የጌርጌሴኖኑ አጋንንት ያለበት ሰው (5፡1-20)

ምልከታ እና ትርጓሜ 

ጌታችን ኢየሱስ ክርስቶስ ማዕበሉን ዝም አሰኝቶ ባሕሩን ከተሻገረ በኋላ በጌርጌሴኖን ምድር ሲደርስ ፤ ገና ከታንኳው እንደወረደ ርኩስ መንፈስ የያዘው ሰው ከመቃብር ወጥቶ ተገናኘው። የዚህ ሰው ሕይወት እጅግ አሰቃቂ ነበር ፤ መኖሪያው በመቃብር ስፍራ ሆኖ በሰንሰለትና በእግር ብረት እንኳ ሊታሰር የማይችል እጅግ ብርቱና አስፈሪ ነበር። ቀንና ሌሊት በመቃብርና በተራራ ላይ እየጮኸ ራሱን በድንጋይ ይቧጭር ነበር። ይህ ሰው ኢየሱስን ከሩቅ ባየው ጊዜ ሮጦ ሰገደለትና “የልዑል እግዚአብሔር ልጅ ኢየሱስ ሆይ! ከአንተ ጋር ምን አለኝ?” በማለት በታላቅ ድምፅ ጮኸ። ጌታም ስሙን በጠየቀው ጊዜ “ብዙዎች ነንና ስሜ ሌጌዎን ነው” የሚል ምላሽ አገኘ። አጋንንቱም ከአገሩ እንዳያወጣቸውና በአቅራቢያው ወደነበሩት ሁለት ሺህ የሚያህሉ አርያ (አሳማዎች) ውስጥ እንዲሰዳቸው ለመኑት። ፈቃድ ባገኙም ጊዜ ወደ አሳማዎቹ ገቡ ፤ መንጋውም በአንድነት ወደ ባሕሩ ተጣጥለው ሰጠሙ። የአካባቢው ሰዎች መጥተው ሲያዩ ግን ያ አስፈሪ የነበረው ሰው ልብስ ለብሶና አእምሮው ተመልሶ በኢየሱስ እግር ስር ተቀምጦ በማየታቸው ተገረሙ ፤ ሆኖም በደረሰው የንብረት ጥፋት ፈርተው ጌታ ከአገራቸው እንዲወጣላቸው ለመኑት። የዳነው ሰው ግን ጌታን ለመከተል ቢለምንም ፤ ጌታ ግን “ወደ ቤትህ ወደ ቤተሰቦችህ ሂድና ጌታ እንዴት ያለ ታላቅ ነገር እንዳደረገልህ ንገራቸው” በማለት ላከው። 

ይህ ታሪክ ጌታችን ኢየሱስ ክርስቶስ በጨለማው ዓለምና በክፉ መናፍስት ላይ ያለውን ፍጹም የበላይነት በጉልህ ያሳያል። የሰው ልጅ በሰይጣን እስራት ውስጥ ሲወድቅ ማንነቱ እንደሚጠፋና ከመቃብር (ከሞት) ጋር እንደሚተባበር እናያለን። “ሌጌዎን” የሚለው ስም በወቅቱ የነበረውን የሮም ጦር ብዛት (ከ4ሺህ እስከ 6ሺህ ወታደሮች) የሚያመለክት ሲሆን ፤ ይህም ሰውየው በስንት ሺህ አጋንንት ተከቦ እንደነበር ያሳያል። ነገር ግን ሺህ ለጌታ አንድ ነው ፤ በቃሉ ሥልጣን ፊት ሁሉም ተንበርካኪዎች ናቸው። 

ለምሳሌ፦ አንድ ጨለማ ቤት ውስጥ ለዓመታት ተቆልፎ የቆየን ክፍል ብርሃን ሲገባበት ፤ ጨለማው “ቆይ ትንሽ ላስብበት” አይልም ፤ ወዲያውኑ ይሸሻል። የክርስቶስም ብርሃን በሰውየው ሕይወት ውስጥ ሲበራ አጋንንቱ ስፍራ አልነበራቸውም። 

ጌታ ሁለት ሺህ አሳማዎች እንዲጠፉ መፍቀዱ ለሰዎች አንድ ትልቅ እውነት ያስተምራል ፤ እርሱም “የአንድ ሰው ነፍስ ከሁለት ሺህ አሳማዎችና ከማንኛውም ምድራዊ ሀብት ትበልጣለች” የሚል ነው። ዓለም በአሳማዎቹ መጥፋት ሲቆጭ ፤ ጌታ ግን በአንድ ሰው ነጻ መውጣት ደስ ይለዋል። የሚገርመው ግን የአገሩ ሰዎች ተአምሩን አይተው ወደ ጌታ ከመቅረብ ይልቅ “ውጣልን” ማለታቸው ፤ ዛሬም ብዙዎች ንብረታቸውና ጥቅማቸው ሲነካ ወንጌልን እንደሚቃወሙ ያሳያል። ጌታ ግን የዳነውን ሰው ወደ አሥሩ ከተማ (ዲካጶሊስ) መላኩ ፤ እውነተኛ ምስክርነት የሚጀምረው ከቤትና ከቅርብ ወዳጅ መሆኑን ያስተምረናል። ጌታ ዛሬም እኛን ሊፈውሰንና ሰንሰለታችንን ሊበጥስ ይፈልጋል ፤ እኛም እንደዚህ ሰው የተደረገልንን ታላቅ ነገር ለሌሎች ልንመሰክር ይገባል። 

ተግባራዊ የውይይት ጥያቄዎች 

👉ሰውየው ሰንሰለት የመበጠሱና ራሱን በድንጋይ የመቁሰሉ ሁኔታ የሰይጣንን አጥፊነት እንዴት ያሳያል? 

👉አጋንንቱ ኢየሱስን “የልዑል እግዚአብሔር ልጅ” ብለው መጥራታቸው ምን ትርጉም አለው? 

👉”ሌጌዎን” የሚለው ስም ከሮማውያን ወታደራዊ አደረጃጀት ጋር ያለውን ተያያዥነት አብራሩ። 

👉ኢየሱስ አጋንንቱ ወደ እሪያዎቹ እንዲገቡ ለምን ፈቀደላቸው? 

👉የሁለት ሺህ እሪያዎች መጥፋት ከሰውየው ነፍስ መዳን አንጻር እንዴት ይታያል? 

👉የከተማው ሰዎች ተፈውሶ የተቀመጠውን ሰው አይተው ለምን ፈሩ? ለምንስ ኢየሱስን “ሂድልን” አሉት? 

👉ኢየሱስ የተፈወሰው ሰው እንዲከተለው ሳይፈቅድለት “ለቤተሰቦችህ ምስክርነት ስጥ” ማለቱ ለምን አስፈለገ? 

👉ሰውየው በመቃብር መካከል መኖሩ ስለ ሞትና ስለ ርኩሰት ምን ዓይነት ምስል ይሰጣል? 

👉አጋንንቱ “ከአገሩ እንዳይሰድዳቸው” መለመናቸው ስለ ክልላዊ አሠራራቸው ምን ይገልጣል? 

👉ተፈውሶ የተቀመጠው ሰው “ልብስ ለብሶና አእምሮው ተመልሶ” መታየቱ ስለ ድኅነት ኃይል ምን ያስተምራል?