የማቴዎስ ወንጌል ጥናት መምሪያ እና ማብራሪያ
ምልከታ እና ትርጓሜ ጌታ ኢየሱስ ክርስቶስ በገሊላ ባሕር አጠገብ ወዳለው ተራራ በወጣ ጊዜ ብዙ ሕዝብ ተከተሉት። በዚያም አንካሶችን፣ ዕውሮችን፣ ዲዳዎችንና ሌሎችንም ብዙ ሕሙማንን ወደ እርሱ አመጡ፤ እርሱም ፈወሳቸው። ሕዝቡም ዲዳዎች ሲናገሩ፣ አንካሶች ሲድኑ፣ ዕውሮችም ሲያዩ ባሉ ጊዜ በእጅጉ ተገረሙ፤ የእስራኤልንም አምላክ አከበሩ። ይህ የሚያሳየው ጌታ ለሰው ልጆች ሥቃይ ያለው ጥልቅ ርኅራኄ በንግግር ብቻ ሳይሆን በተግባር የሚገለጥ መሆኑን ነው።
በምድረ በዳ የተዘረጋው ሁለተኛው ማዕድ
ሕዝቡ ከጌታ ጋር ሦስት ቀን ስለቆዩና የሚበሉት ስለሌላቸው ጌታ አዘነላቸው። “በመንገድ እንዳይዝሉ በጾማቸው ላሰናብታቸው አልወድም” በማለት ለደቀ መዛሙርቱ ተናገረ። ደቀ መዛሙርቱ ግን አሁንም “በዚህ ምድረ በዳ ይህን ሁሉ ሕዝብ የሚያጠግብ እንጀራ ከወዴት ይገኛል?” በማለት መጠራጠራቸውን ቀጠሉ። ጌታ ሰባት እንጀራና ጥቂት ትናንሽ ዓሦችን ወስዶ ካመሰገነ በኋላ ባረካቸው። አራት ሺህ ወንዶች፣ ሴቶችና ሕፃናት ጠግበው ከበሉ በኋላ ሰባት ቅርጫት ሙሉ ቁርጥራጭ ተረፈ።
ይህንን በምሳሌ ለመረዳት ያህል፦ አንድ አባት ልጆቹን ወደ ጫካ ሽርሽር ይዞ ሄዶ ምግባቸው ቢያልቅባቸው፣ ልጆቹ ቢጨነቁ እንኳ አባቱ አስቀድሞ ያሰበበትና ያዘጋጀው መኖሩን ሲያውቁ ጭንቀታቸው ወደ ደስታ ይለወጣል። ጌታም በሕይወታችን ምድረ በዳ ውስጥ ስንሆን የሚያስፈልገንን ሁሉ አስቀድሞ የሚያውቅና የሚያቀርብ ታማኝ እረኛ ነው።
የምልክት ፈላጊዎች ግትርነትና የዮናስ ምልክት
ከዚህ ታላቅ ተአምር በኋላ ፈሪሳውያንና ሰዱቃውያን ሊፈትኑት መጥተው ከሰማይ ምልክት እንዲያሳያቸው ለመኑት። ጌታ ግን የሰማዩን መልክ አይተው የአየሩን ሁኔታ መለየት እንደሚችሉ፣ ነገር ግን የዘመኑን ምልክቶች ማለትም የመሲሑን መምጣት መለየት አለመቻላቸውን ገሠጻቸው። ምልክት ለሚፈልግ ክፉና አመንዝራ ትውልድ ከነቢዩ ዮናስ ምልክት በቀር ሌላ ምልክት እንደማይሰጠው ነገራቸው። የዮናስ ምልክት የጌታን ሞትና በሦስተኛው ቀን የሚሆነውን ትንሣኤ የሚያመለክት ነው። እውነተኛ እምነት ተአምራትን በመከተል ላይ ሳይሆን፣ በክርስቶስ የማዳን ሥራና በቃሉ ላይ በመታመን ላይ ይመሠረታል።
የፈሪሳውያንና የሰዱቃውያን እርሾ ጌታና ደቀ መዛሙርቱ ወደ ማዶ ሲሻገሩ ደቀ መዛሙርቱ እንጀራ መያዝ ረሱ። ጌታም “ከፈሪሳውያንና ከሰዱቃውያን እርሾ ተጠበቁ” አላቸው። እነርሱ ግን ስለ እንጀራ የነገራቸው መስሏቸው እርስ በርሳቸው ተጨነቁ። ጌታም አምስት ሺህውንና አራት ሺህውን እንዴት እንደመገበ በማስታወስ የደካማ እምነታቸውን ሁኔታ ገለጠላቸው።
እርሾ የተባለው የፈሪሳውያንና የሰዱቃውያን ትምህርት ነው። እርሾ በጥቂቱ ተጀምሮ ሙሉውን ሊጥ እንደሚያቦካ ሁሉ፣ የተሳሳተ ትምህርትና ግብዝነትም በሰው ሕይወትና በቤተክርስቲያን ውስጥ ገብቶ መንፈሳዊነቱን ሊያበላሽ ይችላል። ስለዚህ አማኝ ሁልጊዜ የሚሰማውን ትምህርትና ውስጣዊ ማንነቱን ከመንፈሳዊ ብልሽት ሊጠብቅ ይገባል።
ተግባራዊ የውይይት ጥያቄዎች
👉አራት ሺህ መመገብ ከአምስት ሺህ መመገብ ጋር ያለው ተመሳሳይነት እና ልዩነት ምንድን ነው?
👉ሕዝቡ ለሦስት ቀን ከኢየሱስ ጋር መቆየታቸው ስለ ቃሉ ያላቸውን ጥማት እንዴት ይገልጻል?
👉ፈሪሳውያን የዘመኑን ምልክት አለማወቃቸው ለምን ነበር?
👉”የዮናስ ምልክት” ለምን በተደጋጋሚ ተጠቀሰ?
👉ደቀ መዛሙርቱ ስለ “ርሾ” ሲነገራቸው ስለ እንጀራ ማሰባቸው ምን ዓይነት መንፈሳዊ ድንዝዝና ነው?
👉የፈሪሳውያን እና የሰዱቃውያን ትምህርት “ርሾ” የተባለው ለምንድን ነው?
👉ሰባት መሶብ የተረፈው ቁርጥራጭ ምንን ያሳያል?
👉አንካሶች፣ ዕውሮችና ዲዳዎች ሲፈወሱ ሕዝቡ የእስራኤልን አምላክ ማክበራቸው ምን ያሳያል?
👉ኢየሱስ ለሕዝቡ “አዝናለሁ” (Compassion) ማለቱ ለአካላዊ ፍላጎት ያለውን ግምት እንዴት ይገልጻል?
👉የእግዚአብሔርን ተአምራት በፍጥነት መርሳት (እንደ ደቀ መዛሙርቱ) ምን ዓይነት መንፈሳዊ ጉዳት አለው?