የብሉይ ኪዳን መጽሐፍ ቅዱስ ጥናት

የዚህ ጥናት ዓላማ ከእያንዳንዱ የብሉይ ኪዳን መጽሐፍ ጋር በሚገባ እንድትተዋወቅ ለማድረግና የመጽሐፉን እውነቶች ከዘመናችን ጋር ለማዛመድ በመጣር እግዚአብሔር ለእያንዳንዳችን ያለውን መልእክት ለመረዳት ነው። የእግዚአብሔርን ቃል ማወቅ ከሕይወታችንም ጋር ማዛመድ አስፈላጊ እንደሆነ ልብ በል። የእግዚአብሔርን ቃል ባናጠናና በግል ከሕይወታችን ጋር ባናዛምደው፥ ከእግዚአብሔር ጋር በምናደርገው ጉዞ ላይ አሉታዊ ተጽዕኖ ያስከትልብናል፤ መንፈሳዊ ሕይወታችንም ይጠወልጋል። ይህ ጥናት ከእያንዳንዱ ተማሪ ብዙ ሥራን የሚጠይቅ ነው፤ ዳሩ ግን ከራስህ ሕይወት ጋር በማዛመድ ጥያቄዎቹን ሁሉ በጥንቃቄ ብትመልስና የሚሰጡህን ሥራዎች በሙሉ ብትሠራ፥ ብሉይ ኪዳንን በተሻለ መንገድ በመረዳት ከእግዚአብሔር ጋር ያለህ እርምጃ በይበልጥ ዕድገት ከማሳየቱም ሌላ፥ በሚገባ በምታውቀውና በተወሰነ የእግዚአብሔር ቃል ክፍል ላይ ከማተኮር ይልቅ ለሁሉም ክፍል ፍቅር ይኖርህና እንዴት ልትጠቀምበት እንደሚገባ ታውቃለህ። ሮሜ 15፡4 እንዲህ ይላል፡«በመጽናትና መጻሕፍት በሚሰጡት መጽናናት ተስፋ ይሆንልን ዘንድ አስቀድሞ የተጻፈው ሁሉ ለትምህርታችን ተጽፎአልና።»

የጥያቄዎቹን መልሶች በደብተር ጻፍ። የመጽሐፍ ቅዱስ መዝገበ ቃላት ከሌለህ ለጥናትህ ይረዳህ ዘንድ ለመግዛት ሞክር። አዲሱ ትርጒም የአማርኛ መጽሐፍ ቅዱስና የእንግሊዝኛ መጽሓፍ ቅዱስ ካለህ፥ በተጨማሪ ከእነርሱም አንብብ።

በትምህርቶቹ ውስጥ በርካታ ማብራሪያ ጥቅሶች ተሰጥተዋል። ከተሰጡት ጥቅሶች መካከል «ተመልከት» ተብለው የተጻፉትን ሁሉ መመልከት አስፈላጊ ነው። «ተመልከት» የሚል ትእዛዝ ያልተሰጠባቸውን ግን ጊዜ ካለህ ልትመለከታቸው ትችላለህ፤ አለበለዚያም ለሌላ የጥናትህ ጊዜ የሚጠቅሙህ ይሆናሉ።

የዚህ ጥናት አንዱ ግብ ተማሪው ብሉይ ኪዳንን በሙሉ እንዲያጠና ለመርዳት ነው። ስለዚህ ለአንድ ተማሪ የተሰጠውን የንባብ ክፍል ሁሉ አጠናቅቆ ማንበብ በጣም አስፈላጊ ነው።

በጥናቱ ውስጥ የተካተቱትን ጥያቄዎች ከመስራትዎ በፊት፣ መመሪያውን ጨምሮ በጥያቄዎቹ የፊት ገጽ ላይ የሚጠየቁትን ትክክለኛ ስምዎን (ወይም የብዕር ስምዎን) እና ትክክለኛ የኢ-ሜይል አድራሻዎን መሙላትዎን አይዘንጉ። ትክክለኛ የኢ-ሜይል አድራሻ እንዲሞሉ የተጠየቁበት ምክንያት ውጤትዎ የሚላከው በዚሁ አድራሻ ስለሆነ ነው፡፡ ጥያቄዎቹን ሰርተው ሲያበቁ “submit” የሚለውን ቁልፍ ይጫኑ። አንዳንድ ጊዜ “Google” ጥያቄዎቹን የሰራው ኮምፒውተር ወይም ሰው መሆኑን ለማጣራት የሴኪውሪቲ ጥያቄዎችን ሊጠይቆት ይችላል። “Submit” የሚለውን ቁልፍ ከተጫኑ በኋላ “view your score” የሚለውን ቁልፍ በመጫን ውጤትዎን እና የተሳሳቱትን ጥያቄ ግብረ መልስ (feedback) ማየት ይችላሉ። በጥያቄዎቹ ላይ የሚያነሱት ሃሳብ ካለ በሚከተለው ኢ-ሜይል ይላኩልን። tsegaewnet@gmail.com

የብሉይ ኪዳን መጽሐፍ ቅዱስ ጥናት