ጋር እንዲገዙ ያስችላቸዋል። በእነዚህ አማኞች አመለካከት የዘላለም መንግሥት የሚጀምረው የሺህ ዓመቱ መንግሥትና የሰው ልጅ የመጨረሻ ዓመፅ ከተጠናቀቀ በኋላ ይሆናል። ነገር ግን የዚህ አመለካከት አራማጆች ይህ የክርስቲያኖች መነጠቅ መቼ እንደሚሆን ሦስት የተለያዩ አሳቦችን ያቀርባሉ።

በመጀመሪያ፡- ብዙ ክርስቲያኖች የአማኞች ንጥቀት ከክርስቶስ የምድር ላይ ንግሥና ጥቂት ቀደም ብሎ እንደሚፈጸም ያስባሉ። ክርስቲያኖች በታላቁ መከራ ውስጥ እንደሚያልፉና ብዙዎችም ለእምነታቸው እንደሚሞቱ ያምናሉ። ነገር ግን ክርስቶስ በሠራዊቱ ታጅቦ ከሰማይ ከመምጣቱ በፊት (ራእ. 19፡11-21 አንብብ)፥ በአየር ተገልጦ የሞቱትን አማኞች ያስነሣል፥ በሕይወት ያሉትንም ይለውጣል። እነዚህም አማኞች ከክርስቶስ ጋር ለመንገሥ ወደ ምድር ይመለሳሉ።

ሁለተኛ፡- ጥቂት አማኞች ይህ ንጥቀት ታላቁ መከራ በሚባለው ጊዜ አጋማሽ ላይ እንደሚፈጸም ያስባሉ። እነዚህ አማኞች የታላቁን መከራ ዘመን በሁለት የሦስት ተኩል ዓመታት ክፍለ ጊዜያት ይከፍላሉ። አማኞች በመጀመሪያው የሦስት ተኩል ዓመታት የመከራ ጊዜያት ውስጥ እንደሚያልፉና ከሁለተኛው የሦስት ተኩል ዓመታት የታላቁ መከራ ጊዜ እንደሚተርፉ ያምናሉ። ይህም የሚሆነው ክርስቲያኖች በመነጠቃቸው ነው። ስለሆነም ከሦስት ተኩል ዓመታት በኋላ እነዚህ ከሞት የተነሡት አማኞች በምድር ላይ ለመንገሥ ከክርስቶስ ጋር ከሰማይ ይመጣሉ።

ሦስተኛ፡- ሌሎች ብዙ አማኞች ክርስቲያኖች ከሰባት ዓመቱ ታላቅ መከራ በፊት ከዚህ ዓለም እንደሚወሰዱ ያምናሉ። ይህንንም የሚሉት በራእይ 3፡10 ለፊልድልፍያ ቤተ ክርስቲያን የተሰጠውን የተስፋ ቃል በመንተራስ ነው። ክርስቶስ ቤተ ክርስቲያኑን ነጥቆ እንደሚወስድና ከዚያ በኋላ በመጨረሻዎቹ ሰባት ዓመታት የእግዚአብሔርን ፍርድ በምድር ላይ እንደሚያመጣ ያስተምራሉ። ከሰባት ዓመታት በኋላ ከክርስቶስ ጋር ወደ ምድር ተመልሰው ይገዛሉ።

የውይይት ጥያቄ፡- ሀ) ከእነዚህ አመለካከቶች የትኛውን ታምናለህ? ለ) ቤተ ክርስቲያንህ ከእነዚህ አመለካከቶች የትኛውን ታምናለች? መልሱን ካላወቅህ ከቤተ ክርስቲያንህ መሪዎች አንዱን ጠይቅ። ሐ) ክርስቶስ ሊወስድህ እንደሚመጣ፥ ሙታንን እንደሚያስነሣ፥ በሕይወት ያሉትን እንደሚለውጥና ለዘላለም ከእርሱ ጋር እንደምንኖር መረዳቱ እነዚህ ክስተቶች መቼ እንደሚፈጸሙ ከመከራከር የበለጠ አስፈላጊ የሚሆነው ለምንድን ነው?

የተሰሎንቄ አማኞች ስለ መጨረሻው ዘመን ያነሡት ሌላም ጥያቄ ነበር። ክርስቶስ መቼ እንደሚመለስ ለማወቅ ፈልገው ነበር። አንዳንድ ሰዎች ክርስቶስ በቶሎ እንደሚመለስ ያስተምሩ ስለነበር አንዳንድ አማኞች ሥራቸውን ትተው ነበር። ጳውሎስ ይህንንም ጥያቄ በሁለት ዐበይት ነጥቦች አስደግፎ ይመልሳል፡-

ሀ) ክርስቶስ የሚመለስበት ጊዜ ድንገተኛና ያልተጠበቀ ስለሚሆን ጊዜው መቼ እንደሚሆን በትክክል ልናውቅ አንችልም። ይህ ሌባ በሌሊት እንደሚመጣ ሁሉ ድንገተኛና ያልተጠበቀ ይሆናል። ክርስቶስ ሰዎች ባልጠበቁት ሰዓት ይመጣል። ይህም ማለት ክርስቶስ በዚህን ጊዜ ይመጣል ማለቱ ትክክል አይሆንም ማለት ነው። ክርስቶስ በዚህ ቀን ወይም ዓመት ይመጣል ልንል አንችልም።

ለ) የክርስቶስን መምጣት እየተጠባበቁ መኖር ማለት ዛሬ እንደሚመጣ ሆነን መኖር ማለት ነው። እርሱን ለማስከበር በታማኝነት እንኖራለን። አማኞች የብርሃን ልጆች በመሆናቸው ወይም የእግዚአብሔር የጽድቅ መንግሥት ተካፋዮች በመሆናቸው፥ ከዓለም የተለየ ሕይወት መምራት ይኖርባቸዋል። ራሳችንን ልንቆጣጠር፥ በእምነት፥ በፍቅርና በተስፋ እየተመላለስን የክርስቶስን መምጣት መጠባበቅ ይኖርብናል። ከሁሉም በላይ በተስፋ ልንጸና ይገባል። ክርስቶስ በሚመለስበት ጊዜ በሕይወት ብንኖር ወይም ብንሞት ለዘላለም ከእርሱ ጋር እንደምንኖር እናውቃለን።

የውይይት ጥያቄ፡- ሀ) ዓለማውያንና ሥጋዊ ክርስቲያኖች የሚያደርጓቸውንና ክርስቶስ በሚመለስበት ጊዜ ፍርድን የሚያስከትሉባቸውን ነገሮች ዘርዝር። ለ) ክርስቶስ በየትኛውም ጊዜ ሊመጣ እንደሚችል በሚያንጸባርቅ መልኩ እንደምንኖር ለማሳየት ልናደርጋቸው የሚገቡ አንዳንድ ነገሮች ምን ምንድን ናቸው? ሐ) ብዙ ክርስቲያኖች እግዚአብሔርን በሚያስከብር መንገድ የማይኖሩት ለምን ይመስልሃል? ስለ ክርስቶስ ምጽአት እነዚህ ክርስቲያኖች የዘነጉት ነገር ምንድን ነው?

(ማብራሪያው የተወሰደው በ ኤስ.አይ.ኤም ከታተመውና የአዲስ ኪዳን የጥናት መምሪያና ማብራሪያ፣ ከተሰኘው መጽሐፍ ነው፡፡ እግዚአብሔር አገልግሎታቸውን ይባርክ፡፡)

ጳውሎስ አማኞች የተቀደሰ፣ በፍቅር የተሞላና ሰላማዊ ሕይወት እንዲኖሩ ያበረታታቸዋል (1ኛ ተሰ. 4፡1-12)

ጢሞቴዎስ ለጳውሎስ ስለ ተሰሎንቄ አማኞች ጽናት በገለጸ ጊዜ፥ አንዳንድ አሳሳቢ ጉዳዮች እንደነበሩም መናገሩ አልቀረም። ጳውሎስ በዚህ የአንደኛ ተሰሎንቄ የመጨረሻ ክፍል ውስጥ እነዚህን ጉዳዮች ይዳስሳል። የጳውሎስ ቀዳማዊ ዓላማ አማኞች እግዚአብሔርን በሚያስደስት መልኩ እንዲኖሩ ነበር።

እግዚአብሔር ባዳነን ጊዜ ከኃጢአት ብቻ ነፃ አላወጣንም። እርሱ እንቀደስ ዘንድ አድኖናል።

የውይይት ጥያቄ፡- መቀደስ ማለት ምን ማለት ነው? ይህን ቃል ከመጽሐፍ ቅዱስ መዝገበ ቃላት ውስጥ አንብብ።

የመቀደስ መሠረታዊ ፍች መለየት ማለት ነው። በክርስቶስ አምነን በምንድንበት ጊዜ እንደ ተቀደስን ቢገለጽም፥ እግዚአብሔር በልባችን ውስጥ የፈጸመውን ተግባር በሚያንጸባርቅ መልኩ የተቀደሰ ሕይወት እንድንኖር ይፈልጋል። ዛሬ እግዚአብሔር በሕይወታችን ውስጥ ከሚፈጽማቸው ነገሮች አንዱ ባለማቋረጥ እኛን ቅዱሳን ማድረግ ነው። የእግዚአብሔር የመጨረሻ ዓላማ ከክርስቶስ ጋር በምንገናኝበት ጊዜ እንድንከብርና የክርስቶስን ያህል ቅድስና እንዲኖረን ነው (1ኛ ዮሐ 3፡2)።

ጳውሎስ የተሰሎንቄ አማኞች አጽንኦት ሊሰጡ የሚገቧቸውን የተለያዩ የክርስቲያናዊ አኗኗር ገጽታዎች ይዳስሳል።

ሀ) ወሲባዊ ንጽሕና፡- ልክ እንደኛው የተሰሎንቄ አማኞችም ከወሲባዊ ንጽሕና ጋር የተያያዙ ችግሮች ነበሩባቸው። ቀደም ሲል በጣኦት አምልኳቸው ውስጥ ብዙውን ጊዜ ከሌሎች ሰዎች ጋር ወሲባዊ ግንኙነቶችን ይፈጽሙ ነበር። ወደ ክርስትና ሕይወት ሲመጡ ይህንኑ ልምምድ ማቆሙ ቀላል አልሆነላቸውም። ጳውሎስ ግን ሰውነታቸውን ለመቆጣጠርና በንጽሕና ለመመላለስ ቁርጥ ውሳኔ እንዲያደርጉ ያበረታታቸዋል። ዛሬ ይህንን ትምህርት የማይታዘዝና ሌሎችም ንጹሕ ሕይወት እንዳይኖሩ የሚያስተምር ማንም ቢሆን ከእግዚአብሔር ጋር ፊት ለፊት ተጋፍጧል። ይህም እግዚአብሔር ለእያንዳንዱ አማኝ የሰጠውን የመንፈስ ቅዱስ ድምጽ አለመስማትና አለማክበር ይሆናል። እግዚአብሔርን የሚያሳስበው ከግል ሕይወታችን ይልቅ እርሱን የምናመልክበት ሁኔታ ነው ብለን የምናስብ ከሆነ ተሳስተናል። አንዳንድ አማኞች ከቅርብ ጊዜ ወዲህ እንደሚያስተምሩት እግዚአብሔር ለወሲባዊ ንጽሕናችን ግድ እንደሌለው የሚያሳይ ሐሳብ በመጽሐፍ ቅዱስ ውስጥ አይገኝም። ቅድስናና ንጽሕና በጣም አስፈላጊዎች ናቸው። ከጋብቻ ግንኙነት ውጪ የሚፈጸም ማንኛውም ወሲብ በእግዚአብሔር ላይ የሚፈጸም ኃጢአት ነው። የወሲቡን ተግባር የምናጋራውም ሰው የዚሁ በደል ተካፋይ ይሆናል።

ለ) የፍቅር ግንኙነቶች፡- የተሰሎንቄ አማኞች ቀደም ሲል ያደርጉ እንደነበረው ለእርስ በርሳቸው የነበራቸውን ፍቅርና መተሳሰብ አጽንተው  ሊይዙ ይገባ ነበር።

ሐ) ተግቶ መሥራት፡- አማኞች ተግተው ሊሠሩና የጭምትነት ሕይወት ሊኖሩ ይገባቸው ነበር። ይህም ለሌሎች የሚሆን ምሳሌያዊ ሕይወት ለመኖር ያስችላቸዋል። የተሰሎንቄ አማኞች ክርስቶስ ቶሎ ይመለሳል ብለው በማሰባቸው ይመስላል ተግተው ከመሥራት ይቆጠቡ ነበር። ከዚህም የተነሣ የኢኮኖሚ ችግሮችን ለመጋፈጥ ተገደዱ። ይህም ብቻ አልነበረም። እርስ በርሳቸው በተለያዩ ችግሮች ውስጥ ለመግባትና ኃጢአትን ለመሥራት ተገድደዋል። ስለሆነም ጳውሎስ ወደ ሥራቸው እንዲመለሱና ሰዎች ክርስቲያኖችን ያከብሯቸው ዘንድ ምሳሌያዊ ሕይወት እንዲኖሩ ያበረታታቸዋል። ብዙ ሰዎች ሥራ ክፉ ነው የሚል ባሕላዊ አመለካከት አላቸው። ስለሆነም ብዙ ወጣቶች ወደ ትምህርት ቤት መሄድ ከጀመሩ በኋላ በቤት ተገቢውን ሥራ ከማከናወን ይቆጠባሉ። የእርሻም ሆነ ሌሎች ማናቸውንም ሥራዎች ከማከናወን ይሰንፋሉ። ጳውሎስ ይህንን ሲል ከትምህርት ደረጃችሁ ጋር የሚመጣጠን ሥራ ካገኛችሁ ማለቱ አልነበረም። ይልቁንም ማንም ሰው የሁለተኛ ደረጃ ትምህርት ያጠናቀቀም ቢሆን ያገኘውን ሥራ ማከናወን እንዳለበት ያስገነዝባል። ይህ ለሌሎች ጥሩ ምሳሌ በመሆኑ የክርስቶስን ስም ያስከብራል።

የውይይት ጥያቄ፡- ሀ) እነዚህን ሦስት እውነቶች ለወጣቶች ማስተማር አስፈላጊ የሚሆነው ለምንድን ነው? ለ) ብዙ ወጣቶች ራሳቸውን ዝቅ አድርገው ትናንሽ ሥራዎችን የማይሠሩት ለምንድን ነው? ሐ) ዛሬ ጳውሎስ በኢትዮጵያ ላሉት ወጣቶች ደብዳቤ የሚጽፍ ቢሆን ኖሮ ክርስቶስን ስለሚያስከብር ሕይወት ምን ዓይነት ተግባራዊ ነጥቦችን ይጠቅስላቸው ነበር።

(ማብራሪያው የተወሰደው በ ኤስ.አይ.ኤም ከታተመውና የአዲስ ኪዳን የጥናት መምሪያና ማብራሪያ፣ ከተሰኘው መጽሐፍ ነው፡፡ እግዚአብሔር አገልግሎታቸውን ይባርክ፡፡)

ጳውሎስ የጢሞቴዎስን ሪፖርት ከሰማ በኋላ የተሰማውን ደስታ ይገልጻል (1ኛ ተሰ. 3:1-13)

ጳውሎስ የተሰሎንቄን አማኞች አኗኗር ለማወቅ የወሰዳቸውን እርምጃዎች የፍቅሩ መግለጫ አድርጎ ይጠቅሳል። ከደረሰባቸው ስደት የተነሣ እምነታቸውን እንዳይተዉ ሰግቶ ነበር። ይህንንም ለማጣራት ጢሞቴዎስን ወደ ተሰሎንቄ ላከው። ጢሞቴዎስ ጳውሎስ ወደሚያገለግልባት የተሰሎንቄ ከተማ በተመለሰ ጊዜ፥ ከስደቱ ባሻገር የተሰሎንቄ አማኞች በክርስቶስ ማመናቸውን እንደቀጠሉና ታላቅ ፍቅርም እንደነበራቸው ለጳውሎስ አብራራ። ይህ ጳውሎስን እጅግ በማስደሰቱ እነርሱን ለማየት የነበረውን ጉጉት አናረው። ጳውሎስ ስደትን ተቋቁሞ መዝለቅ በዋናነት የሰዎች ጥረትና ችሎታ ሳይሆን የእግዚአብሔር የማስቻል ውጤት እንደሆነ ይገነዘብ ነበር። ስለሆነም እግዚአብሔር የተሰሎንቄን አማኞች ልብ እንዲያበረታ፥ እንዲያጸናቸውና እስከ ኢየሱስ ክርስቶስ ምጽአት ድረስ ቅዱሳን አድርጎ እንዲጠብቃቸው ይጸልያል።

ብዙውን ጊዜ ስደት በሚደርስብን ጊዜ ምን እንደምናደርግ እናስባለን። ለክርስቶስ የተሰጠ ሕይወት መኖራችንን ለማመልከት ሕይወታችንን መመርመሩ ጠቃሚ ነው። ነገር ግን ስደት በሚመጣበት ጊዜ እግዚአብሔር እንደማይተወን መረዳት አለብን። እርሱ ከእኛ ጋር በመሆን ፈተናውን እንድንቋቋምና ጸንተን እንድንቆም ይረዳናል።

የውይይት ጥያቄ፡- ሀ) ከእምነትህ የተነሣ የተሰደድክበትን ሁኔታ ግለጽ። ለ) በዚህ ጊዜ ለክርስቶስ ታማኝ ሆኖ ስለ መጽናት ምን ተማርክ? ሐ) ለአማኞች እግዚአብሔር በስደት ጊዜ በእምነታቸው የሚጸኑበትን ኃይል እግዚአብሔር እንደሚሰጣቸው መረዳቱ ምን ይጠቅማል?

(ማብራሪያው የተወሰደው በ ኤስ.አይ.ኤም ከታተመውና የአዲስ ኪዳን የጥናት መምሪያና ማብራሪያ፣ ከተሰኘው መጽሐፍ ነው፡፡ እግዚአብሔር አገልግሎታቸውን ይባርክ፡፡)

ጳውሎስ ለአማኞች ስለ ሕይወቱ ምላሌነት ያስታውሳቸዋል (1ኛ ተሰ. 2:1-20)

የጳውሎስ አገልግሎት በተሳሳተ ፍላጎት የተሞላ ነው የሚሉ ከሳሾች ሳይነሡ አልቀሩም። አንዳንድ ሰዎች ጳውሎስ ሰዎችን ለማስደሰት እንደሚሞክርና ገንዘብ የመሰብሰብ ዓላማ እንዳለው ለተሰሎንቄ አማኞች ሳይናገሩ አልቀሩም። በመሆኑም ጳውሎስ እነዚህ ክሶች እውነት ሊሆኑ የማይችሉባቸውን ምክንያቶች ይዘረዝራል።

ሀ) ጳውሎስ በተሰሎንቄ ከመቆየት ያገኘው ነገር ቢኖር ተጨማሪ ቁሳቁስ ሳይሆን ስደትን ነበር። ከስደቱ ሥቃይ ባሻገር ጳውሎስ የወንጌል ስብከት አገልግሎቱን ቀጥሏል።

ለ) በሚሰብኩበት ጊዜ ትምህርታቸውን ለማሳየት ከሚፍጨረጨሩት የሃይማኖት ሊቃውንት በተቃራኒ፥ ጳውሎስ መልእክቱ ቀላል እንደነበረ ያስረዳል። ዓላማውም ሰዎችን ማስደነቅ ሳይሆን እውነትን በግልጽ ማብራራት ነበር።

ሐ) ሰዎች ገንዘብ እንዲከፍሏቸው ከሚያስገድዱ ሌሎች የሃይማኖት መሪዎች በተቃራኒ፥ ጳውሎስ ከተሰሎንቄ አማኞች ምንም ገንዘብ እንዳልተቀበለና የራሱን የኑሮ ወጪ ለመክፈል በእጆቹ ተግቶ ይሠራ እንደነበር ያስረዳል።

መ) ጳውሎስ ሲላስና ጢሞቴዎስ የግል ሕይወታቸውን በመጠበቅ፥ በቅድስና፥ በጽድቅና እንከን በሌለው ሕይወት እንደ ተመላለሱ ያስረዳል። አንድ ጊዜም የተሰሎንቄን ሕዝብ በማታለል ወይም በማጭበርበር ሊጠቀሙባቸው አልሞከሩም ነበር።

ጳውሎስ አገልግሎቱን ካቀረበበት ሁኔታ የተነሣ የተሰሎንቄ አማኞች በክርስቶስ ባመኑ ጊዜ በጳውሎስ ላይ ጥገኞች አልሆኑም። ነገር ግን በእግዚአብሔርና በደኅንነት ስጦታው፥ ብሎም በጥበቃው ላይ ተደግፈዋል።

ሠ) ጳውሎስ የተሰሎንቄን አማኞች ከመተው ይልቅ ከልቡ ያፈቅራቸውና ብዙ ጊዜ ወደ ተሰሎንቄ ተመልሶ የተቋረጠ አገልግሎቱን ለመቀጠል ሲሞክር ቆይቷል። ነገር ግን ሰይጣን ከልክሎታል። ሰይጣን ጳውሎስን እንዴት እንደ ከለከለው አልተገለጸም። ምናልባትም ጳውሎስ ይህን ሲል የአይሁዶች ተቃውሞ መቀጠሉንና ወደ ተሰሎንቄ ተመልሶ ቢመጣ እዚያ በሚገኙት አማኞች ላይ ተጨማሪ ስደት ሊያስከትል መቻሉን ለማመልከት ይሆናል። ጳውሎስ ይህንን ለማድረግ ስላልፈለገ ወደ ተሰሎንቄ ሳይሄድ ቀርቷል። ጳውሎስ ከአይሁዶች ስደት በስተጀርባ የሰይጣን እጅ እንደ ነበረበት ለመመልከት ችሎ ነበር።

የውይይት ጥያቄ፡- የቤተ ክርስቲያን መሪዎች ከአባሎቻቸው ጋር ምን ዓይነት ግንኙነት ሊኖራቸው እንደሚገባ ከጳውሎስ ምን እንማራለን። አንዳንድ ጠቃሚ ነጥቦችን ዘርዝር።

(ማብራሪያው የተወሰደው በ ኤስ.አይ.ኤም ከታተመውና የአዲስ ኪዳን የጥናት መምሪያና ማብራሪያ፣ ከተሰኘው መጽሐፍ ነው፡፡ እግዚአብሔር አገልግሎታቸውን ይባርክ፡፡)

ጳውሎስ ስለ ተሰሎንቄ አማኞች እግዚአብሔርን ያመሰግናል (1ኛ ተሰ. 1:1-10)

ገብረ እግዚአብሔር በክርስቶስ ካመነ ብዙም ሳይቆይ እናቱ ከዚህ ዓለም በሞት ተለየች። እናቱም እንደ እርሱ አዲስ አማኝ ነበረች። ገብረ እግዚአብሔር እናቱን ከልቡ ይወዳት ስለነበር ልቡ በኀዘን ቆሰለ። አሁን ምን ዓይነት ሁኔታ ውስጥ ይሆን ያለችው ሲል አሰበ። በሥቃይ ርዶ ድምፁን ጮክ አድርጎ አለቀሰ። ሌላ ክርስቲያን ሲያለቅስ ሰምቶት ክርስቲያኖች ሊያለቅሱ አይገባም ሲል በብርቱ ገሠጸው። የገብረ እግዚአብሔር ዘመዶች በአብዛኛው ክርስቲያኖች ባለመሆናቸው እናቱ ጥንታዊ ልማዶች በሚጠይቁት መንገድ እንድትቀበር የግድ አሉ። ምንም እንኳን ገብረ እግዚአብሔር እናቱ በክርስቲያናዊ መንገድ እንድትቀበር ቢፈልግም፥ ለዘመዶቹ ሲል በባህላዊ መንገድ እንድትቀበር አደረገ። ይህም ባህላዊ የአቀባበር ሥርዓት ድምፅን ጮክ አድርጎ ማልቀስን፡ ደረት መምታትንና፥ ከፊት ላይ ጭቃ መለጠፍን እና ሌሎችንም ተመሳሳይ ተግባራትን ይጨምር ነበር።

የውይይት ጥያቄ፡- ሀ) ለክርስቲያኖች የምንወዳቸው ሰዎች በሚሞቱበት ጊዜ ምን ዓይነት ምላሽ መስጠት እንዳለብን እግዚአብሔር ከእኛ የሚጠብቀውን ነገር ማወቁ ለምን ያስፈልጋል? ለ) እግዚአብሔር ለክርስቲያኖች እንደ አማኞች በምንሞትበት ጊዜ የምናገኘውን ተስፋ ማወቁ ለምን ያስፈልጋል? ሐ) አንድ ሰው በሚሞትበት ጊዜ በማልቀስ (ክርስቶስ እንዳደረገው ዮሐ 11፡35 አንብብ) እና ዛሬ ብዙ ሰዎች እንደሚያደርጉት በከንቱ በመጮህ መካከል ያለው ልዩነት ምንድን ነው?

ሞት ለአማኞችም ሆነ ለማያምኑ ሰዎች የማይቀር ነገር ነው። ሞት ወደዚህ ዓለም የመጣው አዳምና ሔዋን መጀመሪያ ኃጢአት በሠሩበት ጊዜ ሲሆን እስከ መጨረሻው ዘመን ድረስ የሚቀጥል ይሆናል። የኋላ ኋላ ግን ክርስቶስ ሞትን ያስወግደዋል (ራእ. 21፡4)። ክርስቲያኖችና ክርስቲያን ያልሆኑ ሰዎች በሚሞቱበት ጊዜ ምን እንደሚከሠት ማወቁ ለአማኞች በጣም አስፈላጊ ነው። ጳውሎስ ከተሰሎንቄ አማኞች ጋር ጥቂት ጊዜ ብቻ እንዳሳለፈ ስደት በመከሠቱ ስፍራውን ለቅቆ ለመሄድ ተገድዶ ነበር። የተሰሎንቄ አማኞች ካልተማሯቸው ነገሮች አንዱ የአማኞች ሞትና ያም ሞት ከክርስቶስ መመለስ ጋር የሚዛመድበት ሁኔታ ነበር። ጳውሎስ ከተሰሎንቄ ከተሰናበተ በኋላ አንዳንድ ክርስቲያኖች በሞት የተለዩ ይመስላል። በዚህን ጊዜ የተሰሎንቄ አማኞች «የምንወዳቸውን ወገኖች እንደገና እናያቸው ይሆን? ከሞት በኋላ ተስፋና ሕይወት አለን? የሞቱት አማኞች የክርስቶስን ክብርና የንግሥና በረከት አያገኙም ማለት ነውን? የሞቱ ወገኖቻችንን በምንቀብርበት ጊዜ ጥንታዊውን ባህል መከተል አለብን ወይስ የተለየ ነገር ማድረግ አለብን?» እነዚህና ሌሎችም ጥያቄዎች የተሰሎንቄን አማኞች ያስጨንቋቸው ነበር። ጳውሎስ ሞት ለአማኞች የተለየ ነገር መሆኑን ይናገራል። ከኢየሱስ ክርስቶስ ትንሣኤ የተነሣ አማኞች ከሞት እንደሚነሡ ዋስትና ተሰጥቷቸዋል። ስለሆነም ሞትን መፍራት የለብንም። መሞት ወይም ከሥጋ መለየት ማለት ከጌታ ጋር መሆን ማለት ነውና። በሞት የተለዩን ወንድሞቻችን የክርስቶስን የንግሥና በረከት ሳያገኙ ይቀሩ ይሆን? ለሚለው የተሰሎንቄ አማኞች ፍርሃት ጳውሎስ አጥጋቢ ምላሽ ሰጥቷል። ጳውሎስ እንዳብራራው የሞቱት አማኞች በሕይወት ያሉት አማኞች ከመለወጣቸው አስቀድመው ከሞት እንደሚነሡና በቀዳሚነት የበረከቱ ተካፋዮች እንደሚሆኑ አስረድቷል። ከዚህም ተስፋ የተነሣ የክርስቲያኖች የቀብር ሥነ ሥርዓት ተስፋ ቢስነት የሚታይበት ጊዜ ሊሆን አይገባም። ይህ ጊዜ የክርስቶስን የትንሣኤ ተስፋ የሚፈነጥቅ ሊሆን ይገባል። ለዚህ ነው ጳውሎስ ተስፋ እንደሌላቸው ዓለማውያን አናዝንም የሚለው። የምናለቅሰው ለጊዜው ከወገኖቻችን በመለየታችን ብቻ ነው። ይህም አንድ ሰው ወደ አሜሪካ ወይም ወደ ሌላ ቦታ በሚሄድበት ጊዜ እንደምናዝን ማለት ነው።

ሁለቱም የተሰሎንቄ መልእክቶች የሚጀምሩት በሦስት የቤተ ክርስቲያን መሪዎች ሰላምታ ነው። እነዚህም መሪዎች ከሦስት ወራት በፊት ወደ ተሰሎንቄ የክርስቶስን ወንጌል ያመጡ አገልጋዮች ነበሩ። የመልእክቱ ጸሐፊ ጳውሎስ ሲሆን፥ ሲላስና ጢሞቴዎስም አብረውት በቆሮንቶስ ነበሩ። ሁሉም አገልጋዮች ለሚወዷቸው አማኞች ሰላምታቸውን ልከዋል።

ጳውሎስ ከተሰሎንቄ አማኞች ጋር ያሳለፈው የአንድ ወር ወይም የስድስት ሳምንታት ጊዜ ሊዘነጋ የማይችል ነበር። ጳውሎስ ስለ ደኅንነታቸውና በስደት ውስጥ ለክርስቶስ ታማኞች ሆነው ስለ መጽናታቸው ከጢሞቴዎስ ሲሰማ ልቡ በምስጋና ተሞላ። በዚህም ምክንያት እግዚአብሔርን ያመሰግናሉ። በመሆኑም ጳውሎስ እነዚህን አዳዲስ አማኞች በእምነታቸው ለማበረታታት ሲል መልእክቶቹን ጽፎአል።

ሀ) ጳውሎስ በሕይወታቸው ስለ ተከሠቱት ለውጦች የሰማውን አሳብ በመግለጽ አማኞቹን ያበረታታል። በተለይም በአማኞቹ ሕይወት ውስጥ የተከሠቱትን ሦስት ቀዳማይ ጉዳዮች ይዘረዝራል።

በመጀመሪያ፡- ከእምነት የተገኘ የሥራ ፍሬ ነበራቸው። ምንም እንኳ የሚያድነን በኢየሱስ ክርስቶስ ሞት ማመናችን ቢሆንም፥ እግዚአብሔር እምነታችን ፍሬ እንዲያፈራ ይፈልጋል። እምነታችን አኗኗራችንን፥ አስተሳሰባችንንና አተገባበራችንን ይለውጠዋል። እምነታቸው የአእምሮ እውቀት ብቻ ሳይሆን፥ አኗኗራቸውን፥ በችግር ውስጥ ያሉትን ሰዎች የሚረዱበትን መንገድ፥ ወንጌሉን የሚመሰከሩበትን ሁኔታ፥ ወዘተ… ተቆጣጥሯል።

ሁለተኛ፡- የተሰሎንቄ አማኞች ተግባራቸውን ያከናወኑት በፍቅር ነበር። እነዚህ ሰዎች እግዚአብሔርን ይወዱትና እርስ በርሳቸውም ይዋደዱ ነበር። ፍቅር ስሜት ሳይሆን ተግባር ነው። ከዚህም ፍቅር የተነሣ የተሰሎንቄ አማኞች ለእግዚአብሔር ክብር ተግተው ሠርተዋል። በችግር ጊዜ በተለይም በከባድ ስደት ውስጥ በሚያልፉበት ጊዜ እርስ በርሳቸው ተረዳድተዋል።

ሦስተኛ፡- በጌታ በኢየሱስ ክርስቶስ ከማመናቸው የመነጩ የተስፋ ጽናት ነበራቸው። በክርስቶስ እንዳመኑ ስደት ሲደርስባቸው በታማኝነት ጸንተው እንዲቆዩ ያደረጋቸው ምን ነበር? ተስፋቸው ነበር። ይህም ክርስቶስ ዳግም እንደሚመጣና እንደሚሸልማቸው መገንዘባቸው ነበር። ከዚህም የተነሣ የተሰሎንቄ አማኞች ስደትንና የተለያዩ ችግሮችን በታማኝነት ተጋፍጠዋል።

የውይይት ጥያቄ፡- ሀ) እነዚህ ሦስት ነገሮች ለእያንዳንዱ ክርስቲያን ለምን አስፈላጊዎች እንደሚሆኑ አብራራ። ለ) በሕይወትህ እነዚህ ሦስቱ ባሕርያት የሚገኙት እንዴት ነው?

ጳውሎስ የተሰሎንቄ አማኞች የተለወጠ ሕይወት፥ ከጣኦት አምልኮ የተመለሱበት ሁኔታና ኢየሱስ ክርስቶስን በማገልገል ምጽአቱን መጠበቃቸው በመቄዶኒያ ብቻ ሳይሆን ከአካይያ ጭምር እንደታወቀ ያስረዳል። አካይያ ጳውሎስ በዚህ ጊዜ ወንጌሉን በሚሰብክበት በቆሮንቶስ ከተማ አካባቢ የምትገኝ ስፍራ ነበረች። ይህ ክርስቶስን ካወቁ የስድስት ወራት ዕድሜ ለነበራቸው አማኞች ምንኛ ታላቅ ምስክርነት ነው።

ለ) ጳውሎስ ከእግዚአብሔር ጋር ስለነበራቸው ልዩ ግንኙነት በመመስከር አማኞችን ያበረታታል። ጳውሎስ የመረጣቸው እግዚአብሔር የተሰሎንቄን አማኞች እንደሚወዳቸው ገልጾአል። ከደረሰባቸው ስደትና ችግር ባሻገር፥ እግዚአብሔር ምን ያህል እንደሚወዳቸው ማስታወስ ያስፈልጋቸው ነበር።

ወንጌል መጀመሪያ ወደ ተሰሎንቄ ሲመጣ ከእግዚአብሔር የመነጨ እንጂ ከንቱ ተስፋ እንዳልሆነ በሚያረጋግጥ መልኩ በታላቅ ኃይል ነበር የተገለጠው። ወንጌል ወደ ተሰሎንቄ አማኞች የመጣው በቃላት ብቻ አይደለም። ጳውሎስ በመካከላቸው ወንጌሉን በመኖር መልካም ምሳሌ ሆኗቸው ነበር። ይህ ማለት ግን ክርስቶስን ለመከተል የደረሱበት ውሳኔ ቀላል ነበር ማለት አይደለም። አይሁዶች በጳውሎስ ላይ ስደትን እንዳደረሱ ሁሉ በተሰሎንቄ አማኞች ላይም አይሁዶችና አሕዛብ ከፍተኛ ስደት በማስከተል ላይ ነበሩ። ነገር ግን በቶሎ ይመጣል ብለው በሚያምኑት በክርስቶስ ላይ ጽኑ እምነት ስለነበራቸው በእምነታቸው ጸንተው ቆመዋል።

(ማብራሪያው የተወሰደው በ ኤስ.አይ.ኤም ከታተመውና የአዲስ ኪዳን የጥናት መምሪያና ማብራሪያ፣ ከተሰኘው መጽሐፍ ነው፡፡ እግዚአብሔር አገልግሎታቸውን ይባርክ፡፡)

የ1ኛና 2ኛ ተሰሎንቄ መልእክቶች ዓላማ፣ ልዩ ባሕሪያት እና አስተዋጽኦ

የ1ኛና 2ኛ ተሰሎንቄ መልእክቶች ዓላማ

የመጀመሪያው ዓላማ፡- ጳውሎስ ከተሰሎንቄ ከተማ ብዙም ሳይቆይ በፍጥነት መውጣት ስለነበረበት አማኞቹን በእግዚአብሔር ቃል ለማስታጠቅ የሚበቃ ጊዜ አላገኘም ነበር። ከዚህም በላይ የተሰሎንቄ ቤተ ክርስቲያን በከፍተኛ ስደት ውስጥ ነበረች። በመሆኑም ጳውሎስ እነዚህ ጥቂት አማኞች ለክርስቶስ ታማኞች እንዲሆኑና በዚህ በጥላቻ በተሞላው አካባቢ እግዚአብሔር እንደሚፈልገው እንዴት ሊኖሩ እንደሚገባቸው ለማስተማር ፈለገ።

ሁለተኛ ዓላማ፡- የተሰሎንቄ አማኞች ስለ መጨረሻው ዘመን ብዙ ያልተገነዘቧቸው ነገሮች ነበሩ። ጳውሎስ እነዚህን ነገሮች ሊያብራራቸው ፈለገ። ጳውሎስ ለተሰሎንቄ የጻፈው መልእክት ስለ መጨረሻው ዘመን ቁልፍ አሳቦችን አካትቷል። ከዚህ የበለጡ ዝርዝር ጉዳዮችን በአዲስ ኪዳን ውስጥ የምናገኘው ከክርስቶስ ትምህርቶችና ከዮሐንስ ራእይ መጽሐፍ ውስጥ ብቻ ነው። በተሰሎንቄ መልእክት ውስጥ ጳውሎስ ካነሣቸው ጉዳዮች መካከል የሚከተሉት ይገኙባቸዋል።

ሀ) ጳውሎስ የሞቱት ክርስቲያኖች ምን እንደሚገጥማቸው ያብራራል። ምንም እንኳን የተሰሎንቄ ቤተ ክርስቲያን አዲስ ብትሆንም፥ ከአባሎቻቸው አንዳንዶቹ በሞት የተለዩአቸው ይመስላል። ወይም ደግሞ የተሰሎንቄ አማኞች ጥያቄ ክርስቲያኖች በሚሞቱበት ጊዜ ምን ያጋጥማቸው ይሆን የሚለው ሊሆን ይችላል። ክርስቶስ በሚመለስበት ጊዜ በሕይወት ያሉት አማኞች የሚያገኙዋቸውን በረከቶች ያጡ ይሆን? ጳውሎስ በእነዚህ ጥያቄዎች ላይ በመመሥረት ለክርስቲያን ሞት ማለት ምን ማለት እንደሆነና የሞቱ ክርስቲያኖች ክርስቶስ በሚመለስበት ጊዜ ምን እንደሚያጋጥማቸው ያብራራል። ጳውሎስ አማኞች በታማኝነት በመመላለስ የክርስቶስን ምጽአት እንዲጠባበቁ ያበረታታቸዋል። ይህም ክርስቶስ በሚመለስበት ጊዜ ለሀፍረት እንዳይጋለጡ ይጠብቃቸዋል።

ለ) የሐሰት ትምህርቶችና ደብዳቤዎች በየአብያተ ክርስቲያናቱ ይሠራጩ የነበረ ይመስላል። እነዚህ የሐሰት ትምህርቶች ስለ ክርስቶስ ምጽአት የተሳሳቱ ሐሳቦችን ያስተላልፉ ነበር (2ኛ ተሰ. 2፡1-3)። የክርስቶስ ምጽአት እንደቀረበ በማሰብ አንዳንድ አማኞች ሥራዎቻቸውን አቁመው ይጠባበቁት ነበር። ጳውሎስ እነዚህ አማኞች ክርስቶስ የሚመጣበትን ጊዜ ከመገመት እንዲታቀቡ ይመክራቸዋል (2ኛ ተሰ. 2፡2)። ነገር ግን የጌታቸውን መመለስ በሚጠባበቁበት ጊዜ በታማኝነት ክርስቲያናዊ ጉዟቸውን እንዲቀጥሉና የዕለት ተግባሮቻቸውን እንዲያከናውኑ ያበረታታቸዋል።

ሐ) አንዳንድ አማኞች ደግሞ ክርስቶስ ቀደም ብሎ እንደ ተመለሰና እነርሱ ግን ሳያገኙት እንደ ቀሩ ያስቡ ነበር። ለእነዚህ አማኞች ጳውሎስ የክርስቶስ ምጽአት በሚደርስበት ጊዜ ሁኔታዎች ምን እንደሚመስሉና ክርስቶስ ከመምጣቱ በፊት ደግሞ ሐሳዊ መሢሕ መገለጥ እንዳለበት ይናገራል። ጳውሎስ ከየትኞቹም መልእክቶቹም በበለጠ ስለዚህ ክፉ መሪ በዚህ የተሰሎንቄ መልእክት ውስጥ በሰፊው ያብራራል። ጳውሎስ ይህንን መሪ የዐመፅ ሰው ሲል ይጠራዋል።

መ) ወንጌሉን ለመቀበል በማይፈልጉት ሰዎች ላይ አንድ ቀን የእግዚአብሔር ፍርድ እንደሚመጣ በመግለጽ ጳውሎስ በስደት ውስጥ የነበሩትን ክርስቲያኖች ለማበረታታት ፈለገ። በክርስቶስ ለማመን ለማይፈልጉና በአማኞች ላይ ስደትን የሚያመጡ ሰዎች አንድ ቀን ለዘላለማዊ ቅጣት ይጋለጣሉ። በታማኝነት የጸኑ አማኞች ግን ሽልማትንና የዘላለም ሕይወትን ያገኛሉ።

የውይይት ጥያቄ፡– እነዚህን እውነቶች ማወቅ ለክርስቲያኖች ጠቃሚ የሚሆነው ለምንድን ነው?

ሦስተኛ ዓላማ፡- አማኞች ከወሲባዊ ኃጢአቶች ራሳቸውን እንዲጠብቁ ለማበረታታት? (1ኛ ተሰ. 4፡1-8)

አራተኛ ዓላማ፡- በተሰሎንቄ የነበሩት አይሁዶች ጳውሎስ ገንዘብን ብቻ እንደሚፈልግና ለተሰሎንቄ አማኞች ምንም ዓይነት ፍቅር እንዳልነበረው በመግለጽ ስሙን ያጠፉ የነበረ ይመስላል። እነዚህ ከሳሾች ጳውሎስ ምንም ዓይነት መለኮታዊ የሐዋርያነት ሥልጣን እንዳልነበረው ይናገሩ ነበር። ይህ አዳዲስ አማኞችን ግራ ሊያጋባቸው ስለሚችል በአንደኛ ተሰሎንቄ ውስጥ ስለ ሐዋርያዊ አገልግሎቱ እነርሱን ለማገልገል ስላነሣሣው ፍላጎት ያብራራል።

የ1ኛና 2ኛ ተሰሎንቄ ልዩ ባሕርያት

1) በ1ኛና 2ኛ ተሰሎንቄ መልእክቶች ውስጥ ስለ መጨረሻው ዘመን ብዙ ትምህርቶችን እናገኛለን። እንዲያውም ከ2ኛ ተሰሎንቄ መልእክቶች ውስጥ አንድ ሦስተኛው ክርስቶስ ሊመለስ ሲል ስለሚሆኑት ሁኔታዎች የሚያብራራ ነው።

2) እነዚህ ጳውሎስ ከጻፋቸው መልእክቶች ሁሉ ቀዳሚዎቹ ናቸው። ምናልባትም ከእነዚህ መልእክቶች በፊት የተጻፈው የገላትያ መልእክት ሊሆን ይችላል።

የ1ኛና 2ኛ ተሰሎንቄ መልእክቶች አስተዋጽኦ

1ኛ ተሰሎንቄ፡- ከሌሎቹ መልእክቶቹ በተለየ ሁኔታ ጳውሎስ በዚህ መልእክት ውስጥ መጀመሪያ አስተምህሯዊ ቀጥሎ ደግሞ ተግባራዊ አኗኗርን አላሰፈረም። ነገር ግን 1ኛ ተሰሎንቄ በሚከተሉት ሁለት ክፍሎች ተከፍሏል፡-

  1. ጳውሎስ የተሰሎንቄ ክርስቲያኖችን እምነትና ከእነርሱ ጋር የነበረውን ግንኙነት ይከልሳል (1ኛ ተሰ. 1-3)።

ሀ. ጳውሎስ ስለ ተሰሎንቄ አማኞች እግዚአብሔርን ያመሰግናል (1ኛ ተሰ. 1)።

ለ. ጳውሎስ አማኞቹ ምሳሌያዊ ሕይወት እንዲኖሩ ያሳስባቸዋል (1ኛ ተሰ. 2)።

ሐ. ጳውሎስ የጢሞቴዎስን ዘገባ (ሪፖርት) ከሰማ በኋላ ደስ መሰኘቱን ይገልጻል (1ኛ ተሰ. 3)።

  1. ጳውሎስ የተሰሎንቄ አማኞች የክርስቶስን ምጽአት እየተጠባበቁ እንዴት ሊመላለሱ እንደሚገባ ያሳስባቸዋል (1ኛ ተሰ. 4-5)።

ሀ. ጳውሎስ አማኞች የተቀደሰ የፍቅርና የሰላም ሕይወት እንዲመሩ ያሳስባቸዋል (1ኛ ተሰ. 4፡1-12)።

ለ. ክርስቶስ በድንገት ሲገለጥ የሞቱ አማኞች ምን እንደሚሆኑ ያብራራል (1ኛ ተሰ. 4፡13-5፡12)።

ሐ. ጳውሎስ አማኞች መሪዎቻቸውን እንዲያከብሩ ይመክራቸዋል (1ኛ ተሰ. 5፡12-28)።

2ኛ ተሰሎንቄ፡-

  1. ጳውሎስ አሳዳጆቻቸው ክርስቶስ በሚመለስበት ጊዜ ፍርድን እንደሚቀበሉ በመግለጽ በመከራ ውስጥ ያሉትን አማኞች ያበረታታቸዋል (2ኛ ተሰ. 1)

2.ጳውሎላ የዐመፁ ሰው ሳይገለጽ ክርስቶስ እንደማይመለስና እማኞች በታማኝነት ሊኖሩ እንደሚገባ ያብራራል (2ኛ ተሰ. 2)።

  1. ጳውሎስ አማኞች የክርስቶስን መመለስ ሲጠባበቁ ክርስቶስን በትጋት እንዲያገለግሉ ያሳስባቸዋል (2ኛ ተሰ. 3)።

(ማብራሪያው የተወሰደው በ ኤስ.አይ.ኤም ከታተመውና የአዲስ ኪዳን የጥናት መምሪያና ማብራሪያ፣ ከተሰኘው መጽሐፍ ነው፡፡ እግዚአብሔር አገልግሎታቸውን ይባርክ፡፡)