የዮሐንስ ወንጌል የጥናት መምሪያና ማብራሪያ
ምልከታ
ጌታ ኢየሱስ እውነተኛ የወይን ግንድ አባቱ ደግሞ ገበሬ እንደሆነ በመግለጽ ጥልቅ ትምህርት ይሰጣል። በእርሱ ያለና ፍሬ የማያፈራ ቅርንጫፍ ሁሉ እንደሚወገድ፣ ፍሬ የሚያፈራው ግን አብዝቶ እንዲያፈራ እንደሚከረከም ገለጸ። ቅርንጫፍ በወይኑ ግንድ ላይ ካልኖረ በራሱ ፍሬ ሊያፈራ እንደማይችል ሁሉ፣ አማኞችም በክርስቶስ ባይኖሩ ምንም ሊያደርጉ እንደማይችሉ አረጋገጠ። በእርሱ የሚኖርና ቃሉም በእርሱ የሚኖር የሚለምነውን ሁሉ እንደሚሆንለትና በዚህም አብ እንደሚከብር ተናገረ። አብ እንደ ወደደው እርሱም እንደ ወደዳቸውና በፍቅሩ እንዲኖሩ አሳሰባቸው። ትእዛዙንም በመጠበቅ በፍቅሩ መኖር እንደሚቻልና ደስታቸውም ፍጹም እንዲሆን ይህን እንደ ነገራቸው ገለጸ። እርስ በርሳቸው እንዲዋደዱ አዘዛቸው፤ ነፍሱን ስለ ወዳጆቹ አሳልፎ ከመስጠት የሚበልጥ ፍቅር እንደሌለ በመግለጽ ወዳጆቹ እንደሆኑና እርሱ እንደ መረጣቸው መሰከረ። ይህም ፍሬ እንዲያፈሩና ፍሬአቸውም እንዲኖር እንደሆነ ተናገረ።
ትርጓሜ
ይህ ክፍል በክርስቶስና በአማኙ መካከል ያለውን የማይነጣጠል ሕብረት በምስል ያሳያል። “መኖር” (Abiding) ማለት በየቀኑ ከጌታ ጋር መገናኘት፣ በቃሉ መመራትና በጸሎት ሕይወት መጽናት ማለት ነው። ፍሬ ማፍራት ደግሞ የክርስቶስን ባሕርይ መግለጥና ሰዎችን ወደ ጌታ ማምጣት ነው። “መከረከም” (Pruning) እግዚአብሔር በሕይወታችን ያሉትን የማይጠቅሙ ነገሮችን፣ ኃጢአቶችንና የዓለም ፍላጎቶችን በማስወገድ ለበለጠ መንፈሳዊ እድገትና ቅድስና የሚያዘጋጅበት መለኮታዊ መንገድ ነው። ያለ እርሱ ምንም ማድረግ አንችልም የሚለው ቃል የሰው ልጅ ድኅነትም ሆነ መንፈሳዊ ስኬት ሙሉ በሙሉ በክርስቶስ ጸጋ ላይ ጥገኛ መሆኑን ያስረዳል። የፍቅር ትእዛዝ ደግሞ የደቀ መዝሙርነት ትልቁ
መለያ ሲሆን፣ ክርስቶስ ስለ እኛ የከፈለው መሥዋዕትነት ለእኛ ፍቅር መለኪያ ነው። ከባሪያነት ወደ ወዳጅነት መሸጋገራችን ደግሞ ከጌታ ጋር ያለንን ጥልቅ ቅርበትና ምስጢሩን እንደገለጠልን ያሳያል።
💬 ለአነስተኛ ቡድን ውይይት የሚሆኑ ጥያቄዎች
👉 በየቀኑ ከእውነተኛው የወይን ግንድ ከክርስቶስ ጋር ያለህ ሕብረት ምን ይመስላል?
👉 በሕይወትህ እግዚአብሔር አብዝተህ ፍሬ እንድታፈራ ብሎ የከረከመህና ያስወገደልህ ነገር አለ?
👉 “ያለ እኔ ምንም ልታደርጉ አትችሉም” የሚለው ቃል በራስህ ጥንካሬና ዕውቀት የመመካት ልምድህን እንዴት ይገዳደረዋል?
👉 ጌታ እኛን እንደ ወደደን እኛም እርስ በርሳችን እንድንዋደድ የተሰጠው ትእዛዝ በቤተክርስቲያንህና በቤትህ ውስጥ በተግባር እንዴት ይገለጣል?
👉 ለጌታ ያለህን ፍቅር የምትገልጠው በስሜት ብቻ ነው ወይስ ቃሉንና ትእዛዙን በመጠበቅ?
👉 ከጌታ ጋር ያለህ ግንኙነት እንደ ባሪያ በግዴታ ነው ወይስ እንደ ወዳጅ በምስጢርና በፍቅር?
👉 በሕይወትህ የምታፈራው ፍሬ ለዘላለም የሚኖር (ሰዎችን ወደ ጌታ የሚያመጣና ቅድስናን የሚገልጥ) ነው ወይስ ጊዜያዊ?