የማቴዎስ ወንጌል ጥናት መምሪያ እና ማብራሪያ
ምልከታ እና ትርጓሜ
ጌታ ኢየሱስ በተራራው ስብከቱ ላይ ደቀ መዛሙርቱን “እናንተ የምድር ጨው ናችሁ” እና “እናንተ የዓለም ብርሃን ናችሁ” በማለት ጠራቸው። ይህ አገላለጽ አማኞች በዚህ ዓለም ውስጥ ስላላቸው ማንነትና ሊያሳድሩት ስለሚገባው ተጽዕኖ እጅግ ጥልቅ ትርጉም የሚሰጥ ነው። ጌታ የመረጣቸው እነዚህ ምስሎች ጨውና ብርሃን በዕለት ተዕለት ሕይወት ውስጥ እጅግ አስፈላጊና የማይተኩ መሆናቸውን ያሳያሉ።
የምድር ጨው የመሆን ምስጢር
ጨው በሁለት ዋና ዋና ጠቀሜታዎቹ ይታወቃል። አንደኛው ምግብ እንዳይበላሽ የመከላከልና የመጠበቅ (preservation) ኃይል ሲኖረው፣ ሁለተኛው ደግሞ ጣዕም የመስጠት ችሎታው ነው። በዚያ ዘመን ማቀዝቀዣ ስላልነበረ ሥጋና ዓሣ እንዳይበላሽ ጨው ተቀብቶ ይቀመጥ ነበር። ክርስቲያኖችም በኃጢአት በሰበሰበና በበሰበሰ ዓለም ውስጥ ሆነው፣ ዓለም በክፋትና በሞራል ዝቅጠት እንዳትጠፋ የመጠበቅ ኃላፊነት አለባቸው። በንግግራችን፣ በባሕሪያችንና በሥራችን ለዓለም ጣዕም የምንሰጥና ቅድስናን የምናሳይ መሆን አለብን። ሆኖም ጨው ጣዕሙን ካጣ ምንም ፋይዳ እንደሌለውና ወደ ውጭ ተጥሎ በሰው እግር እንደሚረገጥ ጌታ አስጠንቅቋል። ይህ ማለት አንድ አማኝ የክርስትና ሕይወቱን ካጣና ከዓለም ጋር ከተመሳሰለ ተጽዕኖ የማሳደር አቅሙን ያጣል።
የዓለም ብርሃንና የሚታይ ሕይወት ብርሃን ጨለማን የማሸነፍና መንገድን የማሳየት ተፈጥሮ አለው። ጌታ ኢየሱስ ተከታዮቹን “በተራራ ላይ ያለች ከተማ ልትሰወር አይቻላትም” በማለት ገልጿቸዋል። ብርሃን በቅርጫት ሥር አይቀመጥም፤ ይልቁንም በቤት ውስጥ ላሉት ሁሉ እንዲበራ በመቅረዝ ላይ ይቀመጣል። እኛም ክርስቲያኖች ብርሃናችንን በሰዎች ፊት ማብራት አለብን። ይህ ብርሃን የምናደርገው መልካም ሥራችን ነው። ሰዎች የእኛን መልካም ተግባር ሲያዩ በሰማያት ያለውን አባታችንን እንዲያከብሩ መንገዱን መጥረግ ይኖርብናል። ክርስትና በሚስጥር የሚደበቅ ሳይሆን፣ በተግባር
ተገልጦ ለሌሎች አቅጣጫ የሚሰጥ መሆን አለበት።
ተግባራዊ ምሳሌ
ይህንን እውነት በምሳሌ ለመረዳት ያህል፦ አንዲት እናት በአንድ ትልቅ ድስት ወጥ ስትሠራ የምትጨምረው የጨው መጠን ከወጡ አንጻር እጅግ በጣም ትንሽ ነው። ነገር ግን ያቺ ትንሽ ጨው የድስቱን ሙሉ ወጥ ጣዕም ትቀይረዋለች። ክርስቲያኖች በቁጥር ጥቂት ብንሆንም፣ በምንኖርበት ማኅበረሰብ ውስጥ የምናሳየው ታማኝነት፣ ቅንነትና ፍቅር ግን ሙሉውን ማኅበረሰብ የመለወጥ ኃይል አለው። ልክ እንደዚሁ በአንድ ፍጹም ጨለማ ክፍል ውስጥ አንዲት ትንሽ ሻማ ብትበራ፣ ክፍሉን ሙሉ በሙሉ መቆጣጠር ባትችል እንኳን ለሚራመድ ሰው አደጋ እንዳይደርስበት መንገዱን ታሳያለች። የእኛም ሕይወት በዚህ ጨለማ ዓለም ውስጥ ለሰዎች ወደ ክርስቶስ የሚያደርስ ብርሃን ሊሆን ይገባል።
ለሕይወታችን የሚሆን ትምህርት
ከዚህ ክፍል የምንረዳው ትልቁ ቁም ነገር ጨውና ብርሃን መሆን ምርጫ ሳይሆን የክርስቲያን ማንነት መሆኑን ነው። ጌታ “ጨውና ብርሃን ለመሆን ሞክሩ” አላለም፤ ይልቁንም “ናችሁ” ነው ያለው። ስለዚህ ዋነኛው ጥያቄ “እኔ ባለሁበት ቦታ ተጽዕኖ እያሳደርኩ ነው ወይ?” የሚለው ነው። ንግግራችን በጨው የተቀመመና ለሰሚው ጸጋን የሚሰጥ ሊሆን ይገባል። በሥራ ቦታችን፣ በትምህርት ቤታችን ወይም በቤተሰባችን መካከል የእግዚአብሔርን ማንነት የሚያንጸባርቅ ብርሃን ሆነን መገኘት አለብን። የምናደርገው እያንዳንዱ መልካም ሥራ የእግዚአብሔርን ስም የሚያስከብር መለኮታዊ ብርሃን ነው።
ተግባራዊ የውይይት ጥያቄዎች
👉ጨው “ጣዕሙን ቢያጣ” የሚለው ማስጠንቀቂያ ለዛሬዋ ቤተ ክርስቲያን ምን ትርጉም አለው?
👉ክርስቲያኖች እንደ ብርሃን ሆነው “በተራራ ላይ ያለች ከተማ” መሆናቸው በምን ተግባር ይገለጣል?
👉”መልካሙን ሥራችሁን አይተው…” የሚለው ቃል ከታይታ ሥራ እንዴት ይለያል?
👉ጨው በብዛት ሳይሆን በጥቂቱ ተፅዕኖ እንደሚፈጥር ሁሉ የክርስቲያኖች ሚና በኅብረተሰቡ ውስጥ እንዴት ይታያል?
👉ብርሃንን ከዕንቅብ በታች መደበቅ ማለት በክርስቲያናዊ ሕይወት ውስጥ ምን ማለት ነው?
👉ዓለም ጨለማ እንደሆነችና ብርሃን እንደሚያስፈልጋት ኢየሱስ በዚህ ምሳሌ እንዴት አሳየ?
👉የቤተ ክርስቲያን ተፅዕኖ በዓለም ላይ ካልታየ ምን ዓይነት አደጋ ይኖረዋል?
👉”ጣዕም” ያለው ክርስቲያን ለመሆን ምን ማድረግ ይገባል?
👉ብርሃንነታችን ለሰዎች እንጂ ለራሳችን እንዳልሆነ እንዴት እንረዳለን?
👉ጨው እና ብርሃን የጋራ ጥቅምን (Common Good) እንዴት ይወክላሉ?